VIP-hrupa i pretenzii da CT: Łukašenka rychtujecca adpravić Kolu na bijafak BDU?
Mikałaj Łukašenka skončyŭ škołu. Heta značyć, ciapier jaho čakaje vučoba ŭ VNU. Vyhladaje, što hetym pytańniem jakraz i zaniaŭsia Alaksandr Łukašenka. Na siońniašniaj naradzie, kudy paklikali ministraŭ achovy zdaroŭja i adukacyi, a taksama administracyju BDU, Łukašenka zahavaryŭ pra stvareńnie hrupy na bijafaku, dzie buduć vučycca «adabranyja, lepšyja chłopcy».
Skončyŭ škołu, jakuju — sakret
Mikałaj Łukašenka 9 kłasaŭ vučyŭsia ŭ viaskovaj škole Astrašyckaha haradka. Pakazvaŭ dobryja vyniki na alimpijadach pa chimii: u 2020 hodzie na rajonnym etapie jon zaniaŭ pieršaje miesca, na abłasnym — dypłom treciaj stupieni (značyć, zaniaŭ miesca niedzie z 6 pa 10).
U tym ža hodzie jon pastupiŭ u Licej BDU na bijałahičny profil, ale paźniej źjaviłasia infarmacyja, što na fonie pratestaŭ jon zabraŭ dakumienty. Chadzili čutki, što junak budzie vučycca ŭ Maskvie albo dystancyjna, ale dakładnaj infarmacyi tak i nie źjaviłasia.
Paśla łukašenkaŭskaja pres-słužba niaredka pakazvała chłopca: Mikałaj źjaŭlaŭsia na fota i videa razam z baćkam, biehaŭ z aŭtamatam, siadzieŭ u situacyjnym centry, lotaŭ na viertalocie padčas maršaŭ.
Ale dzie vučyŭsia Mikałaj u apošni hod, nikoli nie paviedamlałasia. Tolki ciapier dziaržśmi koratka paviedamili, što Mikałaj skončyŭ škołu, nie ŭdakładniajučy jakuju. Ale, vyhladaje, što jamu ŭručyli biełaruski załaty miedal — skryniu z uznaharodaj pieradaŭ Mikałaju ministr adukacyi Ivaniec.
Chimik, bijołah, miedyk?
Daŭno było viadoma, što budučaja prafiesija małodšaha syna Łukašenki budzie źviazanaja albo ź miedycynaj, albo ź bijałohijaj ci chimijaj.
Niaredka mierkavałasia, što Mikałaj Łukašenka moža pajści ŭ miedycynu. Na karyść takoj viersii kazała toje, što ŭ ŚMI maci Mikałaja nazyvali miedyka Irynu Abielskuju. Abielskaja — były asabisty doktar Alaksandra Łukašenki, pracuje hałoŭnym doktaram Respublikanskaha kliničnaha miedcentra Kiraŭnictva spravami prezidenta.
Iryna Abielskaja. Fota: Tut.by
U 2016 hodzie ŭ intervju Tut.by, adkazvajučy na abciakalnaje pytańnie pra budučyniu małodšaha syna, Abielskaja kazała:
«A jakuju prafiesiju abiare moj małodšy syn … Ja b prosta chacieła, kab jon atrymaŭ dobruju adukacyju, vybraŭ cikavuju prafiesiju, lubiŭ svaju pracu, atrymlivaŭ ad jaje zadavalnieńnie i prynosiŭ karyść i radaść inšym».
Miedykam staŭ i Dźmitryj, starejšy syn Abielskaj. Jon aftalmołah, kandydat miedycynskich navuk. Pracuje ŭ centry mikrachirurhii voka «Voka». Śpiecyjalizujecca na łaziernych refrakcyjnych apieracyjach.
A ŭ pačatku 2022 hoda Łukašenka daŭ vialikaje intervju rasijskamu prapahandystu Sałaŭjovu, dzie pachvaliŭsia viedami małodšaha syna:
«My ciapier z Pucinym abmiarkoŭvajem, bo jon [Mikałaj] na vačach u nas vyras, jon bijołah i chimik. Nichto nie skaža, što Łukašenka jaho tam ciahnie za niešta, i śpiecyjalisty, jakija jaho testujuć, časta (ja prašu Akademiju navuk), kažuć, što jon užo VNU skončyŭ, jamu niama čaho rabić u VNU. Pa bijałohii, ty ŭjaŭlaješ!»
