Kaardynatarku «Latučaha ŭniviersiteta» Taćcianu Vadałažskuju asudzili da 2,5 hoda «chimii» i adpuścili ŭ zale suda
U sudzie Zavodskaha rajona Minska byŭ vyniesieny prysud palitźniavolenaj Taćcianie Vadałažskaj, jakuju abvinavačvali pa č. 1 art. 342 Kryminalnaha kodeksa (arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich).
Sudździa Aleh Kalada prysudziŭ Vadałažskaj abmiežavańnie voli va ŭstanovie adkrytaha typu terminam na dva z pałovaj hady. Mienavita taki termin i zaprasiła dziaržabvinavačvańnie. Taćcianu vyzvalili ŭ zale suda, piša «Viasna».
Padčas sudovaha pasiadžeńnia Taćciana ŭtrymlivałasia ŭ kajdankach.
Taćciana Vadałažskaja — mietadołah i sacyjołah, paplečnica Uładzimira Mackieviča, była ekśpiertam Ahienctva humanitarnych technałohij i kaardynataram prahramy stvareńnia sučasnaha ŭniviersiteta ŭ Biełarusi «Latučy ŭniviersitet».
Upieršyniu Vadałažskaja była zatrymanaja 4 žniŭnia 2021 hoda. Tady jana praviała 10 sutak na Akreścina, paśla čaho jaje adpuścili ŭ statusie padazravanaj pa č. 1 art. 342 (arhanizacyja i padrychtoŭka dziejańniaŭ, jakija hruba parušajuć hramadski paradak). Na praciahu ŭsiaho hetaha času Taćcianu niekalki razoŭ vyklikali na dopyty ŭ Śledčy kamitet.
U siaredzinie sakavika Taćciana padała chadajnictva ŭ SK z prośbaj ab dazvole vyjechać u Litvu na lačeńnie. 23 sakavika jana pajšła za adkazam na svajo chadajnictva ŭ SK, ale tam joj była pakazanaja pastanova ab zaklučeńni pad vartu.
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ2
Kamientary