Vyroščvaŭ avakada, kajfavaŭ, kali havaryŭ pa-biełarusku. Historyja advakata Vitala Brahinca, jakomu dali 8 hadoŭ kałonii
Učora advakata Vitala Brahinca asudzili da 8 hadoŭ źniavoleńnia va ŭmovach uzmocnienaha režymu. Jaho abvinavacili adrazu pa čatyroch artykułach KK. «Dumaju, što tak žorstka ź im abyšlisia z-za jaho pryncypovaści». Kalehi Vitala Brahinca raskazali «Našaj Nivie», čym jon byŭ admietny i za što jamu mohuć pomścić ułady.
Fota: sacsietki
«Mieŭ nadzieju, što ŭsio abydziecca»
Pa adukacyi 49-hadovy Vital Brahiniec fizik, ale zaŭsiody žyŭ pravam.
«Čamu jon staŭ mienavita advakatam, nie kazaŭ, ale vielmi časta zhadvaŭ, što maje fizičnuju adukacyju, — raskazvaje jaho kaleha. — Vital razumny i nastojlivy. Jamu nie važna, što pra jaho dumajuć inšyja, budzie rabić tak, jak jon ličyć pravilnym. Zaŭsiody strajecca zrazumieć inšych ludziej i škaduje ich.
Zdajecca, Vital nikoli nie dumaŭ pra toje, kab źjazdžać. Bolš za toje, jon, budučy čałaviekam, jaki raźbirajecca ŭ zakonach, razumieŭ, što ničoha nie parušyŭ. Chacia viedaŭ, što ŭ krainie nie da zakonaŭ».
Vital — fanat prava i zakona. Jurydyčnaj spravaj jon zajmaŭsia bolš za 25 hadoŭ. Heta było jaho pracaj i chobi. Z 1996 pa 2010 hod jon uznačalvaŭ ułasnuju kampaniju «Brahiniec i partniory». Apošnim časam pracavaŭ u jurydyčnaj kansultacyi Dziaržynskaha rajona.
«Jość jurydyčnyja pracedury, jakija pracujuć pa peŭnaj praktycy. Navat nie zaŭsiody zadumvaješsia, robiš, jak jano jość. A Vital byŭ z tych, chto čytaŭ, jak heta napisana ŭ zakonie, i damahaŭsia, kab heta tak i było, a nie pa adpracavanych schiemach. Tamu nie ŭsie ŭ jurydyčnaj supolnaści jaho razumieli.
U nas jak? Zrabić chutka i efiektyŭna. A jon uvieś čas kazaŭ, što my nie pavinny sami sabie stvarać niejkija abmiežavańni.
Naprykład, jurysty časam, kali ŭ zakonie nie skazana, što heta nielha, sami sabie prydumlajuć, što tak i jość. Vital nastojvaŭ na tym, što kali nie skazana «nielha» — značyć mahčyma.
Mnohich jon razdražniaŭ svajoj nastojlivaściu. Ale heta charaktaryzuje jaho jak fanata svajoj spravy».
Z chobi advakata — jon vyroščvaŭ avakada, sadžaŭ kostki inšych raślin. U jaho doma zastałasia cełaja aranžareja. Ciapier jaje dahladaje siabar.
Vital taksama lubiŭ johu.
Za čas źniavoleńnia, kažuć, Brahiniec vielmi schudnieŭ.
«I tak byŭ chudarlavy, ja navat nie viedaju, jak jašče bolš pachudzieć jon zmoh», — kaža kaleha.
Pa listach, jakija prychodzili ad Vitala, było zrazumieła, što jon vielmi ździŭleny spravie, jakuju jamu pradjavili.
«Mieŭ nadzieju, što ŭsio abydziecca, — kaža kaleha. — Raskazvaŭ, što jašče ŭ samym pačatku jon upaŭ z łožka z druhoha paviercha i paškodziŭ nahu.
Dumaju, što tak žorstka ź im abyšlisia z-za jaho pryncypovaści. Vynosiŭ mozh šmat kamu ź siłavikoŭ. Chutčej, vyrašyli pravučyć takim čynam. A taksama heta zrabili peŭnaj pakazalnaj spravaj dla ŭsich advakataŭ. Pasył, kab siadzieli cicha, i rabili tak, jak kažuć».
