Za II kvartał 2022 hoda ŭ Biełarusi vyrasła siaredniaja suma ŭkładaŭ jak u nacyjanalnaj, tak i ŭ zamiežnych valutach. «Naša Niva» raźbirałasia, na jakija pracentnyja staŭki mohuć raźličvać układčyki, a taksama ŭ jakoj valucie lepiej adkryvać układ, kab ryzyki byli minimalnyja.
Pačniem z taho, što bankaŭskija ŭkłady ŭ niezaležnaści ad valuty padzialajucca na adzyŭnyja i biezadzyŭnyja. Najbolš vyhadnymi z punktu hledžańnia pracentnaj staŭki źjaŭlajucca biezadzyŭnyja ŭkłady. Raspłata za pavialičany pracent — bolš vysokija ryzyki praź niemahčymaść zabrać hrošy raniej za vyznačany termin.
Što pa staŭkach?
Kali kazać pra adzyŭnyja ŭkłady, to možna raźličvać na kala 2% hadavych u valucie. U rublovych układach staŭka kala 10%, kali havorka idzie pra karotkaterminovyja prahramy (da 6 miesiacaŭ).
Kudy bolšyja staŭki pa biezadzyŭnych układach. Tak, naprykład, u Biełarusbanku možna adkryć karotkaterminovy biezadzyŭny ŭkład u dalarach terminam na try miesiacy pad 5%, ci pad 4,3% u jeŭra. Kali razhladać doŭhaterminovyja ŭkłady (2-3 hady), to staŭki u dalarach uzrastajuć da 7%. Tym nie mienš, z ulikam biahučaj situacyi, ekśpierty nie rajać układać źbieražeńni ŭ doŭhaterminovyja prahramy.
Ekśpiert BEROC Anastasija Łuzhina adznačaje, što ciapier stała bolš ryzyk, čym heta było ŭ pačatku hoda. Ale i staŭki pa ŭkładach značna vyšejšyja, čym byli ŭ kancy minułaha — pačatku hetaha hoda.
«My žyviem u niestabilny čas, tamu ciapier sapraŭdy majucca pavyšanyja ryzyki trapić u situacyju, kali banki ŭvodziać abmiežavańni na źniaćcie valuty. Heta nie aznačaje, što vam nie viernuć hrošy ci jany zusim kudyści źniknuć, prosta treba być hatovymi, što praces viartańnia moža raściahnucca pa časie. Z takimi składanaściami ŭkładčyki ŭžo sutykalisia ŭ sakaviku hetaha hoda. Banki adčuli, što idzie rezki adtok valuty, i ŭviali abmiežavańni. Tym nie mienš, u nas dziaržava harantuje 100% viartańnia ŭkładaŭ i hetyja harantyi pracujuć», — kaža ekanamist.
Što tyčycca vybaru pamiž adzyŭnymi i biezadzyŭnymi ŭkładami, to Łuzhina raić pryhladacca da karotkaterminovych biezadzyŭnych układaŭ.
«Lepš za ŭsio razhladać varyjanty terminam na 3-4 miesiacy. Heta dosyć karotki pieryjad, ale ŭ toj ža čas pracentnyja staŭki pa biezadzyŭnych układach u niekalki razoŭ vyšejšyja, čym u vypadku z adzyŭnymi».
Z ulikam biahučaj situacyi adkryvać biezadzyŭnyja ŭkłady na bolš praciahłyja terminy ekanamist nie rekamienduje. I nahadvaje, što kali havorka idzie pra biezadzyŭny ŭkład, to čałaviek pavinien razumieć, što na praciahu peŭnaha pieryjadu jamu dakładna nie spatrebiacca hetyja srodki.
Najbolš stabilnaj vyhladaje amierykanskaja valuta
Što da vybaru valuty ŭkładu, to ekśpiertka raić pa mahčymaści dyviersifikavać svaje źbieražeńni.
«Kali ŭ vas užo majucca źbieražeńni ŭ roznych valutach, to možna adkryć niekalki ŭkładaŭ. U toj ža čas, kali ŭ vas, naprykład, majucca jeŭra, a vy chočacie pamianiać ich na dalary ci naadvarot, kab pakłaści hrošy pad najbolš vyhadny pracent, to rabić hetaha dakładna nie varta. Roźnica ŭ pracentach stavak pamiž hetymi valutami adnaznačna budzie mienšaj, čym tyja straty, jakija vy paniesiacie, prajšoŭšy praz dvajnoje kanviertavańnie. Kali ž vašy źbieražeńni zachoŭvajucca ŭ nacyjanalnaj valucie, to možna mianiać ich na dalar ci jeŭra.
Na dadzienym etapie najbolš stabilna vyhladaje amierykanskaja valuta, ale vybar pamiž valutami treba rabić z raźliku taho, što vy potym źbirajeciesia rabić z hetymi źbieražeńniami.
Kali vy źmianiajecie rubli na dalary, a potym płanujecie adpravicca na hetyja hrošy ŭ adpačynak u Jeŭropu ci, naprykład, zachočacie tam kupić aŭtamabil, to łahičniej adrazu mianiać rubli na jeŭra»,— ličyć ekśpiert.
Što rabić z rublami?
Nacyjanalnaja valuta choć i vyhladaje dosyć stabilna, devalvacyjnyja ryzyki pa-raniejšamu zastajucca vysokimi.
«Staŭki na biezadzyŭnyja ŭkłady ŭ rublach značna vyšejšyja, čym u valucie, ale tut treba ŭličvać jak vysokuju inflacyju ŭnutry krainy, tak i devalvacyjnyja ryzyki. Na biahučy momant rubiel trymajecca davoli ŭpeŭniena, ale heta nie značyć, što praz try miesiacy jaho kurs nie źmienicca tak, što pieršapačatkova vysoki pracent pa ŭkładach stracić sens. U toj ža čas, kali rubiel za pieryjad dziejańnia ŭkładu zachavaje svaje pazicyi, to takoje ŭkładańnie budzie vyhadnym, ale prahnazavać, što pa vyniku pryniasie vam układ u rublach, — niemahčyma», — ličyć Anastasija Łuzhina.
«Naša Niva» — bastyjon biełaruščyny
PADTRYMAĆMinčanka pakinuła stanoŭčy vodhuk na sumku — i raptam vykryła zdradu čužoha muža19
Kamientary