Škoła «skroź Kolu»: rańni padjom, čarviaki i matematyka
Daŭniaje nazirańnie — praz vučobu małodšaha syna Alaksandr Łukašenka sočyć za biełaruskaj školnaj adukacyjaj i pieryjadyčna nakidvajecca to na školnuju prahramu, to na arhanizacyju navučańnia.
U 2017 hodzie jon zapatrabavaŭ pačynać uroki na hadzinu paźniej:
«Učora ŭ syna było siem urokaŭ, kožny dzień dzicia pračynajecca ŭ pałovu siomaj. U hetym pytańni nieabchodna razabracca i pačynać vučobu ŭ škole ŭ 9 hadzin ranicy (a nie ŭ 8, jak było. — «NN») i nie hladzieć na toje, što mnohim baćkam treba raniej na pracu».
U 2019 hodzie Łukašenka aburaŭsia tym, što ŭ škole nadta šmat matematyki:
«Davajcie kazać adkryta, nie chaču być retrahradam: nam, napeŭna, mienš za ŭsio treba ŭ krainie matematykaŭ. Paniaćci ŭ matematycy pavinny być, tamu što my ŭ žyćci zaŭsiody sutykajemsia z matematykaj. Ale ŭ vialikich matematykach patreba mienš za ŭsio».
Tady ž Łukašenka raskrytykavaŭ i adzin ź lubimych pradmietaŭ Mikałaja. Na ŭrokach bijałohii, aburyŭsia Łukašenka, nadta ŭvahi nadajuć čarviakam:
«Ja pahladzieŭ, jak u vośmym kłasie vyvučajuć bijałohiju: słuchajcie, paŭkursa — čarviaki! Budova, žyćciadziejnaść i što treba zrabić čarviaku, kab jon byŭ parazitam. Nu adkažycie mnie na hetaje pytańnie. Dobra, dla prasunutych chaj budzie. Tak, treba viedać pra hetu istotu, ale navošta jaho skurpulozna vyvučać?»
Tady Mikałaj jakraz byŭ u vośmym kłasie škoły.
Zaraz chłopiec škołu skončyŭ, budzie pastupać ŭ VNU — adpaviedna, u bližejšyja hady varta čakać pilnaj uvahi Łukašenki da biełaruskich univiersitetaŭ, ich prahramy, praviłaŭ, paradkaŭ. A dzie ŭvaha — tam i abureńnie, i krytyka.
Pieršy zvanočak — niečakanaja narada, pryśviečanaja centralizavanamu testavańniu. Mikałaju ž CT zdavać faktyčna na dniach.
Ad čaho Łukašenka spać nie moža
16 červienia Łukašenka raptoŭna sabraŭ naradu, kudy zaprasili ministraŭ achovy zdaroŭja Dźmitryja Pinieviča, ministra adukacyi Andreja Ivanca, a taksama rektara BDU Andreja Karala i dekana bijałahičnaha fakulteta BDU Vadzima Dziamidčyka.
Abmiarkoŭvali, paviedamlaje pres-słužba Łukašenki, «ustupnuju kampaniju, trendy CT i adbor talenavitych chłopcaŭ, jakija zajmalisia b bijałahičnaj navukaj».
Łukašenka vysłuchaŭ dakład ab intehracyi miedycyny i bijałohii. I paskardziŭsia na centralizavanaje testavańnie:
«Mianie hetaja prablema pastajanna chvaluje. Ščyra kažučy, ja spać nie mahu z-za hetaha CT, nakolki jano adpaviadaje tamu ŭzroŭniu, što nam patrebny pry adbory najlepšych u VNU. Ščyra skažu, vielmi pakul ja krytyčna staŭlusia da hetaj arhanizacyi ŭstupnych vyprabavańniaŭ našych maładych ludziej. Ale i ŭ CT, my bačym heta, jość vielmi šmat stanoŭčaha. Voś što rabić na siońnia? Heta apošni hod, kali my pavinny dać adkaz na hetaje pytańnie».
