«Daśviedčanyja daktary lotajuć na dziažurstvy z Polščy ŭ Anhliju». Kolki zarablajuć biełaruskija miedyki ŭ Jeŭropie
Pa apošnich źviestkach, u krainie nie chapaje 8 tysiač daktaroŭ i miedycynskich siaścior. Adna z pryčyn, čamu tak adbyvajecca, — adtok miedykaŭ za miažu. Letaś tolki ŭ Polščy pracaŭładkavałasia kala 1 000 našych śpiecyjalistaŭ. «Naša Niva» pahutaryła pra zarobki ź biełaruskimi miedykami, jakija pracujuć za miažoj.
Lekar u domie dla pažyłych ludziej u Varšavie
Śviatłana amal hod pracuje lekaram u domie dla pažyłych ludziej u Varšavie. Žančyna ŭładkoŭvałasia na pracu pa sproščanaj prahramie, jakaja dazvalaje pracavać biez zdačy ekzamiena ciaham piaci hod.
Ale jana vyrašyła nie zaciahvać hety praces i ŭžo paśpieła zdać miedycynski ekzamien dla atrymańnia licenzii. Zastałosia zdać moŭny ekzamien, paśla čaho jana zmoža paŭnavartasna pracavać u Polščy na ŭzroŭni miascovych lekaraŭ, što pazityŭna adabjecca na zarobku. Ciapier, pracujučy na poŭnuju staŭku, biełaruska na ruki atrymlivaje 5 700 złotych (kala 1 200 jeŭra).
U Biełarusi da pandemii Śviatłana pracavała terapieŭtam z zarpłataj da 1 000 rubloŭ. Kali ž akazałasia ŭ kavidnaj bryhadzie, z ulikam nadbavak atrymlivała čystymi kala 3 000 rubloŭ u miesiac.
Asistent stamatołaha ŭ Vilni
Inšaja čytačka da adjezdu za miažu pracavała doktaram ahulnaj praktyki ŭ adnoj sa staličnych paliklinik. Ciapier žančyna ŭ Litvie.
Pracujučy na poŭnuju staŭku, u Biełarusi jana atrymlivała na ruki kala 1 000 rubloŭ u miesiac.
«U Litvie pakul uładkavałasia nie doktaram, a asistentam stamatołaha, bo biez vałodańnia movaj doktaram tut pracavać nielha. Treba zdać moŭny ekzamien na ŭzrovień V1», — kaža Chryścina.
Pieršyja dva miesiacy paśla miesiaca stažyroŭki joj płacili pa 5 jeŭra za hadzinu, ciapier jaje akład składaje 7 jeŭra za hadzinu na ruki.
«U zaležnaści ad zahružanaści, «čystymi» atrymlivajecca 1 000—1 200 jeŭra za miesiac», — kaža žančyna.
Paśla zdačy moŭnaha ekzamienu i vyrašeńnia inšych farmalnaściaŭ, źviazanych z paćviardžeńniem dypłoma, jana płanuje viarnucca da pracy ŭ paliklinicy. Jaje zarobak jak siamiejnaha lekara (anałah biełaruskaha doktara ahulnaj praktyki) musić być nie mienšy za 1 500 jeŭra.
Eks-aftalmołah ź Biełastoka
Anžeła pracuje lekaram u polskim Biełastoku ŭžo druhi hod. Dziaŭčyna spačatku hod prachodziła internaturu ŭ aftalmałahičnym adździaleńni. Ciaham hoda jaje zarpłata składała nie bolš za 4 000 złotych (kala 850 jeŭra). Paśla prachodžańnia internatury i zdačy ŭsich nieabchodnych ekzamienaŭ u Anžeły nie atrymałasia zastacca aftalmołaham. Na hetym profili vielmi vysokaja kankurencyja, a ŭ jaje byŭ daloka nie samy vysoki bał pa vynikach ahulnapolskaha ekzamienu, jaki zdajuć usie miedyki, u tym liku tyja, chto zakančvaje polskija VNU.
