Stała viadoma, jakija damy źjaviacca na miescy tak i nie dabudavanaha HC «Hulivier»
Historyja z budaŭnictvam handlova-zabaŭlalnaha centra ŭ rajonie vulic Prytyckaha i Dunina-Marcinkieviča ŭ Minsku biare pačatak jašče z druhoj pałovy «nulavych». U 2015-m budoŭla spyniłasia. Ciapier stała viadoma, jakija šmatpaviarchoviki płanujuć uźvieści na tym miescy.
Na sajcie zabudoŭščyka źjaviłasia infarmacyja, što na placoŭcy ŭźviaduć dva indyvidualnyja žyłyja damy pavyšanaj kamfortnaści z padziemnymi parkinhami i čatyry panelnyja «śviečki» («MAPID» M-111-90). Aproč žyłych damoŭ na terytoryi musiać źjavicca padziemnaja dvuchuzroŭnievaja haraž-stajanka, dziciačyja i spartyŭnyja placoŭki, miescy dla cichaha adpačynku žycharoŭ.
Zabudoŭščyk płanuje pačynać afarmlać damovy na dolevaje budaŭnictva ŭ kancy 2023-ha — pačatku 2024 hoda. Raniej namieśnik staršyni Minharvykankama Dźmitryj Mikulonak vykazvaŭ mierkavańnie, što u 2025—2026 hadach minčanie ŭbačać tam absalutna inšuju karcinu.
Što za HZC musiŭ źjavicca?
Budaŭnictva HZC pačałosia ŭ druhoj pałovie 2000-ch. Tady mierkavałasia, što «Hulivier» stanie najbujniejšym handlova-zabaŭlalnym centram u Minsku. U 6-paviarchovym budynku płanavali raźmiaścić bolš za 160 kram i bucikoŭ, hipiermarkiet, zabaŭlalnuju zonu dla dziaciej, boŭlinh, fudkord i šmat inšaha. U svaje časy «Hulivier» pretendavaŭ na zvańnie najlepšaha handlovaha centra, jaki budujecca, a taksama na najlepšaje architekturnaje rašeńnie siarod kamiercyjnaj nieruchomaści ŭ premii Realt Golden Key 2015.
Adnak u tym ža 2015-m budaŭničyja raboty spynilisia z-za niedachopu srodkaŭ. Paśla bankructva zabudoŭščyka ŭ 2017 hodzie daŭhabud nie raz vystaŭlali na tarhi, ale biespaśpiachova. Na pieršych tarhach, praviedzienych u 2019-m, startavaja cana na jaho składała amal 11 miljonaŭ dalaraŭ. Apošni raz daŭhabud sprabavali pradać za 7,2 miljona dalaraŭ, ale achvotnych nabyć abjekt znoŭ nie znajšłosia.
Letaś abjekt pryniaŭ horad i pieradaŭ jaho UKB Minharvykankama.
Čytajcie taksama:
U Hrodnie carskija kazarmy rekanstrujujuć pad elitnaje žytło
Minčanka pakinuła stanoŭčy vodhuk na sumku — i raptam vykryła zdradu čužoha muža19
Kamientary