Duet opiernaj śpiavački Marharyty Laŭčuk i błohiera Andreja Pavuka ŭźnik jak reakcyja na biełaruski siur. Pracavali muzyki ŭ žanry palityčnaj satyry.
Andrej Pavuk paćvierdziŭ «Našaj Nivie», što hurt bolš nie isnuje. Pa jakich pryčynach jon raspaŭsia, muzyki nie kamientujuć.
Siarod jarkich piesień dueta — «Azaronak», «Tolka Matolka», «Aryja Iudy», «Źviniat i lazhajut tanki», «Halina» i šmat inšych. Aŭtar tekstaŭ — Andrej Pavuk.
Učora Marharyta Laŭčuk razam z Paŭłam Libieram vypuściła pieśniu «Murka», duet nazvali «Niedazakonaŭ».
Opiernaja śpiavačka Marharyta Laŭčuk vystupała ŭ roznych jeŭrapiejskich teatrach. Jana ŭdzielničała ŭ pratestach u Biełarusi ŭ 2020 hodzie. Tady ž syšła z pracy ŭ Nacyjanalnym teatry opiery i baleta.
Ciapier Marharyta žyvie ŭ Vilni i, aproč jak z kłasičnaj muzykaj, taksama pracuje z palityčnaj satyraj, adkryta i pravakacyjna krytykuje dyktaturu ŭ krainie.
U 2021 hodzie suprać Laŭčuk raspačali kryminalnuju spravu pavodle art. 370 KK («Ździek ź dziaržaŭnych simvałaŭ»).
Andrej Pavuk — aktyvist i błohier, stvaralnik jutub-kanała «Rudabielskaja pakazucha», na jakim u tym liku publikuje svaje telefonnyja razmovy z čynoŭnikami.
Na Pavuka raniej zaviali kryminalnyja spravy za «publičnuju abrazu rabotnika prakuratury horada Minska» i «razhałošvańnie źviestak ab pryvatnym žyćci i piersanalnych danych pamočnika prakurora».
U mai 2022-ha siłaviki zładzili pieratrus u kvatery Andreja i Volhi Pavukoŭ u pasiołku Akciabrski.
Niadaŭna suprać błohiera raspačali kryminalnuju spravu za «sadziejničańnie ekstremisckaj dziejnaści» (č. 1 art. 361-4 KK).
Kamientary