Ludzi hoda pa viersii «Našaj Nivy» — hieroi, jakija chacieli spynić vajnu. Što pra ich viadoma?

Adrazu paśla napadu Rasii na Ukrainu ŭ Biełarusi stychijna ŭźnik antyvajenny ruch. Jaho simvałam stali h. zv. «rejkavyja partyzany», jakija ładzili akty sabatažu na čyhuncy, kab zapavolić ruch rasijskaj techniki. Praŭda, sam puščany žurnalistami vyraz «rejkavyja partyzany» niedakładny. Rejkavyja partyzany Druhoj suśvietnaj spuskali pad adchon ciahniki, u vyniku hinuli sotni ludziej, nie tolki akupanty, ale i biełarusy-čyhunačniki.

Ludzi, jakija sprabavali spynić Treciuju suśvietnuju, abmiažoŭvalisia akcyjami, pry jakich nichto nie moh zahinuć. Jany spadziavalisia, adnak, što i takoha sabatažu chopić, kab źmianić chod historyi.

U noč z 27 na 28 sakavika byŭ ździejśnieny padpał relejnaj šafy niepadalok ad stancyi Asipovičy. Tady kanał «Supolnaść čyhunačnikaŭ Biełarusi» paviedamiŭ pra stralaninu na stancyi — ale nichto nie paciarpieŭ i partyzanam udałosia ŭciačy. Zatrymali ich praz dva dni ŭžo ŭ rodnym Babrujsku.

Zatrymanymi akazalisia siabry dziacinstva Dźmitryj Klimaŭ, Uładzimir Aŭramcaŭ i Jaŭhien Minkievič. Jany šmat u čym padobnyja: usim na toj momant pa 28 hadoŭ, usie žyli i pracavali ŭ Babrujsku, nie sudzimyja. U dvuch zatrymanych jość žonki i dzieci — dačce Dźmitryja Klimava ciapier piać hadoŭ, a synu Jaŭhiena Minkieviča ŭvosień spoŭniŭsia hod. Dvoje zatrymanych paśpieli papracavać u strukturach Ministerstva ŭnutranych spraŭ — što, darečy, pakazvaje nam, nakolki roznyja ludzi nosiać ci nasili ŭ našaj krainie pahony.

Paśla KDB zładziŭ apieratyŭnuju hulniu, kab zatrymać pravadnika, jakaja pavinna była vyvieści ich u Litvu. Heta była 33-hadovaja Alesia Bunievič, jakoj u vyniku prysudzili 3,5 hoda turmy.

Dźmitryj Klimaŭ

Pavialičyć

Dźmitryju Klimavu 29 hadoŭ, jon naradziŭsia i, zdajecca, amal usio žyćcio pražyŭ u Babrujsku. Skončyŭ 26-ju škołu.

Niejki čas mužčyna pracavaŭ u Departamiencie achovy MUS, syšoŭ ź milicyi ŭ zvańni praparščyka.

Apošnija hady Dźmitryj pracavaŭ u taksi. Siarod inšaha, jon byŭ kaardynataram nievialikaj słužby taksi «7204» u Babrujsku, bo mieŭ ułasnyja mašyny. Ale biznes nieŭzabavie prahareŭ i čym mužčyna zarablaŭ dalej — nieviadoma.

Padčas zatrymańnia jamu prastrelili nahu i źbili. U filmie dziaržaŭnych prapahandystaŭ, jaki vyjšaŭ praź miesiac paśla zatrymańnia, vidać, što mužčyna dahetul chodzić ź ciažkaściu. Pra ciapierašni stan mužčyny ničoha nieviadoma.

Pavialičyć

Taksama ŭ filmie ATN mužčyna kaža, što mienavita jon byŭ vykanaŭcam padpału relejnaj šafy. Paśla hetaha jany razam z Aŭramcavym byccam by musili schavać reštki svajho ryštunku (racyi i pryładu dla spusku ešałonaŭ z rejek) i pierajści miažu ź Litvoj. Ich zatrymali ŭ momant, kali jany jechali rabić «schovanku».