«Umieje radavacca čužym pośpiecham»
Druhi kaleha apisvaje Vitala jak «vielmi ŭpartaha i samaadanaha». Pa kožnaj spravie jon rabiŭ usie mažlivyja kroki, kab dapamahčy klijentam, za jakich mocna pieražyvaŭ.
«Šukaje i znachodzić roznyja niestandartnyja rašeńni, jakija sapraŭdy dapamahajuć. Sudździ i śledčyja adčuvali ŭžo z samaha pačatku, što lohka im nie budzie, kožnaja ich pamyłka i złoŭžyvańnie budzie zaŭvažana», — kaža jon.
Dla Vitala było važna zmahacca da apošniaha. Jon abskardžvaŭ kožnaje niepravamiernaje rašeńnie suda.
«Ź im było vielmi prosta kamunikavać. Navat z tymi, chto značna maładziejšy za jaho, jon nikoli nie razmaŭlaje z pazicyi «ŭ mianie šmat dośviedu, a ŭ ciabie — nie», «ja viedaju, što takoje być advakatam, a ty nie», što možna pačuć ad šmatlikich daśviedčanych advakataŭ. Taksama jon umieje radavacca čužym pośpiecham, a nie tolki svaim.
Pamiataju, jak u 2020 hodzie jon pryjšoŭ na adzin moj praces pa administracyjnaj spravie, kab padtrymać i dla siabie taksama pačuć niešta novaje. Atrymałasia damahčysia adpraŭki spravy na dapracoŭku, paśla čaho majho klijenta vyzvalili. Jaho prysutnaść sapraŭdy była karysnaj i dadała ŭpeŭnienaści», — raskazvaje kaleha.
«Kajfavaŭ, kali havaryŭ pa-biełarusku»
Cikavy epizod zhadvaje žurnalist, ź jakim Brahiniec chadziŭ na dopyt.
«Brahiniec zmahaŭsia za kožnuju kosku i słova ŭ pratakole dopytu.
Zrabiŭ zaŭvahu, što pakazańni davalisia pa-biełarusku, a śledčy, mahčyma, nie maje kampietencyi, kab svabodna pierakładać maje słovy. Kajfavaŭ, što sa mnoj možna havaryć pa-biełarusku, bo bajaŭsia, što ŭžo zabyvaje movu»,
— napisaŭ u fejsbuku Źmicier Pankaviec.
Vitala Brahinca abvinavacili pa čatyroch artykułach Kryminalnaha kodeksa: ab raspalvańni varožaści, zaklikach da dziejańniaŭ suprać nacbiaśpieki, stvareńni ekstremisckaha farmavańnia abo ŭdziele ŭ im i hrubym parušeńni paradku. Spravu dva tydni ŭ zakrytym režymie razhladała sudździa Alena Ananič, paviedamlała «Viasna».
Advakata Vitala Brahinca zatrymali 23 maja 2022 hoda i dvojčy zapar aryštavali na 15 sutak.
Artykuł ab udziele ŭ ekstremisckim farmavańni ŭ jaho spravie ŭźnik vierahodna paśla taho, jak 9 vieraśnia 2022 hoda MUS pryznaŭ «ekstremisckim farmavańniem» telehram-čat «Biełaruskija advakaty».
Brahiniec abaraniaŭ niekatorych palitviaźniaŭ, u tym liku staršyniu pravaabarončaha centra «Viasna» Alesia Bialackaha, a taksama advakata Andreja Mačałava, jaki na sudzie zastaŭsia biez abarony praz aryšt Brahinca.
Napisać Vitalu list sa słovami padtrymki možna na adras:
SIZA-1, 220030, h. Minsk, vuł. Vaładarskaha, 2, Brahiniec Vital Fiodaravič.
Čytajcie taksama:
«Kala 120 advakataŭ vyrašyli nie praciahvać svaju dziejnaść»
«Nieśli płakat i pałotnišča bieł-čyrvona-biełaha koleru, błakavali šlach transpartu» — jašče adzin prysud pa «narodnym» artykule
Siabrovak u Minsku asudzili za źniavahu dziaržaŭnaha ściaha
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary