Ukraina źmianiła vajennyja płany z-za ŭciečki sakretnych dakumientaŭ Pientahona — CMI
Z-za ŭciečki sakretnych amierykanskich dakumientaŭ Ukraina ŭžo źmianiła niekatoryja svaje vajennyja płany, paviedamlaje «UP» sa spasyłkaj na CNN.
Vydańnie adznačaje, što sakretnyja dakumienty Pientahona, jakija byli apublikavany ŭ siecivie na praciahu apošnich tydniaŭ, demanstrujuć, što ZŠA špijoniać jak za praciŭnikami, tak i za sajuźnikami, što hłyboka zaniepakoiła amierykanskich čynoŭnikaŭ, jakija aścierahajucca, što heta vykryćcio moža pastavić pad pahrozu niekatoryja krynicy i skampramietavać važnyja mižnarodnyja adnosiny.
Niekatoryja z aryhinalnych dakumientaŭ vykryvajuć maštaby amierykanskaha prasłuchoŭvańnia klučavych sajuźnikaŭ, u tym liku Paŭdniovaj Karei, Izraila i Ukrainy.
Inšyja raskryvajuć stupień praniknieńnia ZŠA ŭ Ministerstva abarony Rasii i rasijskuju PVK «Vahnier», krynicy zaraz mohuć być adrezany abo pastaŭleny pad pahrozu.
Inšyja dakumienty raskryvajuć klučavyja słabyja miescy va ŭkrainskim uzbrajeńni, supraćpavietranaj abaronie, kolkaści i hatoŭnaści bataljonaŭ u krytyčny momant vajny, kali ŭkrainskija vojski rychtujucca da kontrnastupleńnia suprać rasijan, i mienavita tady, kali ZŠA i Ukraina pačali raźvivać bolš daviernyja adnosiny ŭ śfiery abmienu raźviedvalnaj infarmacyjaj.
Ukraina ŭžo źmianiła niekatoryja svaje vajennyja płany z-za hetaj uciečki, paviedamiła CNN krynica, blizkaja da prezidenta Ukrainy Uładzimira Zialenskaha.
Pientahon prykłaŭ «mižviedamasnyja namahańni» dla acenki nastupstvaŭ uciečki, zajaviła ŭ niadzielu namieśnik pres-sakratara Pientahona Sabryna Sinhch.
«Ministerstva abarony praciahvaje vyvučać i aceńvać dakładnaść sfatahrafavanych dakumientaŭ, jakija raspaŭsiudžvajucca ŭ sacyjalnych sietkach i, jak ujaŭlajecca, utrymlivajuć važnyja zasakrečanyja źviestki, — havorycca ŭ zajavie Sinhch. — Była raspačata mižviedamasnaja praca, zasiarodžanaja na acency ŭpłyvu hetych fatahrafij na nacyjanalnuju biaśpieku ZŠA, a taksama na našych sajuźnikaŭ i partnioraŭ».
Sinhch dadała, što aficyjnyja asoby ZŠA na vychadnych razmaŭlali z sajuźnikami i partniorami pra hetu ŭciečku i prainfarmavali «adpaviednyja kamitety Kanhresa».
Pa słovach aficyjnych asob, uciečka taksama prymusiła Pientahon pryniać miery dla ŭzmacnieńnia kantrolu za patokam takich zvyšsakretnych dakumientaŭ, zvyčajna dastupnych sotniam ludziej va ŭradzie.
Mnohija dakumienty majuć pamietki, jakija ŭkazvajuć na toje, što jany byli padrychtavany raźviedvalnym padraździaleńniem Abjadnanaha štaba, viadomym jak J2, i, zdajecca, zjaŭlajucca dakumientami dla bryfinhaŭ.
U piatnicu Sinhch zajaviła, što ministerstva praciahvaje vyvučać heta pytańnie i nakiravała jaho ŭ Ministerstva justycyi, jakoje asobna paćvierdziła CNN, što pačało rasśledavańnie ŭ dačynieńni da krynicy ŭciečki.
6 krasavika NYT paviedamiŭ, što ŭ Twitter i Telegram zjavilisia zasakrečanyja vajennyja dakumienty, jakija detalizujuć płany ZŠA i NATA pa raźvićci ŭkrainskaj armii pierad zapłanavanym kontrnastupleńniem.
Daradca kiraŭnika Ofisa prezidenta Ukrainy Michaił Padalak nazvaŭ «źlityja» materyjały «fotašopam» i pažartavaŭ ab dehradacyi rasijskaj raźviedki. Amierykanskija čynoŭniki na ŭmovach ananimnaści paviedamili ahienctvu Reuters, što za ŭciečkaj niekalkich sakretnych amierykanskich vajennych dakumientaŭ, jakija byli vykładzieny ŭ sacsietkach i nibyta śviedčyli ab padrychtoŭcy da viasnovaha kontrnastupleńnia Ukrainy, staić Rasija abo prarasijskija elemienty.
Paźniej u sacyjalnych sietkach zjaviłasia novaja porcyja sakretnych dakumientaŭ, jakija, imavierna, detalizujuć sakrety amierykanskaj nacyjanalnaj biaśpieki ŭ adnosinach da Ukrainy, Blizkaha Uschodu i Kitaja.
Jak mučyli Cila Švajhiera i centry haradoŭ, kab stvaryć karcinku dla sudzimaha za machlarstva prateže Dźmitryja Baskava10
Kamientary