Top-5 najlepšaj spartovaj formy na sioletniaj Alimpijadzie i adna najhoršaja
Alimpijskija hulni — šaniec prajavić siabie nie tolki dla atletaŭ, ale i dla dyzajnieraŭ spartovaha adzieńnia. Sabrali dla vas top ź piaci varyjantaŭ formy, jakaja dakładna pryciahnie ŭvahu fanataŭ.
ZŠA: ekałahičnaść i inavacyi
Forma amierykancaŭ — jaŭny lidar internet-simpatyj. Kamplekty da piekinskaj alimpijady stvaryŭ brend Ralph Lauren, dla jakoha heta ŭžo nie pieršaje supracoŭnictva z alimpijskaj zbornaj. Kampanija stvaraje kamplekty dla amierykanskich alimpijcaŭ z 2008 hoda, to-bok ź minułych Hulniaŭ u Piekinie.
U hety raz dyzajniery nadali šmat uvahi ekałohii. U skład formy ŭvachodzić pierapracavany paliestr, a taksama voŭna, što adpaviadaje standartam adkaznaj vytvorčaści (i adpaviedna, adkaznaha staŭleńnia da aviečak).
Ale ž nie aviečkami adzinymi. Kamplekty na adkryćcio Alimpijady, jakija dastalisia amierykancam, stvoranyja z užyvańniem sučasnaj technałohii, što zrobić ich jašče ciaplejšymi. Heta intelektualnaja tkanina, jakaja maje strukturu sotaŭ i zdolnaja pašyracca ci ściskacca ŭ adkaz na źmieny tempieratury, i ŭsio heta — biez vykarystańnia akumulataraŭ ci pravadnych technałohij.
U stvareńni formy kampanii Ralph Lauren dapamahali telezorka Kim Kardašjan i viadomy hraficist Eryk Chiejz. Brend Kardašjan SKIMS pašyŭ dla atletaŭ bializnu i damašniaje adzieńnie, a Chiejz paŭdzielničaŭ u prajektavańni formy dla łyžnikaŭ.
Kanada: hulnia ŭ transformieraŭ
Formu dla kanadcaŭ pašyŭ brend Lululemon, ź jakim niadaŭna zbornaja padpisała pahadnieńnie ab supracoŭnictvie na šeść hadoŭ. Zdajecca, tamtejšyja dyzajniery natchnialisia filmami pra transformieraŭ. Bo inakš nie patłumačyć, naprykład, navošta spartoŭcam taki elemient adzieńnia, jak žylet, što moža pieratvarycca ŭ padušku ci šarf. Ci puchavik, jaki možna vykarystoŭvać jak rukzak, kali vam zanadta horača.
U kamplekt kanadskaha alimpijca taksama ŭvachodzić parka, daŭžyniu jakoj možna źmianiać — dastupnyja ažno try varyjanty!
Tkaniny, što vybraŭ Lululemon, sami pa sabie — technałahičny cud. Jany ŭcieplenyja, prapuskajuć pavietra, ubirajuć pot, majuć antybakteryjalny efiekt, nie prapuskajuć vadu i viecier.
Rasija: urok alimpijskaj hieahrafii
Rasijskija atlety znoŭ vystupajuć na Hulniach pad ściaham Suśvietnaha alimpijskaha kamiteta. Zhodna z hetym spahnańniem, atrymanym paśla dopinhavaha skandała, na formie alimpijcaŭ nielha raźmiaščać rasijskija nacyjanalnyja simvały, adnak jaje stvaralnikam dazvolili vykarystoŭvać kolery trykałora.
Tamu dyzajnieram brenda ZASPORT, što i pašyŭ formu, daviałosia znajści novyja sposaby prademanstravać nacyjanalnuju identyčnaść spartoŭcaŭ. U vyniku na paradnaj formie i futbołkach dla trenirovak dyzajniery raźmiaścili karty roznych hieahrafičnych abjektaŭ Rasii. Tut možna ŭbačyć aziory Bajkał i Ładaha, Sočy, Kamčatku, Sachalin, Ziamlu Franca-Iosifa, Navasibirskija astravy, Paŭnočnuju ziamlu, astravy Vranhiela i Novaj Ziamli.
Vykazali pavahu i haspadaram Alimpijady. Na futbołkach atletaŭ bačnyja vyjavy kitajskich drakonaŭ, a piktahramy zimnich vidaŭ sporta stylizavanyja pad ijerohlify.
Šviecyja: minimalizm i fiłasofija
Masachika Furuta, hałoŭny dyzajnier brenda Uniqlo, što pašyŭ formu dla šviedaŭ, raskazvaje pra svaju pracu dla alimpijcaŭ tak: «Naša fiłasofija dyzajnu — kali prostaje robicca najlepšym i kali mienš značyć bolš».
U vyniku skandynavam dastałasia minimalistyčnaja i stylnaja forma, jakuju, tym nie mienš, nazyvajuć dastatkova praktyčnaj u vykarystańni. Kab zrabić jaje takoj, japonski brend stvaraŭ hetaje adzieńnie ŭ supracoŭnictvie z atletami. Dyzajniery taksama teściravali tkaniny dla formy pry roznych tempieraturach, kab hatovyja kamplekty dobra padyšli da piekinskaj zimy.
Nie abyšłosia i biez sučasnych technałohij: alimpijskaje adzieńnie ad Uniqlo kantraluje vydzialeńnie potu i tempieraturu cieła atletaŭ. Usio dziakujučy śpiecyjalnamu jačeistamu materyjału i inšym inavacyjam.
Aŭstralija: badaj, samaja stylovaja ŭniforma
Svaju sioletniuju formu aŭstralijcy nazyvajuć adnoj z samych stylovych za ŭvieś čas. Stvaryŭ jaje brend Sportscraft, jaki pastaŭlaje adzieńnie dla nacyjanalnaj zbornaj z 1996 hoda.
Dyzajniery raźmiaścili na ŭniformie maleńkija detali, što nahadvajuć pra Aŭstraliju i historyju jaje ŭdziełu ŭ Hulniach. Naprykład, na huzikach paŭpalito jość emblema aŭstralijskaha alimpijskaha kamiteta. A na jaho padkładcy možna bačyć imiony 265 aŭstralijcaŭ, što ŭdzielničali ŭ zimovych Alimpijadach za ŭsiu ich historyju.
Bonus: «nievynosna ahidnaja» forma z Kitaja, jakaja stała virusnaj
«Nievynosna ahidnaj» nazvali karystalniki interneta formu, stvoranuju arhkamitetam Hulniaŭ dla miedalovych cyrymonij. Takoje adzieńnie budzie padčas cyrymonij na dapamožnym piersanale.
Post u kitajskaj sacsietcy Weibo (anałah Tvitara), dzie arhkamitet Alimpijady apublikavaŭ fota formy, sabraŭ bolš za 366 tysiač łajkaŭ i 17 tysiač kamientaryjaŭ. Adzin z karystalnikaŭ napisaŭ pra formu tak: «Šmat hadoŭ nie bačyŭ adzieńnie takoha staramodnaha dyzajnu, navat maja mama nie apranułasia b takim čynam».
Stała viadoma pra zatrymańnie 77-hadovaha Vasila Hustyra, adnaho z najlepšych ahraryjaŭ Biełarusi6
Kamientary