Kuvałdu ŭ rečyckuju himnaziju pryvioz Mikałaj Budźko. Mienavita jon zahadaŭ pa-sadyscku zabić siryjca ŭ 2017 hodzie
Mikałaj Budźko — kamandzir 4-ha šturmavoha atrada PVK «Vahnier», jaki addaŭ zahad paśla doŭhich katavańniaŭ pakarać śmierciu biazzbrojnaha siryjca ŭ 2017 hodzie. Siryjcu razdrabili kaniečnaści kuvałdaj, uzarvali ŭ pachvinie zapał ad ručnoj hranaty, adsiekli ruki, cieła padviesili za nohi i spalili, adrezanuju hałavu źmiaścili na ŭsieahulny ahlad. Uvieś praces byŭ zachavany na videa. Pra toje, što toj samy Budźko padaryŭ brendziravanuju kuvałdu PVK «Vahnier» muzieju VDV pry Rečyckaj rajonnaj himnazii, piša reform.by.
15 sakavika ŭ muziei pry himnazii zjaviŭsia novy ekspanat — kuvałda PVK «Vahnier». Padarunkam pachvaliŭsia prarasijski aktyvist Uładzimir Habraŭ, jaki viadomy ŭ Rečycy jak kiraŭnik vajenna-patryjatyčnaha centra śpiecyjalnaj padrychtoŭki dapryzyŭnaj moładzi «Skif».
Na kuvałdzie nieviadomy napisaŭ «Ad zasnavalnika brenda», pakinuŭ aŭtohraf i padpisaŭsia pazyŭnym «Bies».
Mienavita hety pazyŭny mieŭ kamandzir 4-ha šturmavoha atrada Mikałaj Budźko. U kancy lutaha vydańnie «Daśje» apublikavała rasśledavańnie, u jakim byli nazvanyja imiony ŭdzielnikaŭ žudasnaha katavańnia siryjca ŭ 2017 hodzie. Videa šakavała internet-karystalnikaŭ.
Siarod udzielnikaŭ byli dva biełarusy — Mikałaj Budźko z Horak z pazyŭnym «Bies» i Andrej Bakunovič z Kalinkavičaŭ z pazyŭnym «Strapa». Bakunoviča zatrymlivali pad Minskam u 2020 hodzie ŭ składzie atrada z 33 «vahnieraŭcaŭ», a voś Budźko šyrokaj publicy staŭ viadomy tolki ŭ 2023 hodzie dziakujučy rasśledavańniu rasijskich žurnalistaŭ.
Mikałaj Budźko naradziŭsia ŭ 1975 hodzie ŭ Mahiloŭskaj vobłaści. U 1993—1994 hadach jon byŭ na terminovaj słužbie ŭ biełaruskim vojsku, namieśnik kamandzira ŭzvoda ŭ Pavietrana-desantnych vojskach. Zatym pierajechaŭ u Rasiju, atrymaŭ hramadzianstva, u 1996-2003 hadach słužyŭ u kastramskim AMAPie. U pasłužnym śpisie — bajavyja kamandziroŭki ŭ Čačniu i Dahiestan. Zatym — słužba ŭ francuzskim Zamiežnym lehijonie, rasijskaj PVK Moran Security Group. U «Vahnier» zavierbavaŭsia ŭ mai 2015 hoda, byŭ pryznačany kamandziram uzvoda ŭ 4-ju rotu, nieŭzabavie jaje ŭznačaliŭ.
Pavodle infarmacyi «Daśje», mienavita Budźko addaŭ zahad karać śmierciu biazzbrojnaha siryjca z dapamohaj kuvałdy.
Ale što da «padarunka» rečyckaj himnazii. Nieviadoma, kali Habraŭ atrymaŭ kuvałdu ad PVK «Vahnier». U jaho błohu pieršaje videa sa skrypičnym futarałam i kuvałdaj zjaviłasia 28 lutaha 2023 hoda. Habraŭ vychvalajecca, što muziej PDV atrymaŭ kaštoŭny padarunak, i pakazvaje kuvałdu biez nadpisaŭ. 14 sakavika jon raźmiaščaje novaje videa, na jakim mužčyna robić nadpis na kuvałdzie i padpisvajecca «Biesam».
Jość i jašče adno cikavaje videa ŭ błohu Habrava. Jano apublikavanaje 6 lutaha 2023 hoda, na im jon siadzić za stałom, pierad im blašanka čyrvonaj ikry i butelka harełki z hierbam Rasii. Habraŭ pramaŭlaje pałymiany tost u honar svajho siabra Koli. Jon zhadvaje hieraičnaje minułaje siabra i ŭ paćviardžeńnie prykładvaje fota ŭznaharod «hieroja» — na «ikanastasie» zorka hieroja Rasii, 6 ordenaŭ Mužnaści, orden «Za zasłuhi pierad Ajčynaj» 4-j stupieni, miedal «Za advahu» i inšaje.
«Chaču vypić vielmi mocna i ź vialikim honaram za majho siabra, za majho adnakłaśnika, za takoha ž, jak ja, desantnika, jaki pačynaŭ svoj šlach voina ŭ dalokim 95-m hodzie ŭ 103-j viciebskaj bryhadzie. Na siońniašni dzień pradstaŭleny i ŭznaharodžany Załatoj zorkaj Hieroja Rasijskaj Fiederacyi. Naš ścipły ziamlak z Rečycy. Akramia hetaha, šeść ordenaŭ Mužnaści, orden «Za zasłuhi pierad Ajčynaj» čaćviortaj stupieni, miedal «Za advahu» i inšaje. Prosta kałasalny ašałamlalny ikanastas. Za majho siabra. Usie, chto jaho viedajuć, i ŭsie, chto prosta padtrymlivaje hety ruch naš vieteranski, što ŭ nas takija hieraičnyja ludzi na našaj biełaruskaj ziamli, na rečyckaj. Tamu ŭsie, chto jaho viedaje, usie, chto nie viedajuć, dumaju, mianie padtrymajuć — Kola, za ciabie, darahi», — kaža Habraŭ i vypivaje čarku.
Fakty ŭ losie Koli nie całkam supadajuć ź infarmacyjaj vydańnia «Daśje», naprykład, Habraŭ kaža, što Kola pačaŭ słužbu ŭ PDV u 1995 hodzie, a sam jon rodam z Rečycy, ale niestykoŭki možna śpisać na niedakładnuju infarmacyju adnoj z krynic.
U lubym vypadku, «zasnavalnik brenda» «Bies» — heta, vidavočna, Mikałaj Budźko (Habraŭ prykłaŭ da fota kuvałdy fota paśviedčańnia hieroja Rasii). I mienavita jon padaryŭ dzieciam rečyckaj himnazii simvał vajennych złačyncaŭ. A kab nie było sumnievaŭ, paraŭnajcie podpis Budźko na ankiecie dla PVK «Vahnier» i podpis na kuvałdzie.
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ8
Kamientary