Jak źmianilisia ceny na šop-tury ŭ Biełastok i kolki ciapier stajać na miažy
10 lutaha Polšča zakryła punkt propusku «Babroŭniki» na miažy ź Biełaruśsiu. Jak ciapier jeździać na zakupy ŭ Biełastok?
Košt pajezdki ŭ Biełastok vyras na 20 rubloŭ
Najbolš situacyja zakranuła žycharoŭ Hrodzienščyny. Z zakryćciom pamiežnaha pierachoda hrodzienskija apieratary pasažyrskich pieravozak i šop-turaŭ pieranakiravali svaje maršruty ŭ Biełastok i Varšavu praź Litvu.
«Kali ludziam treba jechać, to jany pahodziacca na pajezdku, jakaja ŭtraja bolš zojmie času. Pakul, adnak, my nie možam skazać, jak adabjecca situacyja na klijentach, ale miarkujem, što ich kali i pamienieje, to nie istotna», — vykazalisia ŭ adnoj z hrodzienskich transpartnych kampanij.
Šop-tury z Hrodna ŭ Biełastok padaraželi na 20 rubloŭ — da 80 rubloŭ. Peŭnaści z časam pajezdki niama.
Z šaści punktaŭ propusku na miažy z Polščaj pracujuć tolki dva ŭ Bresckaj vobłaści. Tolki adzin ź ich — «Brest — Ciarespal» — pryznačany dla ruchu lehkavoha transpartu.
Varyjanty pajezdak praz Brest maršrutčykami nie razhladajucca.
«U nas maršruty tolki praź Litvu. Płanujcie pajezdku na hadzin 10 jak minimum. Praz Brest jechać nam nie vyhadna. Vialiki kiłamietraž», — patłumačyła dyśpietčar jašče adnoj kampanii.
«Na miažy možam prastajać da 12 hadzin»
Pryvatny pieravozčyk Piotr užo raźviedaŭ darohu praź Litvu i navat Łatviju ŭ Polšču. Pavodle jaho, klijenty jość, ale jon ich papiaredžvaje pra doŭhuju pajezdku i składanaści, źviazanyja ź joju.
«Raźličvajcie, što na biełaruska-litoŭskaj miažy možam prastajać da 12 hadzin. Tam užo čerhi. Pajezdka moža zaniać usie 24 hadziny. Ludziej jeździć šmat, bo ŭvieś pasažyrapatok z Hrodna ŭ Polšču pieraaryjentavaŭsia praź Litvu. Raniej z Hrodna ŭ Biełastok možna było dajechać za 6-8 hadzin. Nabirajciesia ciarpieńnia, kali pajedziecie».
Pa słovach surazmoŭcy, raniej punkt propusku «Pryvałka» na miažy ź Litvoj kali i byŭ pierahružany, to zredku. Ciapier ža tam čarha ź dziasiatkaŭ mašyn.
Da zakryćcia pamiežnaha pierachoda «Bruzhi» ad Hrodna da Biełastoka było 85 kiłamietraŭ. Pry ŭdačlivym źbiehu abstavin daroha mahła zaniać mieniej za 4 hadziny. Praz zakryty 10 lutaha punkt propusku «Bierastavica — Babroŭniki» z Hrodna da Biełastoka było 120 kiłamietraŭ.
Praź Litvu jechać 250 kiłamietraŭ, a praz Brest — 400.
«Nadyšła druhaja realnaść»
U čatach papularnyja pytańni: kolki mašyn u čarzie na miažy i jak chutka ich prapuskajuć.
«Pryvałka, u bok Litvy staim na biełarusach užo 5 hadzin, prasoŭvańni minimalnyja. Vypuskajuć pa adnoj mašynie z kožnaha pasa prykładna raz za hadzinu»,
— papiaredžvaje ŭdzielnik čata «Hranica BY».
«Nie istotna, jaki punkt raniej pracavaŭ chutčej, treba razumieć, što 10.02 nadyšła druhaja realnaść i ŭsio budzie horš z prachodžańniem…» — havorycca ŭ jašče adnym dopisie.
U čacie hučać pieraściarohi, što palaki źbirajucca zakryć pamiežny punkt propusku i ŭ Breście.
«Žyviom u taki čas, što ŭsio moža być i mianiajecca heta ŭ ličanyja dni, a to i hadziny. U Polščy pra heta tolki i kažuć», — abmiarkoŭvajuć.
«Nie pajezdka, a pryhody»
Va ŭlublonym biełarusami handlovym centry Atrium Biala, što ŭ Biełastoku, u pieršuju subotu paśla zakryćcia pamiežnaha pierachoda «Babroŭniki» pakupnikoŭ ź Biełarusi było mieniej, čym raniej.
«Była nie pajezdka, a pryhody. Nas papiaredzili, što pajedziem praź Litvu. Daviałosia dapłacić za bilet, ale pajezdku my apraŭdali. Adpravili rodnym pralnuju mašynu, a sami zastalisia adpačyć», — raskazała naviednica centra ź Biełarusi.
Handlary samoha centra pierakananyja, što klijentaŭ ź Biełarusi nie pamienieje, bo «i raniej byli ciažkaści na miažy», jakija biełarusy pieraadolvali.
Nie zadavoleny situacyjaj biełaruskija hastarbajtary.
«My psichujem, — vykazvaje kalektyŭnuju dumku adzin ź ich, — ale ničoha parabić nie možam. Palaki paśpiašyli zakryć «Babroŭniki». Jany sami buduć u minusie i zrazumiejuć svaju pamyłku. Nam ža zastajecca jeździć u Hrodna praź Litvu ci Brest».
Niekatoryja nie viedajuć, z čym źviazana zakryćcio pamiežnaha pierachoda.
«A ci praŭda, što z-za Pačobuta zakryli miažu?» — pytajecca adzin z žycharoŭ Hrodzienskaj vobłaści, jaki pracuje ŭ Biełastoku.
Polskija ŭłady nie chavajuć, što nahodaju dla zakryćcia pamiežnaha punkta staŭ u tym liku prysud žurnalistu i aktyvistu polskaj mienšaści ŭ Biełarusi Andreju Pačobutu, asudžanamu na 8 hadoŭ pazbaŭleńnia voli.
Biełaruskija ŭłady ŭ adkaz na heta zajavili pra «kontrpradukcyjnaść usich sprob cisku na Biełaruś».
«Naša Niva» — bastyjon biełaruščyny
PADTRYMAĆDa čaho pryviadzie zakryćcio «Babroŭnikaŭ»
Polšča zakryvaje punkt propusku «Babroŭniki» «ź mierkavańniaŭ nacyjanalnaj biaśpieki»
Pamiežny kamitet: Dziejańni polskich uład mohuć pryvieści da kałapsu abapał miažy
Brat udavy Zielcara: Kadebisty išli ŭ kvateru pa mianie1
Kamientary