Taksama Łukašenka rastłumačyŭ, čamu zaprasiŭ rektara BDU i dekana bijałahičnaha fakulteta:
«My pasprabavali (vy taksama zajmalisia hetym śpiecyfičnym mietadam, nie budziem pakul paznačać heta) adabrać chłopcaŭ samych lepšych dla taho, kab jany mahli zajmacca adpaviednymi navukami. Pierš za ŭsio bijałahičnymi, źviazanymi z achovaj zdaroŭja, navukaj, inšymi raspracoŭkami.
My pasprabavali inšyja mietady. Naturalna, heta nievialikaja kolkaść ludziej. I ja pierakanany, što tam adabrany lepšyja.
Tamu što ŭsio-taki da adboru brali tych, chto na alimpijadach ŭžo pieramahaŭ. Heta chłopcy ŭžo prasunutyja. Ich hałoŭnaje nie stracić dla krainy. Ale voś užo sutyknulisia ź pieršym vopytam».
VIP-student i fokus na VNU
Jakija vysnovy možna zrabić z usiaho hetaha?
Pa-pieršaje, cikavaść Łukašenki da biełaruskaj školnaj adukacyi ciapier źmienšycca, kali nie źniknie ŭvohule.
A voś univiersitetam i instytutam — padrychtavacca.
Druhoje. Łukašenka, padobna, ŭpieršyniu sapraŭdy hłyboka sutyknuŭsia z tym, što takoje biełaruskaje CT — i jamu nie spadabałasia. Tamu ciapier jon zahadaŭ prydumać niejki kančatkovy farmat vypusknych ekzamienaŭ, kab u nastupnym hodzie jaho prezientavać. Bolš viartacca da hetaj temy Łukašenka nie źbirajecca. Ale z vypuskam Mikałaja novy farmat ekzamienaŭ užo nie budzie nastolki cikavy Łukašenku, tamu budučym abituryjentam pryjdziecca doŭhi čas žyć z tym, što prydumajuć ciapier.
Pa-treciaje, vyhladaje, što Mikałaj Łukašenka budzie vučycca ŭ BDU, na bijałahičnym fakultecie. Śpiecyjalnaść nieviadomaja, ale heta budzie źviazana ź bijałohijaj i miedycynaj. Mahčyma heta budzie niešta z troch śpiecyjalnaściaŭ: bijachimija, bijatechnałohija, mikrabijałohija.
Apošni momant — adpuścić syna vučycca ŭ ahulnuju hrupu Łukašenka ŭsio ž baicca. Jon nieadnarazova nahadvaŭ, što ŭ krainie jašče niespakojna, nie ŭsich «zdradnikaŭ» zadavili. Pra heta śviedčać i biaskoncyja štodzionnyja zatrymańni biełarusaŭ.
Tamu dla Mikałaja Łukašenki mohuć stvaryć niejki VIP-farmat, nievialikuju hrupu tych «chłopcaŭ samych lepšych», pra jakich kazaŭ jaho baćka, siarod jakich junak budzie spakojna i ŭ biaśpiecy «zajmacca adpaviednymi navukami».
P.S. Kanał «MatolkoPomohi» paviedamlaje, što ŭ BDU pravodziać terminovy ramont pamiaškańniaŭ, abnaŭlajuć prahramy i mietadyčnyja dapamožniki.
«Akramia taho, śpiecyjalna pad Mikałaja, u supracoŭnictvie z kitajskim univiersitetam adkryli novuju śpiecyjalnaść. Razmova idzie ab vyvučeńni bijatechnałohij pa kitajskaj prahramie, — piša kanał. — Jaho hrupa budzie da 10 čałaviek, a ŭ kastynhu adnahrupnikaŭ prymała ŭdzieł navat hałoŭny doktar Respublikanskaha miedycynskaha centra Kiraŭnictva spravami prezidenta Iryna Abielskaja i ministr adukacyi RB Andrej Ivaniec. Zrazumieła, pa słovach krynic, byŭ kastynh i vykładčykaŭ».
Łukašenka: Chto tam u Rasii viakaje na šmatviektarnaść Biełarusi i vyzvaleńnie palitviaźniaŭ?6
Kamientary