Uładzimir Aŭramcaŭ

Pavialičyć

Uładzimiru 28 hadoŭ. Jon advučyŭsia spačatku ŭ vučelni alimpijskaha reziervu, a paśla pastupiŭ u Biełaruski dziaržaŭny ahrarna-techničny ŭniviersitet, dzie vučyŭsia z 2013 pa 2017 hady. Adziny z troch jon jašče nie žanaty. Dziaŭčyna, jakaja viedaje jaho ź dziacinstva, raskazvała:

«U škole jon zaŭsiody sportam zajmaŭsia, nikoli nie byŭ častkaj kampanij takich, jakija siadzieli dy na łaŭcy piva cadzili. Dobra vučyŭsia, sportam zajmaŭsia. Karaciej, mieŭ reputacyju stanoŭčaha i dobraha chłopca».

Sport zaŭždy byŭ chobi Aŭramcava — i staŭ jahonaj karjeraj. Jon zajmajecca hreplinham (vid źmiešanaj baraćby) i navat vystupaŭ na čempijanacie Biełarusi, dzie ŭ minułym hodzie zaniaŭ pieršaje miesca ŭ katehoryi «da 92 kiłahramaŭ».

Apošnim miescam pracy mužčyny staŭ fitnes-centr «Jeva».

Taksama jon pracavaŭ u 35-j škole ŭ Babrujsku, dzie vykładaŭ vučniam 1-ha, 3-ha i 6-ha kłasaŭ fizičnuju kulturu. Jašče adna znajomaja raspaviadała «Miedyjazonie» pra jahony dośvied:

«Jamu cikava zajmacca z małymi. Ale ideałohija i praca dziela ptušački vielmi rasčaravali. Skardziŭsia, što niemahčyma padtrymlivać u dzieciach entuzijazm, kali ich adpraŭlajuć na spabornictvy, da jakich jany nie rychtavalisia i adnaznačna prajhrali b, tolki dziela taho, kab namieśnik dyrektara pastaviła hałačku ab udziele ŭ mierapryjemstvie».

Baćka mužčyny, Alaksandr Aŭramcaŭ — były milicyjant, jaki ŭ 2004 hodzie syšoŭ u adstaŭku ŭ zvańni majora z pasady kiraŭnika adździeła pa baraćbie z ekanamičnymi złačynstvami Babrujskaha RAUS. Cikava, što baćka byŭ aktyvistam miascovaha «kazackaha» ruchu.

Paśla zatrymańnia mužčynu bili, što vidać na kadrach, jakija vykłali partały MUS — u jaho raźbity tvar, i navat u filmie, źniatym praź miesiac, vyrazna bačnyja ślady pabojaŭ.

Jaŭhien Minkievič

Pavialičyć

Chłopcu 28 hadoŭ. Jany razam z Aŭramcavym vučylisia ŭ vučelni alimpijskaha reziervu. Z 2013 hoda mužčyna pajšoŭ pracavać sanitaram u Babrujskuju haradskuju lakarniu chutkaj dapamohi i pastajanna padpracoŭvaŭ kiroŭcam taksi.

Jon ažaniŭsia ŭ studzieni 2020 hoda. U intervju babrujskaj rajoncy para kazała, što jany marać pra dziaciej, Jaŭhien pra dziaŭčynku, a žonka — pra chłopčyka. Za paŭhoda da zatrymańnia ŭ pary naradziŭsia syn.

Na jahonym viasielli adnym z haściej byŭ Dźmitryj Klimaŭ. Mužčyny ŭ 2020 hodzie taksama razam pracavali ŭ słužbie taksi «7204». 

