Z pačatku vajny zatrymali minimum 8 «rejkavych partyzanaŭ». Što viadoma pra «rejkavuju vajnu» ŭ Biełarusi
Paśla pačatku vajny zatrymali minimum vosiem biełarusaŭ za padazreńnie ŭ zryvie hrafiku ruchu rasijskich ciahnikoŭ sa zbrojaj i datyčnych da fizičnaha paškodžańnia infrastruktury čyhunki ŭ Biełarusi. Telehram-kanał «Live. Soobŝiestvo žieleznodorožnikov Biełarusi» 6 sakavika pisaŭ, što z-za dyviersij («rejkavaj vajny») i kibier-napadaŭ na infrastrukturu Biełaruskaj čyhunki pa Biełarusi pierastali pierahaniać arhanizavanyja vajskovyja ešałony z technikaj i bojeprypasami rasijskich vojskaŭ. Zatrymanym inkryminujuć padrychtoŭku da akta teraryzmu, im pahražaje da 15 hadoŭ pazbaŭleńnia voli. Usio, što viadoma pa hetych spravach, sabrała «Viasna».
Śledčy kamitet: «Z terarystami nie damaŭlajucca, ich źniščajuć»
Jak paviedamlała MUS, z 28 lutaha na 1 sakavika na terytoryi Mahiloŭskaj, Homielskaj i Minskaj abłaściej zafiksavana try fakty źniščeńnia sihnalnaha abstalavańnia, błakavańnia čyhunačnych šlachoŭ. Suprać zatrymanych uzbudžajuć kryminalnyja spravy pa art. 289 Kryminalnaha kodeksa (akt teraryzmu).
«Papiaredžvajem usich, chto navat padumaje ździajśniać lubyja supraćpraŭnyja dziejańni na Biełaruskaj čyhuncy: usie jany buduć kvalifikavanyja jak akt teraryzmu i reakcyja budzie maksimalna žorstkaj. Z terarystami nie damaŭlajucca, ich źniščajuć», — kažuć u viedamstvie.
Viciebsk: «płanavaŭ vyviadzieńnie sa stroju čyhunačnych sistem»
6 sakavika supracoŭniki HUBAZiKa i AMAPa zatrymali žychara Viciebska za «padrychtoŭku akta teraryzmu». Pa viersii MUS, mužčyna płanavaŭ vyviadzieńnie sa stroju sistemaŭ, jakija zabiaśpiečvajuć biaśpieku čyhunačnaha ruchu.
Pa infarmacyi čyhunačnaha telehram-kanała @bel_zhd, zatrymanym źjaŭlajecca supracoŭnik Viciebskaj dystancyi sihnalizacyi i suviazi UP «Viciebskaje adździaleńnie Biełaruskaj čyhunki» Siarhiej Kanavałaŭ. Supolnaść čyhunačnikaŭ paviedamlaje, što zatrymany mužčyna byŭ paśla kanfliktu ź ideołaham:
«Napiaredadni zatrymańnia Kanavałaŭ ustupiŭ u kanflikt z namieśnikam načalnika dystancyi sihnalizacyi i suviazi pa ideałohii, byłym načalnikam transpartnaj milicyi, Hlačkovym V. A. (ź jakim raniej užo kanfliktavaŭ). Hlačkoŭ ź viedama načalnika dystancyi Sielijonava I. V. paviedamiŭ u HUBAZiK i KDB pra padrychtoŭku dadzienym rabotnikam dyviersii, u vyniku čaho Kanavałava i aryštavali bieź jakich-niebudź na toje realnych padstaŭ».
Pa infarmacyi MUS, Kanavałaŭ mieŭ dostup da ŭkazanaha abstalavańnia, ale, jak piša «Live. Soobŝiestvo žieleznodorožnikov Biełarusi», Kanavałaŭ nie pracavaŭ na pierahonach, jon pracavaŭ tolki ŭ budynku.
Suprać mužčyny raspačali kryminalnuju spravu za padrychtoŭku da akta teraryzmu.
Śvietłahorsk: «Spalili šafu sihnalnaj ustanoŭki na čyhuncy»
4 sakavika ŭ Śvietłahorsku zatrymali troch miascovych žycharoŭ. Jak śćviardžaje pres-słužba MUS, 29-hadovy śvietłahorac razam z dvuma znajomymi ŭviečary 28 lutaha pryjšli na čyhunačny pierahon za horadam, dvoje ź ich ablili palivam relejnuju šafu sihnalnaj ustanoŭki i padpalili — abstalavańnie vyhareła. Na ich zaviali kryminalnuju spravu za ŭčynieńnie akta teraryzmu.
Z 2 sakavika ŭ Śvietłahorsku prachodzili pieratrusy ŭ suviazi sa spalenym abstalavańniem. Tady na pierahonie Astankavičy — Žerdź homielskaha adździaleńnia Biełaruskaj čyhunki była spalenaja relejnaja šafa sihnalizacyi, centralizacyi i błakavańnia (SCB), i ŭ vyniku śviatłafory i strełačnyja pieravody na hetym učastku ŭ niepracoŭnym stanie. Pierahon Astankavičy — Žerdź znachodzicca na linii Žłobin — Kalinkavičy, jakaja dalej praciahvajecca na Oŭruč (Žytomirskaja vobłaść Ukrainy). Liniju pabudavali jak najkaraciejšy šlach dla vajskovych ešałonaŭ u bok Ukrainy padčas Pieršaj suśvietnaj vajny.
