«U Minsku ŭ prodažy zastałosia dva VW Polo i trochi «Ład» Granta. Novych pastavak nie čakajecca». Adhadajcie ceny
Novych aŭto ŭ krainie zastałosia na try dni. Prykładna takimi słovami možna apisać situacyju ŭ biełaruskich aŭtasałonach. «Naša Niva» pahladzieła, jakija novyja mašyny jašče zastalisia ŭ prodažy.
Pa vynikach minułaha hoda pieršaje miesca pa kolkaści pradadzienych novych aŭto zajmała rasijskaja «Łada». Letaś biełaruskija dylery realizavali 11 669 aŭto hetaj marki va ŭmovach kali mašyny jeŭrapiejskaj vytvorčaści našmat daražejšyja za košt mytaŭ Mytnaha sajuza.
«Łady» ŭ pieršuju čarhu vabili nievysokimi cenami, ale ad ich zastalisia tolki ŭspaminy.
Samaja tannaja «Łada», jakuju ciapier možna nabyć u Biełarusi, kaštuje 39 500 rubloŭ, ci kala 15 600$. Stolki dylery prosiać za «Łada Hranta» z aŭtamatyčnaj karobkaj pieradač u kamplektacyi Comfort. Na hety momant zamović «Hrantu» ŭ niejkaj inšaj kamplektacyi niemahčyma.
Dla paraŭnańnia, jašče ŭ 2018 hodzie samaja darahaja «Hranta» kaštavała 21 450 rublej, što pa tahačasnym kursie składała kala 10 200 dalaraŭ. U toj ža čas samaja tannaja «Łada» była dasiažna pa cenach ad 15 tysiač rubloŭ, abo 7200$.
Pry hetym varta adznačyć, što samaja «pustaja» Granta davajennaha ŭzoru była ŭ lepšaj kamplektacyi, čym «antysankcyjnaja» Lada, jakija ź pierabojami vypuskajuć zaraz. Tak, naprykład, taja ž Granta zastałasia biez padušak biaśpieki, ABS i elektryčnych škłopadjomnikaŭ. Tym nie mienš, na «antysankcyjnuju» Granta, jakuju faktyčna niemahčyma zamović, na sajtach dyleraŭ staić cana ŭ 32 240 rubloŭ, heta kala 12 750 dalaraŭ.
Vynikaje, što za niekalki hod samaja tannaja «Łada» padaražeła amal u dva razy, zhubiŭšy pry hetym častku opcyj.
«Hranta» była samaj dasiažnaj mašynaj, ale nie samaj papularnaj. Najbolšym popytam siarod biełarusaŭ karystałasia Lada Vesta. Z pradadzienych 11 669 «Ład» 4 803 adzinki prychodziłasia mienavita na hetuju madel.
U 2018 hodzie Vesta pradavałasia pa cenach ad 19 610 da 26 500 rubloŭ (ci kala 9400—12600 dalaraŭ). Ciapier ža dylery prapanujuć hetuju madel pa cenach ad 45 900 da 48 300 rubloŭ (18200—19000$). Ale ceny hetyja vielmi ŭmoŭnyja, bo takich aŭto ŭ najaŭnaści ŭsio adno niama.
Zatoje u biełaruskich dyleraŭ zastałosia jašče niekalki Lada XRAY. Novyja XRAY zamović niemahčyma, bo jašče na pačatku vieraśnia zavod zajaviŭ, što nie płanuje pierazapuskać vytvorčaść hetaj madeli.
«My nie płanujem adnaŭlać vytvorčaść dadzienaha aŭtamabila, bo zanadta vialiki kamplekt aŭtakampanientaŭ, jaki vykarystoŭvajecca ŭ im, zabłakavany siońnia dla pastavak», — kamientavaŭ spynieńnie vytvorčaści kiraŭnik kampanii Maksim Sakałoŭ.
Reštki XRAY pradajuć pa cenach ad 47 tysiač rubloŭ (kala 18 550$), stolki kaštuje aŭto biez kandycyjaniera. Za aŭto z kandycyjanieram daviadziecca vykłaści 49 tysiač (kala 19 300$). Niahledziačy na niemałuju canu, u hetych aŭto navat nie budzie štatnaj aŭdyjasistemy.
Dla samych zamožnych amataraŭ «Łady» dasiažna madel Largus. Ceny ad 60 000 rubleŭ, heta amal 24 tysiačy dalaraŭ.
Tradycyjna vialikim popytam siarod biełarusaŭ karystalisia aŭtamabili marki VW. Samaj pradavanaj madellu byŭ VW Polo rasijskaj zborki.
Na hety momant hetyja aŭtamabili amal skončylisia. U Minsku zastałosia tolki dva VW Polo pa canie 60 tysiač rubloŭ, ci amal 24 tysiačy dalaraŭ. Dla paraŭnańnia, da vajny takija aŭto pradavalisia pa cenach kala 15 000 dalaraŭ.
Jak i ŭ vypadku z «Ładaj» zamović novyja Polo niemahčyma, bo zavod VW u RF spyniŭ svaju dziejnaść. Pradaŭcy novych aŭto, jakija handlujuć mašynami rasijskaj vytvorčaści, pryznajuć, što novych pastavak aŭto niama i nie čakajecca. Prynamsi da kanca biahučaha hoda i navat pačatku nastupnaha.
Z-za taho, što niama novych aŭto, dylery vymušany zasiarodžvacca na pieraprodažy b/u. Taki trend nazirajecca ŭ bolšaści ź ich. Zamiest novych aŭto jany ŭsio čaściej prapanujuć klijentam mašyny z prabieham.
Čytajcie taksama: «Kažuć pra 10-15 tysiač dalaraŭ, a padstaŭlajuć na 50-100». Šeryja imparciory aŭto, ilhotniki i amal nijakaj harantyi
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary