Dzie ŭ Jeŭropie navahodnija jełki pretendujuć na zvańnie samaj vysokaj?
Kaladnaja i navahodniaja jełki — heta miesca pryciahnieńnia dla ŭsich, chto žadaje zaradzicca śviatočnym nastrojem. Tamu mnohija krainy i harady imknucca zrabić hety simvał samym jarkim i zapaminalnym. Naprykład, u nadychodziačym hodzie, pa śćviardžeńni ŚMI, «samuju vialikuju ŭ Jeŭropie» jełku pastavili ŭ našym Viciebsku. Telegraf.news pahladzieŭ, jakija drevy staviać inšyja krainy. Chto jašče moža pretendavać na zvańnie «samaj vysokaj jełki ŭ Jeŭropie»?
U kaladny i navahodni pieryjad samaja vialikaja jełka robicca sapraŭdnaj słavutaściu, pahladzieć na jakuju ściakajucca nie tolki žychary samich haradoŭ, ale i turysty. Tamu mnohija krainy i harady śpiašajucca ździvić maštabami i ładziać sapraŭdny pijar pierad ustalavańniem svajoj jełki.
Na zvańnie samaj vysokaj jełki Jeŭropy pretendujuć jak minimum 7 krain. Nakolki ŭ ich vysokija jełki?
Samyja vysokija jełki Jeŭropy
Mabyć, adkryvajučy hety rejtynh, varta adrazu skazać, što kaladnyja jełki, jakija mierajucca svajoj vyšynioj, časta nie drevy ŭ poŭnym sensie hetaha słova. Ciapier pieravažnaja bolšaść takich pryhažuń stvarajecca šlacham karkasnaj zborki ź jalinak mienšaha pamieru abo štučnych halin.
Tak, naprykład, samaj vysokaj jełkaj, ustalavanaj u Biełarusi, budzie jełka ź Viciebska. Jana dasiahaje vyšyni 33,5 mietra, i ŭ siužecie ANT jaje nazvali «samaj vialikaj navahodniaj jełkaj u Jeŭropie, sabranaj z sapraŭdnych dreŭ».
Pavodle infarmacyi ŚMI, dla jaje stvareńnia vykarystoŭvali sabranyja pa lashasach maleńkija jalinki vyšynioj ad adnaho mietra, a mantažom zajmalisia vosiem śpiecyjalistaŭ. Pa stanie na 1 śniežnia jołka sabranaja i čakaje upryhožańniaŭ.
Jak by tam ni było, u Jeŭropie poŭna inšych hihanckich jełak, siarod jakich jość jak vielizarnyja štučnyja jełki, tak i hihanckija žyvyja, i navat takija, jakija rastuć na płoščy.
Jełka vyšynioj 50 mietraŭ u Partuhalii
Pryznany rekord pa «samaj vysokaj kaladnaj jełcy ŭ Jeŭropie» z kanstrukcyjaj vyšynioj 76 mietraŭ byŭ pastaŭleny Partuhalijaj u 2007 hodzie.
Viadoma, varta adrazu zaŭvažyć, što jełka była całkam štučnaj. Ale na samaj spravie heta nie tak užo i drenna, uličvajučy, što na stvareńnie takoha zbudavańnia z sapraŭdnych jalinak pryjšłosia b achviaravać sotniami dreŭ.
Adnak pamier jełki ŭ Lisabonie kožny hod mianiajecca, i ŭ hetym hodzie jon skłaŭ «usiaho» 30 mietraŭ.
Tym nie mienš, Partuhalija ŭžo paśpieła adrapartavać pra ŭstalavańnie jełki vyšynioj «bolš za 50 mietraŭ» u svaim paŭnočnym rehijonie, u horadzie Portu.
Havorka taksama idzie pra štučnuju jełku. U nadychodziačym hodzie mienavita jana pryznanaja «samaj vysokaj u krainie».
Jełka vyšynioj 57 mietraŭ u Ispanii
U Ispanii sioleta vyliłasia sapraŭdnaja pijar-vajna za zvańnie samaj vysokaj jołki krainy. Zvyčajna hałoŭnaje supiernictva nazirajecca ŭ haradach Viha, Badałona i Kartes. Adnak u hetym hodzie ich abyšła Hranada, jakaja vyrašyła ŭstalavać jełku vyšynioj 57 mietraŭ.
Cikava, što «samaja vysokaja jełka Ispanii» mahła być i vyšejšaj, bo ŭłady Kantabryi pieršapačatkova mieli namier uźvieści navahodni simvał vyšynioj 65 mietraŭ. Ale paśla jany admovilisia ad hetaj zadumy.
Jełka vyšynioj 45 mietraŭ u Hiermanii
Pra «samuju vialikuju jełku ŭ śviecie» lubiać zajaŭlać ŚMI ŭ Niamieččynie. Tradycyjna na praciahu ŭžo bolš čym 25 hadoŭ jaje staviać u Dortmundzie. Jełka dasiahaje ŭ vyšyniu 45 mietraŭ, što vyšej, čym 11-paviarchovy dom.
Havorka i tut idzie pra kanstrukcyju, a nie pra całkam naturalnaje dreva. Tym nie mienš, simvał Kaladaŭ tut zaŭsiody stvarajuć z sapraŭdnych nievialikich narviežskich jalinak, śpiecyjalna vyraščanych dla hetaj mety ŭ hadavalniku. Hety hod nie staŭ vyklučeńniem.
Dortmundskaja jełka ŭžo ŭpryhožvaje haradski kirmaš.