Zhodna ź filmam BT, misija Jaŭhiena była ŭ tym, kab dapamahčy chłopcam dabracca da Hrodna i źbiehčy ŭ Litvu (praŭda, jon mała viedaŭ pra spaleńnie relejnaj šafy i ahułam płany mužčynaŭ). Jaho navat abviaścili ŭ vyšuk praz pošukavy atrad «Fieniks», ale 6 krasavika atradu i siamji śpiecsłužby paviedamili, što jon zatrymany, a nieŭzabavie jahonaje poŭnaje imia apublikavała supołka čyhunačnikaŭ.

Chutčej za ŭsio, Jaŭhiena taksama źbivali pry zatrymańni — siniaki na tvary mužčyny vidać jašče i ŭ filmie prapahandystaŭ.

Praz try dni

U lutym i sakaviku ŭ Biełarusi byli ździejśnieny nie mienš za dvanaccać akcyj sabatažu na čyhuncy i dźvie vialikija kibierataki.

«Kali nielha zabiaśpiečyć biaśpieku vajskovaha ešałona, to rasijskija vojski nie buduć pahadžacca pakidać techniku. Stracić jaje niedzie na padychodzie — heta ryzyka. Taksama zapavolvajecca na niekatory čas ruch ciahnikoŭ. Na adnoj z akcyj błakavali niekatoryja ŭčastki. Haśli ŭsie śviatłafory, patrabavaŭsia čas, kab vyjechali bryhady pa ramoncie, potym patrebien byŭ čas, kab heta ŭsio pieravieści ŭ ručny režym. Prapusknaja zdolnaść katastrafična padaje», — raspaviadali «Našaj Nivie» aktyvisty «Supołki čyhunačnikaŭ Biełarusi».

Za akty sabatažu na čyhuncy abo namier ich ździejśnić zatrymanyja taksama:

Dzianis Dzikun, Dźmitryj Ravič, Aleh Małčanaŭ
— žychary Śvietłahorska, ich zatrymali 4 sakavika 2022 hoda za padpał 28 lutaha na pierahonie Žerdź—Astankavičy relejnaj šafy;

Vital Mielnik, zatrymany pad Barysavam, jamu pry zatrymańni siłaviki prastrelili kalennyja sustavy;

Siarhiej Plaškun i Juryj Sielvič z Mazyra — jany rychtavali akcyju, ale nie paśpieli realizavać;

Siarhiej Hlebka i Kaciaryna Hlebka sa Stoŭbcaŭ, jakija padpalili na čyhunačnych šlachach biarvieńnie z metaj stvareńnia pieraškody ruchu ciahnikoŭ;

Siarhiej Kanavałaŭ, čyhunačnik ź Viciebska, jakoha abvinavacili ŭ namiery sabatažu;

Anatol Šyškaviec z Asipovičaŭ, jaki mieŭ namier pravieści akcyju.

Udzielniki inšych akcyj sabatažu zatrymanyja nie byli.

31 sakavika, praz try dni paśla akcyi Klimava—Aŭramcava—Minkieviča, rasijskija vojski, źniasilenyja bajami i pazbaŭlenyja łahistyki, pačali adstupleńnie z-pad Kijeva, Sumaŭ i Čarnihava. Heta aznačała, što pucinski płan blickryhu sarvany, što Ukraina vystajała, što ŭkrainskaja i biełaruskaja dziaržavy nie buduć likvidavanyja, jak płanavali ŭ Maskvie. Dźmitryja Klimava, Uładzimira Aŭramcava i Jaŭhiena Minkieviča 31 sakavika praciahvali katavać u turmie. U hety dzień ni jany troje, ni tyja, chto ich aryštoŭvaŭ, chto stralaŭ u nohi, chto dapytvaŭ ich, chto dabivaŭsia, kab rasijskija vojski bieśpieraškodna ruchalisia na Ukrainu, nie viedali, što rasijskaja navała pakaciłasia nazad. Zavajoŭnikaŭ spynili nie biełaruskija sabatažniki, a ŭkrainski narod, ukrainskaja armija. Ale chto viedaje, čyja kropla kryvi pieravažyła šali?

• 109
• 4
• 1
• 7
• 22
• 12