Praz heta jana syšła ŭ adździaleńnie nuklearnaj miedycyny. Ciapier na ruki atrymlivaje kala 5 000 złotych (kala 1 050 jeŭra) u miesiac za poŭnuju staŭku.
«Ja pracuju z 8 da 15 hadzin, tamu adnosna nievialiki zarobak kampiensujecca vialikaj kolkaściu volnaha času. Kali budzie patreba zarablać bolš, to z časam, kali ŭ mianie źjavicca mahčymaść brać dziažurstvy, zmahu heta rabić», — padsumoŭvaje doktarka.
Anžeła kaža, što ŭ Polščy ŭsie lekary, jakija chočuć mnoha zarablać, biaruć šmat dziažurstvaŭ. Niekatoryja navat lotajuć na dziažurstvy ŭ bolš zamožnyja krainy ES.
«Kali ŭ ciabie jość žadańnie zarablać bolš, to ŭ Jeŭropie dla hetaha našmat bolš mahčymaściej, — ličyć Anžeła. — Tut jość lekary, jakija za hadzinu dziažurstva atrymlivajuć da 17 jeŭra. Jość tyja, chto pracuje ŭ Biełastoku, a na dziažurstvy jeździć u Varšavu».
Doktarka taksama adznačaje, što siarod polskich lekaraŭ dahetul zastajecca papularnaj praca za miažoj. Praz heta, pa jaje słovach, u Polščy majuć niedachop daktaroŭ, jaki pierakryvajuć za košt śpiecyjalistaŭ z krain SND.
«Daśviedčanyja polskija lekary, jakija viedać zamiežnuju movu, nie tolki źjazdžajuć u bolš bahatyja krainy Zachodniaj Jeŭropy na zarobki i PMŽ, ale i lotajuć tudy na padpracoŭki pa vychadnych. Za dziažurstvy ŭ Anhlii ci Hiermanii płaciać našmat bolš, čym u Polščy», — kaža biełaruska.
Jakija zarobki ŭ siaredniaha miedpiersanału i inšych lekaraŭ?
Inšyja biełaruskija lekary, jakija pracujuć u Polščy z taho času, jak u krainie spraścili patrabavańni dla pracaŭładkavańnia miedykaŭ z trecich krain, taksama nazyvajuć zarobki ŭ miežach 5 000—6 000 złotych (kala 1 050—1 250 jeŭra). Stolki atrymlivajuć na ruki, kali razmova idzie pra pracu na staŭku biez dadatkovych dziažurstvaŭ. Kali ŭ biełaruskaha lekara źjaŭlajecca mahčymaść brać dadatkovyja dziažurstvy, to zvyčajna zarobak uzrastaje da 1 500 jeŭra ŭ ekvivalencie.
Lekar-pradprymalnik
Małodšy miedycynski piersanał, naturalna, zarablaje mienš. Rataŭnik (anałah biełaruskaha lekara na chutkaj) atrymlivaje ad 3 000—3 500 złotych (kala 650—750 jeŭra) u miesiac. Značna pavialičyć zarobki možna za košt dadatkovych dziažurstvaŭ. Taksama ŭ Polščy davoli raspaŭsiudžanaj źjavaj u miedycynie źjaŭlajecca praca na siabie. U takim vypadku miedyk zaklučaje z ustanovaj damovu padradu, sam damaŭlajecca ab pamiery staŭki za hadzinu pracy i h. d. Tak možna adnačasova supracoŭničać z roznymi ŭstanovami. Uzrovień zarobkaŭ u takim vypadku mocna zaležyć ad žadańnia čałavieka pracavać, adnak, prynamsi, na pieršych parach, hetaja ličba nie pieravalvaje za adznaku bolš čym 2 000 jeŭra ŭ miesiac čystymi.
Čytajcie taksama: «Tak, jość narkamany, dyk i što?» Jak biełaruska pracuje na chutkaj u Varšavie
Stała viadoma, čamu pieramožca biełaruskaha adboru «Mis Suśviet» nie jedzie na konkurs. Jana znajšłasia ŭ SIZA14
Kamientary