Samaje vysokaje navahodniaje dreva raście ŭ Vialikabrytanii
Na zvańnie «samaj vysokaj niazrezanaj kaladnaj jełki» pretenduje i 160-hadovaja siekvoja, jakaja dasiahaje ŭ vyšyniu 42 mietraŭ i ŭpryhožanaja amal kiłamietrovaj hirlandaj ź mihatlivymi ahniami.
Dreva raście ŭ Nortumbierlendzie (cyrymanijalnaje hrafstva ŭ paŭnočna-ŭschodniaj Anhlii, na miažy z Šatłandyjaj), pobač z asabniakom XIX stahodździa na viaršyni skalistaha vystupu. Jaho vybrali dla ŭpryhožvańnia z-za pryhožaj formy i ŭdałaha raźmiaščeńnia.
Adno z žyvych dreŭ płanujuć zrezać i ŭstalavać u Łondanie. Viadoma, što jano budzie dasiahać 20 mietraŭ u vyšyniu.
Samaja vysokaja žyvaja jełka Francyi
Kožny hod na płoščy Klebier u Strasburhu staviać «Vialikuju Kaladnuju jełku Strasburha», jakaja ŭ hetym hodzie dasiahnuła ŭ vyšyniu 31 mietra (u minułym hodzie — 27 mietraŭ). Jełka sapraŭdnaja, jaje pastavili jašče ŭ kastryčniku.
Darečy, pavodle knihi rekordaŭ Hiniesa «samaj vysokaj zrezanaj kaladnaj jełkaj u śviecie» była pichta Duhłasa (Pseudotsga menziesii), jakaja dasiahała ŭ vyšyniu 67 mietraŭ i była ŭstalavanaja ŭ handlovym centry Northgate u amierykanskim Sietle ŭ śniežni 1950 hoda.
Samaja vysokaja «jełka» Italii
Vielmi sprečnaja, ale adnaznačna vartaja ŭvahi «jełka» znachodzicca ŭ Italii. Adnak heta nie zusim dreva, a hihanckaje śvietłavoje šou ŭ formie jełki, jakoje raźmiaščajecca na hary Indžyna ŭ horadzie Hubia.
Instalacyja vyšynioj 750 i šyrynioj 450 mietraŭ zapalvajecca štohod, pačynajučy z 1991 hoda, i nosić sprečny tytuł «samaj vialikaj jełki ŭ śviecie».
A što ŭ susiedziaŭ?
Nie prachodziać śviaty biez uražlivych jełak na Kalady i Novy hod i ŭ krain — susiedak Biełarusi. Voś čym buduć ździŭlać žycharoŭ sioleta.
Hałoŭnaja jełka Rasii
Hałoŭnuju jełku Rasii tradycyjna staviać u Maskvie kala ścien Kramla. U listapadzie stała viadoma, što jaje ŭžo vybrali. Heta budzie jełka vyšynioj 30 mietraŭ, i heta vyšej za letašniuju na 5 mietraŭ. Ustalavać jaje pavinny ŭ 20-ch čysłach śniežnia.
Ci budzie hetaja jełka samaj vysokaj, nieviadoma. U apošnija hady ŭ Rasii na zvańnie «samaj vysokaj» hanaravałasia nie hałoŭnaja jełka krainy. Naprykład, u minułyja hady joju čaściej za ŭsio nazyvali 55-mietrovuju jełku ŭ Krasnajarsku. Dreva štučnaje, ale jamu taksama časta prypisvali zvańnie «samaj vysokaj jełki Jeŭrazii». Voś tak jana vyhladała letaś.
Hałoŭnaja jełka Litvy
U susiedniaj Litvie ŭžo prajšła cyrymonija zapalvańnia hałoŭnaj jołki krainy, i jana sapraŭdnaja. U hetym kaladnym siezonie dreva ŭražvaje nie stolki pamieram (15 mietraŭ), kolki canoj. Pavodle infarmacyi ź litoŭskich ŚMI, jełka ŭ Vilni atrymała tytuł «samaj darahoj jełki Litvy» i abyšłasia ŭ 118,7 tysiač jeŭra.
Hałoŭnaja jełka Łatvii
U Łatvii hałoŭnych jełak pastavili adrazu dźvie. Sa słoŭ mera Ryhi, abiedźvie sapraŭdnyja i vyšynioj da 17 mietraŭ. Jełki ŭpryhožyli Domskuju i Ratušnuju płoščy.
Hałoŭnaja jełka Ukrainy
U Kijevie hałoŭnuju jełku paabiacali pastavić na Safijskaj płoščy da 6 śniežnia — da Śviatoha Mikałaja. Viadoma, što jaje vyšynia składzie prykładna 12-15 mietraŭ, i jana budzie ŭpryhožanaja ŭ bieła-błakitnych tanach.
Hałoŭnaja jełka Polščy
U Polščy ŭstalavańnie kaladnych jełak jašče ŭ pracesie, ale viadoma, što Varšavu ŭpryhožyć 27-mietrovaje dreva, jakoje składajecca ź niekalkich elemientaŭ.
Zapalić ahni na hałoŭnaj jełcy Polščy tradycyjna płanujuć u pačatku śniežnia. Pavodle źviestak polskich ŚMI, jaje, jak i Zamkavuju płošču, płanujuć upryhožyć u retra-styli pieryjadu 1950-1960 hadoŭ.
Sudziać hiendyrektara BiełAZa. Pahražaje da 15 hadoŭ9
Kamientary