«Mnie strašna, navat vielmi strašna». Maryna Aŭsiańnikava raspaviała pra svaju antyvajennuju akcyju na Pieršym kanale

Ja znachodžusia ŭ siabroŭ, chavajusia. Pavoli pačynaju ŭśviedamlać, što majo žyćcio źmianiłasia nazaŭždy, da staroha žyćcia ja viarnucca nie mahu (uzdychaje). Prymaju zaspakajalnyja. Vielmi chvalujusia za svaich dziaciej — 17-hadovaha syna i 11-hadovuju dačku. Aboje jany ŭ Maskvie, ale nie sa mnoj, jany ŭ biaśpiecy.

My ŭsie zastaniemsia ŭ Rasii. My nie prymiem prapanovu prezidenta Francyi pra palityčny prytułak: ja patryjotka, moj syn — jašče bolšy patryjot, my nikudy nie chočam zjazdžać.

Dla siamji maja akcyja — ciažki ŭdar. Mama ŭsio jašče znachodzicca ŭ stanie šoku, jana stomlenaja. Syn papraknuŭ mianie za toje, što ja razburyła žyćcio ŭsich členaŭ siamji, ale ŭ jaho i tak niaprosty ŭzrost. My praciahvajem razmaŭlać adzin z adnym, ale heta prosta składana fizična vynosić, ja znachodžusia pamiž dvuch ahnioŭ i nie adčuvaju vialikaj padtrymki z boku siamji.

Mnie strašna, navat vielmi strašna. Ja tolki čałaviek. Adbycca moža ŭsio što zaŭhodna, naprykład, aŭtakatastrofa.

Ale ja nie škaduju, što nazvała vajnu vajnoj, ja ŭžo pierajšła rysu, za jakoj niama šlachu nazad. Zastajecca tolki kazać prama i adkryta.

Pakul suprać mianie nie zaviedzienaja kryminalnaja sprava, prachodzić pravierka. Chacia ja čuła, što hetaha [uzbudžeńnia kryminalnaj spravy] patrabujuć pradstaŭniki ŭłady. Pakul mianie pryhavaryli da štrafu ŭ 30 tysiač rubloŭ, ale kali b u mianie nie było dziaciej, ja, jak i mnohija inšyja, adbyvała b 15 sutak.

Raniej ja nie vielmi cikaviłasia palitykaj, nie chadziła na pratesty, ale niezadavolenaść stanam rečaŭ źbirałasia hadami — hajki pastupova zakručvalisia ŭsio macniej. Spačatku my nie mahli vybirać hubiernataraŭ, potym 2014, DNR i ŁNR, atručvańnie Navalnaha, represii suprać niezaležnych ŚMI. Ale ŭsio pieraviarnuła vajna, jakoj nichto nie čakaŭ.

Ja naradziłasia ŭ Adesie, ale ŭ vosiem hadoŭ pierajechała ŭ Rasiju. Moj baćka pamior u hetym horadzie, tam jaho mahiła. U mianie zastalisia svajaki va Ukrainie, ale my mała kantaktujem. Moj pratest — heta pacyfisckaja akcyja: u intaresach Rasii i ŭ intaresach śvietu jak maha chutčej skončyć vajnu. Na Zachadzie šmat chto nie razumieje, što rasijanie taksama suprać hetaj vajny.

Ja čytała, što maja akcyja była fejkam, mantažom, ale voś ža ja — sapraŭdny čałaviek (śmiajecca). Mnohija kalehi mohuć paćvierdzić, što hetaja akcyja sapraŭdy adbyłasia. Usio heta było tolki majoj idejaj, ja viedaju, što skazaŭ [pres-sakratar prezidenta Rasii Dźmitryj] Piaskoŭ, ciapier ja vorah numar adzin. Viedajecie, ja była ŭ takoj lutaści, što navat nie padumała pra nastupstvy svajho ŭčynku. Ja ŭśviedamlaju ich tolki ciapier — z kožnym dniom usio bolš i bolš.

Adbyłosia ŭsio voś jak. Na Pieršym kanale my pracujem pa tydniovych źmienach. Da paniadziełka ŭ mianie byli vychadnyja, ja ŭsio padrychtavała, kupiła vatman i markiery, na kuchni namalavała płakat i zapisała videarolik. Nie abmierkavała svaje płany ni ź siamjoj, ni z kalehami. U paniadziełak ja, jak zvyčajna, vyjšła na pracu, vyvučyła raźmiaščeńnie kamier i vybrała miesca, dzie mahu ŭstać z płakatam. Samym vialikim stracham było, što mianie nichto nie ŭbačyć pa televizary, što ŭsio budzie darma.

Pavialičyć

Ja ŭvarvałasia ŭ studyju — mima palicyjanta, jaki nie paśpieŭ adreahavać. Zatym pakazała płakat, viarnułasia na svajo pracoŭnaje miesca i stała čakać. Da mianie pryjšli načalniki, usie jany pytalisia adno i toje ž: «Niaŭžo heta byli vy?» Nichto nie chacieŭ u heta vieryć. Tolki paśla zjaviłasia palicyja.

Treba skazać, razmaŭlali sa mnoj davoli pryjazna: načalstva chacieła, kab ja zvolniłasia. Budučy na emocyjach, ja hetaha nie zrabiła, ale siońnia padam zajavu.

A palicyjanty vietliva razmaŭlali sa mnoj pra palityčnuju situacyju ŭ Rasii. Dopyt vioŭ namieśnik kiraŭnika adździeła pa baraćbie z ekstremizmam, jamu ŭvieś čas telefanavali jaho načalniki.

Nichto nie vieryŭ, što ja sama vyrašyłasia na pratest: usie pytalisia, jak ja źviazanaja z Zachadam, chto mianie navučyŭ.

Na Pieršym kanale ja pracavała ŭ mižnarodnych navinach, była na suviazi ź mižnarodnymi ahienctvami, čytała ich stužki, zapisvała intervju z palitykami i ekśpiertami, pradziusavała siužety. Ja bačyła inšuju realnaść, ale razumieła, što kožnaja kraina abaraniaje svaje intaresy, a my znachodzimsia ŭ infarmacyjnaj vajnie. Adnak pastupova praca pieratvaryłasia ŭ vialiki ciažar.

Bolšaść pracaŭnikoŭ dziaržkanałaŭ cudoŭna razumiejuć, što adbyvajecca, jany zusim nie pierakananyja prapahandysty. Unutry ich uvieś čas idzie baraćba pamiž pracaj i maralnymi aryjencirami. Im treba niejak karmić siemji, a inšaj pracy ciapier nie znajści. Ale mnie radasna čytać pra toje, što mnohija ciapier zvalniajucca.

• 0
• 0
• 0
• 0
• 0
• 0
• 0
• 0