Uznačalvaŭ vybarčyja kamisii, choča lačyć hiejaŭ, ekśpiert pa ŭsich pytańniach. Chto taki Dźmitryj Šaŭcoŭ, jaki kiruje Biełaruskim Čyrvonym Kryžam

Pačatak karjery

Dźmitryju Šaŭcovu 49 hadoŭ. Dziacinstva jon pravioŭ u Žłobinie, a paśla pastupiŭ u Biełaruski dziaržaŭny miedycynski ŭniviersitet. Padčas vučoby jon paznajomiŭsia sa svajoj budučaj žonkaj Natallaj, ź jakoj jany razam vyrašyli pieravieścisia ŭ Homielski miedycynski ŭniviersitet. U ich dvoje darosłych synoŭ.

Pa raźmierkavańni mužčynu nakiravali ŭ Žłobinskuju centralnuju rajonnuju lakarniu. Pieršuju kiraŭničuju pasadu ŭ miedycynie jon zaniaŭ u 2000-m, staŭšy namieśnikam hałoŭnaha doktara. A ŭ 2005-m jaho zaprasili pracavać u Minsk, u 34-ju palikliniku na vulicy Kulman. Tam Šaŭcoŭ užo praz hod staŭ hałoŭnym doktaram. U 2009-m jany z žonkaj pabudavali kvateru.

Pavialičyć

Šaŭcoŭ pastajanna vučyŭsia: skončyŭ Biełaruskuju miedycynskuju akademiju paśladypłomnaj adukacyi, Akademiju kiravańnia pry Łukašenku, Instytut dziaržsłužby.

Čas u deputackim kreśle

Šaŭcoŭ staŭ deputatam jašče ŭ Žłobinie ŭ 2003-m, kali byŭ namieśnikam hałoŭnaha doktara, matyvujučy heta tym, što deputatu praściej «vybivać» hrošy na svoj špital.

Paśla jon pajšoŭ u haradski Saviet deputataŭ u Minsku, trapiŭ u Pałatu pradstaŭnikoŭ i prabyŭ tam dva terminy. To-bok byŭ deputatam ahułam kala 14 hadoŭ. Siarod prapanoŭ Šaŭcova — uviadzieńnie płaty za naviedvańnie paliklinik, kab ludzi nie złoŭžyvali ich naviedvańniem.

Pavialičyć

U vyniku jon pierajšoŭ na pracu ŭ 1-y haradski kliničny špital u Minsku na pasadu hałoŭnaha doktara. Jahony termin prypaŭ akurat na «kavidny» čas. U svaich intervju Šaŭcoŭ dekłaravaŭ, što ŭsio ŭ paradku i pad kantrolem.

Hienieralnym sakratarom Biełaruskaha Čyrvonaha Kryža jon staŭ u vieraśni 2021-ha. Taksama jon 12 hadoŭ uznačalvaje Asacyjacyju daktaroŭ Biełarusi. Siarod jahonych inšych admietnyj miescaŭ pracy — Administracyja Łukašenki z 2012-ha pa 2019-y i ZAT «Druhi nacianalny telekanał» (kiruje kanałam ANT) z 2011 pa 2015-y, zhodna sa źviestkami, jakija nam pieradali «Kibierpartyzany».

Uznačalvaŭ haradskuju vybarčuju kamisiju

Na parłamienckich vybarach u 2019-m Šaŭcoŭ uznačalvaŭ Minski haradski vybarkam. Paśla vybaraŭ jon zajaviŭ, što niezaležnyja naziralniki majuć słaby ŭzrovień padrychtoŭki i zamiest nazirańnia «pijarać siabie».

Pavialičyć

U 2020-m jon znoŭku ