Pačaŭsia sud nad «Viasnoj»: pieršyja za paŭtara hoda FOTA i VIDEA Bialackaha i kaleh. Jany patrabujuć, kab sud išoŭ pa-biełarusku
Siońnia raspačaŭsia sud nad lidarami «Viasny» — nobieleŭskim łaŭreatam Alesiem Bialackim, Valancinam Stefanovičam i Uładziem Łabkovičam.
Pravaabaroncaŭ abvinavačvajuć u «kantrabandzie arhanizavanaj hrupaj» (č. 4 art. 228 KK) i «finansavańni hrupavych dziejańniaŭ, jakija hruba parušajuć hramadski paradak» (č. 2 art. 342 KK).
Troje viasnoŭcaŭ utrymlivajucca pad vartaj z 14 lipienia 2021 hoda — im pahražaje ad 7 da 12 hadoŭ źniavoleńnia.
Taksama ŭ režymie śpiecvytvorčaści sudziać i Źmitra Sałaŭjova, jakomu paščaściła źjechać za miažu.
Pryjšła i pieršaja infarmacyja z suda: «viasnoŭcy» patrabujuć źniać ź ich kajdanki i vieści praces pa-biełarusku.
Sud prachodzić u adkrytym režymie, piša «Viasna». Usich prysutnych pierapisali. Na sud pryjšli pradstaŭniki dziaržaŭnaj prapahandy.
Pradstaŭnikoŭ dypłamatyčnaha korpusa nie puścili.
Aleś, Uładź i Valancin razmaŭlajuć z sudździoj Marynaj Zapaśnik na biełaruskaj movie. Na sudzie pravaabaroncy zajavili chadajnictvy, siarod jakich — vieści sudovy praces na biełaruskaj movie i źniać kajdanki, bo heta prynižaje ich hodnaść.
Sudździa Maryna Zapaśnik admoviła ŭ chadajnictvie vieści praces na biełaruskaj movie.
Bialacki zajaviŭ taksama chadajnictva dać pierakładčyka z ruskaj na biełaruskuju. Sud i hetaje chadajnictva nie zadavoliŭ.
Intaresy na sudzie Źmitra Sałaŭjova pradstaŭlaje pryznačany śledstvam advakat.
Abaronca Alesia Bialackaha zajaviła chadajnictva ab źmianieńni jaho miery strymańnia na nie źviazanuju z pazbaŭleńniem voli. Maryna Zapaśnik nie zadavoliła chadajnictva.
Prakuror Alaksandr Karol u svaju čarhu zajaviŭ, što «materyjały spravy śviedčać pra toje, što Bialacki moža schavacca ad pravasudździa», i jon «nie bačyć padstaŭ dla źmieny jamu miery strymańnia».
Takoje ž chadajnictva zajaviła abaronca Valancina Stefanoviča. Sudździa Maryna Zapaśnik taksama admoviła ŭ zadavalnieńni hetaha chadajnictva.
Na sud pryjšła taksama prapahandystka Alena Krasoŭskaja, jakaja raniej nazyvała siabie pravaabaroncaj, a ciapier piša artykuły dla «Biełaruś Siehodnia». Jana i ciapier z zała suda piša artykuł na sb.by pra sud nad viasnoŭcami.
Valancin Stefanovič zajaviŭ chadajnictva, kab Krasoŭskuju vydalili z pracesu, bo jana davała pakazańni pa spravie jak śviedka pad inšym proźviščam — «Karpovič».
Ale sudździa nie zadavoliła hetaje chadajnictva, bo nibyta heta zdahadki pravaabaroncy. Ale było paćvierdžana, što sapraŭdy proźvišča i imia niekatorych śviedak mianiali «z-za ich biaśpieki».
Prakuror Karol začytvaŭ abvinavačvańnie pravaabaroncam paŭhadziny — u sudzie abviaścili pierapynak na abied.
Aleś Bialacki zajaviŭ, što nie paśpieŭ aznajomicca z bolš čym 70 tamami i prasiŭ dać jamu čas na aznajamleńnie z materyjałami spravy.
