Biełarus kupiŭ 15 hadoŭ tamu akcyju «Hazprama». Kolki jon zarabiŭ za hety čas
Rasijskaje zakanadaŭstva zabaraniaje pryvatnym asobam samim handlavać na biržy. Jany mohuć heta rabić tolki praz pasrednika, u pryvatnaści, brokiera. Mienavita takim čynam surazmoŭca Tochka.by kupiŭ akcyju «Hazprama».
Naš hieroj pracavaŭ u miedyjnaj śfiery i ŭ kancy 2008 hoda akazaŭsia ŭ Maskvie ŭ razhar čarhovych pieramovaŭ pa canie na haz dla Biełarusi.
31 śniežnia na pres-kanfierencyi namieśnik staršyni praŭleńnia AAT «Hazpram» Alaksandr Miadźviedzieŭ paviedamiŭ, što Biełaruś i kancern «udakładnili cenavyja ŭmovy kantrakta na pastaŭku hazu ŭ respubliku ŭ 2009 hodzie, i biełaruskaja delehacyja źjechała ich uzhadniać».
U ciahniku vypadkovym spadarožnikam akazaŭsia brokier, jaki i raspavioŭ pra mahčymaść stać akcyjanieram «Hazprama». Užo tady ŭ maskvičoŭ była tradycyja jeździć na śviaty ŭ Minsk.
Pahavaryŭšy sa spadarožnikam, Viktar vyrazna vyrašyŭ kupić adnu akcyju AAT «Hazpram». Tym bolš, što canu na haz tady nazvali tolki ŭ kancy studzienia, i surazmoŭca na ŭsialaki vypadak nabyŭ kaštoŭnuju papieru, kab pahladzieć, kolki jana budzie kaštavać paśla śviataŭ.
Ź finansistam jany sustrelisia na nastupny dzień paśla pryjezdu ŭ Minsk, padpisali daručeńnie na kuplu, i biełarus staŭ uładalnikam kaštoŭnaj papiery.
Dla siabie Viktar zafiksavaŭ, što akcyja «Hazprama» na toj momant abyšłasia ŭ košt butelki piva «Bałtyka №7» u restaranie, u jakim ździajśniałasia ździełka. 30 śniežnia 2008 hoda akcyja AAT «Hazpram» kaštavała 108,88 rasijskaha rubla.
Praź niejki čas u Viktara źjaviłasia ideja aformić siertyfikat na akcyju i padaryć kamu-niebudź «čaścinku nacyjanalnaha zdabytku Rasii». Ale akazałasia, što navat biełarusu, jak i inšamu zamiežnamu hramadzianinu, tak zrabić nielha. Farmalna akcyjaj vałodaŭ (i praciahvaje) brokier, ale hieroj da hetaha času moža joj rasparadžacca i ŭ luby momant, naprykład, pradać, kab atrymać hrošy.
Za 10 hadoŭ kapitał padvoiŭsia, ale ŭ rasijskich rublach.
Na 1 studzienia 2019 hoda jana kaštavała ŭžo 155,99. Heta značyć, pryrost skłaŭ 47,11 rasijskaha rubla.
Jašče 76,18 rubla prynieśli dyvidendy, jakija kancern vypłačvaŭ svaim akcyjanieram na praciahu hetych hadoŭ.
Takim čynam, na adnoj akcyi Viktar zarabiŭ ₽123,29 (₽47,11+₽76,18) — plus 134% da pieršapačatkovaj sumy.
Pa staroj biełaruskaj zvyčcy pieravodzim u amierykanskuju valutu, u dačynieńni da jakoj rasijski rubiel da 2019-ha asieŭ bolš čym u dva razy. Na 1 studzienia 2009 hoda dalar kaštavaŭ ₽29,39, praz 10 hadoŭ — ₽69,47. U vyniku ₽108,88 składali $3,7, a 232,17 (108,88+123,29) — $3,34.
Varta razumieć, što hłabalny hulec na fondavym rynku dyviersifikuje partfiel i, adpaviedna, ryzyki. Pradbačačy kryzis, jon moža pazbavicca ad akcyj u zručny momant, a navat kali i prajhraje, ź liškam pierakryje straty čymści jašče.
Akcyi «Hazprama» na praciahu 10 hadoŭ kaštavali i daražej, čym na pačatku 2019 hoda. Za pracesam treba sačyć pastajanna i svoječasova prymać patrebnyja rašeńni. Surazmoŭca vydańnia nie staviŭ mety šmat zarabić, heta byŭ usiaho tolki ekśpierymient.
Čytać taksama:
Kamientary