«Haładoŭka palitviaźnia ŭ turmie maje šaniec na pośpiech, kali režym choć by troški zakłapočany svajoj reputacyjaj». Uładzimir Mackievič haładaje 10-y dzień
Siońnia dziasiaty dzień, ź minułaj piatnicy, jak trymaje haładoŭku ŭ turmie fiłosaf i mietadołah Uładzimir Mackievič. Jon patrabuje, kab jaho vypuścili pad padpisku ab niavyjeździe, zaviaršyli śledčyja dziejańni i pryznačyli datu suda. Mackieviča zatrymali 4 žniŭnia i vinavaciać u «arhanizacyi dziejańniaŭ, jakija hruba parušajuć hramadski paradak» (art. 342 KK). Kali hetyja patrabavańni nie buduć vykananyja, to Mackievič ad aŭtorka, z 15 lutaha abiacaje pačać suchuju haładoŭku.
Biełaruskaja niezaležnaja hramadskaść i ŭnutry krainy, i za miažoj nakolki moža padtrymlivaje Mackieviča, choć mahčymaści jaje va ŭmovach dziaržaŭnaha teroru i faktyčnaj admieny pravavych normaŭ adnosna palitźniavolenych vielmi abmiežavanyja.
Tamu adzinaje, što ŭ siłach demakratyčnaj supolnaści — akazańnie viaźniu maralnaj padtrymki i daniasieńnie infarmacyi pra haładoŭku Mackieviča i pakuty inšych palitviaźniaŭ da suśvietnaj supolnaści.
Jak adznačaje historyk i palityčny ahladalnik Alaksandr Frydman:
«Haładoŭka palitviaźnia ŭ turmie maje šaniec na pośpiech, kali režym choć by troški zakłapočany svajoj reputacyjaj i aścierahajecca nastupstvaŭ.
U vypadku režymu Łukašenki hetaha niama, a mužny ŭčynak Mackieviča znachodzicca ŭ ciani ŭkrainskich padziej: pra jaho praktyčna nie pišuć za miežami Biełarusi. Patrabavańni Mackieviča, chutčej za ŭsio, vykananyja nie buduć.
I tym nie mienš značeńnie haładoŭki ciažka pieraacanić:
Uładzimir Mackievič demanstruje svaju maralnuju pieravahu nad dyktaturaj.Praciahvaje baraćbu i za kratami, i heta baraćba nie tolki za jaho asabistyja, parušanyja ŭładaj pravy, ale i za pravy ŭsich palitviaźniaŭ, za svabodnuju i demakratyčnuju Biełaruś».
Važna adznačyć, što maralna siońnia z Mackievičam navat tyja ludzi, jakija ŭ «mirnyja» časy byli jahonymi intelektualnymi apanientami.
Adzin z takich, sacyjołah Filip Bikanaŭ, piša ŭ Fejsbuku:
«Ja ščyra nie lublu Uładzimira Mackieviča. Jon mnie nie padabajecca ni jak čałaviek, ni jak myślar. Nie moh ujavić sabie situacyi, u jakoj ja napišu pra jaho kamplimientarny post, ale voś, hety dzień nadyšoŭ.
Kali Uładzimir Mackievič kaža, što budzie trymać suchuju haładoŭku, ja jamu vieru. Heta ahidna, što čałaviek znachodzicca ŭ turmie prosta za toje, što dumaŭ. Hety čałaviek ni ŭ čym nie vinavaty. Jon nie pavinien haładać, siadzieć za kratami. Ni ŭ čym nie vinavatyja i inšyja bolš za 1000 palityčnych źniavolenych.
Ščyra, sa značna bolšym zadavalnieńniem ja b ciapier niešta krytyčnaje pisaŭ, niejki tekst Mackieviča raźbiraŭ, ci jašče niešta, i ŭpeŭnieny, što takaja mahčymaść mnie nadarycca.
Mackievič padobny na čałavieka, ab jakoha hetyja «aby dasiadziecieli da piensii» abłamajuć svaje zuby, i jaki napiša jašče nie adzin tekst. Svabodu Mackieviču!»
Ekanamičny analityk Siarhiej Čały, jaki raniej taksama byŭ z Uładzimiram Mackievičam nie ŭ najlepšych adnosinach, taksama zapisaŭ videa sa słovami padtrymki źniavolenamu intelektuału:
«Całkam vidavočna, što čałaviek siadzić za svaje pierakanańni, svaje pohlady, svaje słovy i dumki. Navat za dumki chutčej, čym za słovy.
Ja nie viedaju, jak stavicca da haładovak… U kožnym razie, hety ŭčynak vyklikaje pavahu.
Vielmi nie chaciełasia b, kab haładoŭka stanaviłasia suchoj, jak heta było zajaŭlena. Faktyčna havorka idzie pra abjaŭlenaje samahubstva. Raniej my ličyli, što hierojami mohuć być pałymianyja revalucyjaniery ci ludzi takija, jak Ściapan Łatypaŭ, jakija svaimi ŭčynkami dakazali, što złamać ź nielha i vola ich mocnaja. I tamu jany ŭjaŭlajuć maksimalnuju pahrozu dla režymu.
Ale heta inšy fienomien — kali čałaviek dumki, čałaviek słova akazvajecca niebiaśpiečny. I jon nie adziny taki čałaviek (my viedajem šmat prykładaŭ), ale mienavita Mackievič biare na siabie hetuju misiju demanstracyi biesčałaviečnaha staŭleńnia režymu da taho, kaho jon nazyvaje svaimi vorahami».
Adhavorvać ad haładoŭki mietadołaha i fiłosafa, na dumku Čałaha, «napeŭna, treba»:
«Ale, jak kazali ŭ časy francuzskaha Aśvietnictva, ja nie padzialaju jaho pierakanańni, ale hatovy addać žyćcio za toje, kab jon moh ich svabodna vykazvać».
Padborki vykazvańniaŭ pra Mackieviča inšych biełaruskich intelektuałaŭ raniej źbirali Radyjo Svaboda i telekanał «Biełsat».
Siońnia paviedamlałasia, što akcyja ŭ padtrymku Uładzimira Mackieviča prajšła ŭ polskim Poznani.
Vyšli na akcyju i biełarusy Batumi.
Taksama miascovyja biełarusy zładzili pikiet u Stakholmie.
Źjaviłasia taksama hrafici ŭ padtrymku fiłosafa i tam, dzie ludzi za heta realna ryzykujuć hałavoj — u Minsku.
Čytajcie taksama:
Dźmitryj Bykaŭ: Uładzimir Mackievič — redki prykład niazłomnaha myślara
«Pačuvajecca zdavalniajuča». Advakat raspavioŭ, jak Uładzimir Mackievič trymaje haładoŭku
Aryšt fiłosafa Mackieviča praciahnuli na miesiac, jaho paplečniki viaduć u fejsbuku pryśviečanuju jamu staronku
-
Kanadski prafiesar zaklikaŭ biełarusaŭ da vyklučnaj strymanaści ŭ pytańni dystancyjavańnia ad Rasii
-
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ
-
Krajaznaŭcy Žodzina pakazali, jak razburajecca Bahusłaŭ Pole — miesca, dzie pačałasia historyja horada
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ5
Kamientary