Sud zajaviŭ, što ŭ jaho było dastatkova času (miesiac) dla aznajamleńnia z materyjałami spravy, i niama padstavy dla pradastaŭleńnia jamu dadatkovaha času dla aznajamleńnia.
Aleś Bialacki, Valancin Stefanovič i Uładzimir Łabkovič nie pryznali vinu ni pa adnym artykule Kryminalnaha kodeksa, jakija im staviacca ŭ vinu.
Abvinavačvańni začytvali amal dźvie hadziny.
Na pracesie vyznačyli nastupny paradak sudovaha śledstva: adrazu dapytajuć śviedak, potym vyvučać piśmovyja materyjały spravy i pry nieabchodnaści rečavyja i ŭ apošniuju čarhu dapytajuć samich pravaabaroncaŭ.
Na sudzie ŭžo pačali dapytvać pieršaha śviedku pa spravie — redaktara «Narodnaj Voli» Iosifa Siaredziča. Jon daje pakazańni na biełaruskaj movie i kaža, što tak jak nie źjaŭlaŭsia supracoŭnikam «Viasny», to nie viedaje pra dziejnaść arhanizacyi.
Paśla taho, jak pravaabaroncam začytali abvinavačvańni, Aleś Bialacki zajaviŭ, što jamu nie ŭ poŭnaj miery zrazumieły tekst, bo jon byŭ ahučany na ruskaj movie.
Sudździa Maryna Zapaśnik skazała, što heta možna rasceńvać jak zaciahvańnie pracesu. Bialacki adkazaŭ, što heta parušeńnie jaho pravoŭ.
U sudzie pa «spravie Viasny» abvieščany pierapynak da zaŭtra — 6 studzienia
U sudzie pa «spravie Viasny» abvieščany pierapynak da zaŭtra — 6 studzienia
Sudovy praces pačniecca zaŭtra ŭ 10:30
Pa spravie ŭsiaho 283 tamy materyjałaŭ pa 300 staronak — heta rekord pa palityčnaj spravie, pa jakoj prachodzić kala 100 śviedak, było praviedziena 120 pieratrusaŭ pa ŭsioj krainie.
60-hadovy Aleś Bialacki nie pieršy raz za kratami. Ułady ŭžo aryštoŭvali jaho na pačatku 2010-ch. Pravaabarončy centr «Viasna» Bialacki stvaryŭ u 1996-m i dahetul zastajecca jaho kiraŭnikom.
Letaś pravaabaronca staŭ łaŭreatam Nobieleŭskaj premii miru razam z pradstaŭnikami pravaabarončych arhanizacyj «Miemaryjał» z Rasii i «Centr hramadzianskich svabod» z Ukrainy. Jon nie zmoh trapić na cyrymoniju — pramovu Bialackaha na ŭručeńni «Nobiela» začytała jahonaja žonka.
Adras dla listoŭ salidarnaści:
SIZA-1, 220030, Minsk, Vaładarskaha, 2, Uładzimir Mikałajevič Łabkovič, Alaksandr Viktaravič Bialacki, Valancin Kanstancinavič Stefanovič.
«Dabro i praŭda pavinny ŭmieć abaraniać siabie». Nobieleŭskaja pramova Alesia Bialackaha POŬNY TEKST
-
Viačorka: Siarod zachodnich palitykaŭ isnuje žadańnie chutčej skončyć vajnu luboj canoj. I hetaj canoj moža stać Biełaruś
-
Jak mučyli Cila Švajhiera i centry haradoŭ, kab stvaryć karcinku dla sudzimaha za machlarstva prateže Dźmitryja Baskava
-
Alinu Koŭšyk spytali, čamu hałoŭnaj redaktarkaj «Biełsata» stała jana, a nie Alaksiej Dzikavicki
Jak mučyli Cila Švajhiera i centry haradoŭ, kab stvaryć karcinku dla sudzimaha za machlarstva prateže Dźmitryja Baskava11
Kamientary
Vozmožno,
im dažie v hłubinie duši stydno za to,
čto oni diełajut.
Prosto oni bojatsia odnoho čiełovieka.
No eto ich nikak nie opravdyvajet.
Kohda-nibud́,nadiejuś skoro,
obvinitieli i obviniajemyje pomieniajutsia miestami.