Jadzierny šantaž — hałoŭnaja vysnova z sustrečy Pucina i Łukašenki. «I voś tut rola Biełarusi vielmi vialikaja»

Usie ŭžo amal pryzvyčailisia, što pieramovy Łukašenki z Pucinym adbyvajucca nie radziej, čym raz na miesiac. Tym nie mienš, ciapierašniaja, šostaja z pačatku hodu sustreča vyhladaje trochi niezvyčajnaj pavodle niekalkich čyńnikaŭ.

Pa-pieršaje, usio ž častata takich samitaŭ vyklikaje peŭnaje ździŭleńnie. Choć zbolšaha heta možna patłumačyć.

Tut i patreba va ŭzajemnym psichałahičnym padsiłkavańni dla lidaraŭ krain, jakija apynulisia ŭ mižnarodnaj izalacyi. Asabliva na tle toj dypłamatyčnaj poŭchi, jakuju atrymaŭ Pucin ad prezidenta Kazachstana Kasyma Žamarta Takajeva na Sankt-Pieciarburskim ekanamičnym forumie.

I nieabchodnaść demanstracyi ŭłasnamu elektaratu taho, što ŭ vonkavaj palitycy ŭsio narmalna, jašče zastalisia nadziejnyja sajuźniki.

Druhi momant. Ciapierašniaja sustreča nibyta anansavałasia. 13 červienia pra jaje havaryŭ ambasadar Rasii ŭ Biełarusi Barys Hryzłoŭ, 17 červienia pra budučyja pieramovy z Pucinym paviedamiŭ sam Łukašenka. Ale, pavodle papiaredniaj infarmacyi, sustreča pavinna była adbycca ŭ Hrodnie. Pucin musiŭ pryjechać na štohadovy Forum rehijonaŭ Biełarusi i Rasii 30 červienia − 1 lipienia. Pra hetyja płany havaryŭ premjer-ministr RF Michaił Mišuścin.

Tamu vizit Łukašenki ŭ Rasiju za piać dzion da mierkavanaj pajezdki prezidenta RF u Biełaruś vyhladaŭ niečakanym. Ciapier vyśvietliłasia, što Pucin u Hrodna nie pajedzie.

Pa-treciaje, Łukašenka prylacieŭ u Rasiju na niekalki dzion. Telehram-kanał «Puł Piervoho» paviedamiŭ, što kiraŭniki płanavali 23 i 24 červienia pravieści niefarmalnyja pieramovy ŭ padmaskoŭnaj rezidencyi Pucina Zavidava, a potym pajechać u Sankt-Pieciarburh, dzie ŭžo 25 červienia projdzie ich rabočaja sustreča. I pavodle taho ž biełaruskaha telehram-kanała, u Zavidavie jany «niefarmalna razmaŭlali». Paćviardžeńnia hetaj infarmacyi z rasijskaha boku niama.

Tamu pieršaje pytańnie: ci takaja sustreča ŭ padmaskoŭnaj rezidencyi była? Kali tak, to čamu niama pra jaje nijakaj infarmacyi? I ŭ takim vypadku, navošta lacieć jašče ŭ Sankt-Piacierburh i znoŭ vieści pieramovy? Usio heta vyhladaje davoli zahadkava.

Jašče adna zahadka. Napiaredadni pieramovaŭ u Sankt-Piacierburhu rasijskaja avijacyja ŭpieršyniu z pačatku vajny naniesła ŭdar pa Ukrainie rakietami niepasredna z terytoryi Biełarusi.

Niejkaha značnaha vajennaha sensu ŭ abstrele Kijeŭskaj, Čarnihaŭskaj i Sumskaj abłaściej nie było. Tut chutčej sens palityčny. Vyhladaje jak srodak cisku na Łukašenku z boku Kramla, sproba kančatkova zapeckać jaho, skampramietavać. Kab zajavy kštałtu «Biełaruś u vajnie nie ŭdzielničaje» vyhladali niedarečna.