Pravaabaroncam viadoma, što 4 sakavika ŭ Śvietłahorsku zatrymali Dźmitryja i Natallu Ravič (muž i žonka), brata Natalli Dzianisa Dzikuna i jahonuju dziaŭčynu Alisu Małanavu. U praŭładnych telehram-kanałach źjaviłasia «pakajalnaje videa» ź Dzianisam Dzikunom. Na videa Dzianis vyhladaje źbitym. Jon kaža, što pa ŭkazańni ByPOL padpaliŭ jašče z dvuma čałaviekami 28 lutaha šafu sihnalnaj ustanoŭki na stancyi «Žerdź — Astankovičy».
Śledčy kamitet 4 sakavika paviedamiŭ pra zatrymańnie 30-hadovaha žychara Śvietłahorsku. SK śćviardžaje, što jon dziejničaŭ u zmovie sa svaim svajakom, jaki paśla padziej žniŭnia 2020 hodu vyjechaŭ ź Biełarusi ŭ Litvu, dzie chavaŭsia ad kryminalnaha pieraśledu. Ad BYPOL zatrymany nibyta «atrymaŭ zadańnie ažyćciavić akty teraryzmu na čyhuncy». SK śćviardžaje, što zatrymany mieŭ «padrabiaznyja instrukcyi i videaŭroki pra toje, jak vyrablać pryłady złačynstva i ŭčyniać terakty na čyhunačnych abjektach».
Asipovičy: «vykazaŭ hatoŭnaść sadziejničać akcyjam pramoha dziejańnia z metaj niedapuščeńnia prasoŭvańnia ešałonaŭ z vajskovaj technikaj»
2 sakavika supracoŭniki HUBAZiKa ŭ Asipovičach zatrymali 43-hadovaha miascovaha žychara. Pa infarmacyi pravaabaroncaŭ, heta Alaksiej Šyškaviec.
Pa infarmacyi MUS, u pačatku 2022 hoda mužčyna «ŭvajšoŭ u skład ekstremisckaha farmavańnia ByPol, aŭtaryzavaŭšysia ŭ mabilizacyjnym čat-botie dla ździajśnieńnia supraćpraŭnych dziejańniaŭ u Biełarusi». 1 sakavika jon nibyta atrymaŭ ukazańni pa błakiroŭcy čyhunačnych šlachoŭ, a taksama pa vyrabie i vykarystańni «kaktejlaŭ Mołatava».
U adnosinach da fihuranta raspačataja kryminalnaja sprava za ŭdzieł u ekstremisckim farmavańni z metaj učynieńnia złačynstvaŭ ekstremisckaj nakiravanaści.
«Jon vykazaŭ aktyŭnuju hatoŭnaść sadziejničać akcyjam pramoha dziejańnia na abjektach čyhunki ŭ rajonie horada Asipovičy z metaj praviadzieńnia dyviersij i niedapuščeńnia prasoŭvańniaŭ ešałonaŭ z vajskovaj technikaj», — kaža načalnik mahiloŭskaha abłasnoha ŭpraŭleńnia HUBAZiK MUS Michaił Suchačoŭ.
Suprać Alaksieja ŭzbudzili kryminalnuju spravu za ŭdzieł u ekstremisckim farmavańni z metaj ździajśnieńnia złačynstvaŭ ekstremisckaj nakiravanaści (art. 361-1 KK).
Stoŭbcy: «pakłaŭ dva palena na puci i padpaliŭ»
Pa infarmacyi MUS, u noč z 1 na 2 sakavika ŭ Stoŭbcach zatrymanyja miascovyja žychary, muž z žonkaj, jakija na čyhunačnych puciach ździejśnili padpał biarvieńnia z metaj pieraškody ruchu ciahnikoŭ. Jak stała viadoma pravaabaroncam «Viasny», heta Siarhiej i Kaciaryna Hlebki. Doma ŭ ich troje niepaŭnahadovych dziaciej. Na «pakajalnym videa» bačna, što Siarhiej źbity.
«Mužčyna ŭsio zdymaŭ na mabilny z adpaviednym kamientaryjem, dzie adkryta vykazvaŭ svaje terarystyčnyja namiery. Jamu pahražaje da 20 hadoŭ pazbaŭleńnia voli», — piša MUS.
«Pakłaŭ dva palena na šlachi, tak jak nahledzieŭsia tielehram-kanałaŭ i byŭ nie zhodny, chacieŭ jak by vykazać svaju padtrymku i padpaliŭ hetyja palena», — kaža mužčyna na videa i raskajvajecca ŭ ździejśnienym.
Suprać Siarhieja Hlebki raspačataja kryminalnaja sprava pa art. 289 KK (akt teraryzmu).
Žodzina: zatrymany «rejkavy partyzan»
2 sakavika ŭ Žodzinie byŭ zatrymany 35-hadovy «rejkavy partyzan», ale padrabiaznaści spravy nie paviedamlajucca.
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič10
Kamientary