Samaje vidavočnaje tłumačeńnie hetych terminovych pieramovaŭ palahaje ŭ tym, što jany źviazanyja z kryzisam u adnosinach Rasii ź Litvoj. Rašeńnie Vilni abmiežavać rasijski tranzit u Kalininhradskuju vobłaść na padstavie sankcyj ES vyklikała mocnuju niehatyŭnuju reakcyju Maskvy. Kreml paabiacaŭ žorstki adkaz. I voś tut rola Biełarusi vielmi vialikaja.

Kali havorka idzie pra vajenny adkaz — pra mahčymy praryŭ «Suvałkaŭskaha kalidora» (pra što kažuć usie ekśpierty), dyk biez udziełu Biełarusi hetaja apieracyja niemahčymaja. Bo taki praryŭ budzie mieć pośpiech tolki ŭ vypadku, kali jon ažyćciavicca z dvuch bakoŭ: z terytoryi Kalininhradskaj vobłaści i z terytoryi Biełarusi. Pryčym, pytańnie pra zadziejničańnie biełaruskaha vojska ŭ hetaj apieracyi — druhasnaje. U lubym vypadku rasijskija vojski buduć vymušanyja vykarystoŭvać biełaruskuju terytoryju. I kali napad na Ukrainu možna było ažyćciavić i biez zadziejničańnia Biełarusi, to vajennaja akcyja suprać Litvy mahčymaja tolki z udziełam Biełarusi.

To-bok kryzis vakoł Litvy rezka pavyšaje hieapalityčnuju i vajskovuju rolu Biełarusi. Adpaviedna, uzrastajuć i ryzyki.

Vyhladaje, što pakul žorstki adkaz Rasii Litvie i NATO ładzicca ŭ farmacie jadziernaha šantažu. I Biełaruś tut vystupaje na pieršy płan. Publicy byŭ pakazany dobra razyhrany śpiektakl.

Apošnim časam stała niadobraj tradycyjaj, što hałoŭnym zastrelščykam i inicyjataram ahresiŭnaj antyzachodniaj i antyŭkrainskaj rytoryki zjaŭlajecca Łukašenka. I hetym razam jon paskardziŭsia Pucinu, što samaloty ZŠA i NATO «trenirujucca nieści jadziernyja bojehałoŭki». I paprasiŭ lusterkavaha adkazu ŭ vyhladzie daabstalavańnia biełaruskich samalotaŭ Su-25, kab jany byli zdolnyja nieści jadziernyja zarady.

Pucin paabiacaŭ heta zrabić, a taksama adznačyŭ, što Rasija «ŭ najbližejšyja miesiacy» pieradaść Biełarusi rakietnyja kompleksy «Iskander-M», jakija mohuć być abstalavanyja jadziernymi bojehałoŭkami.

Takim čynam, upieršyniu Pucin prystrašyŭ Zachad raźmiaščeńniem u Biełarusi jadziernaj zbroi. I kali razumieć słovy dvuch lidaraŭ litaralna, to ŭ vypadku realizacyi hetaj idei, Biełaruś stanovicca jadziernaj dziaržavaj. Bo, pavodle słovaŭ Pucina, jadziernuju zbroju atrymajuć mienavita biełaruskija uzbrojenyja siły.

Zrazumieła, čamu Łukašenka ŭsprymaje hetyja prapanovy ź vialikim entuzijazmam. Jon maryŭ pra heta daŭno. Šantaž Zachada jadziernaj zbrojaj — heta značna macniej, čym šantaž mihrantami.

Vidavočna, ad pahrozy da realizacyi — vialikaja dystancyja. Tym bolš, što ŭ Kramli šmat razoŭ padumajuć, ci varta davać Łukašenku jadziernuju zbroju.

Tym nie mienš, zrobleny jašče adzin krok da vajennaj eskałacyi. Pucin u svaim firmovym styli idzie pa šlachu pavyšeńnia stavak. U raźliku na toje, što Zachad spałochajecca.

• 26
• 0
• 10
• 15
• 5
• 15
• 110
• 0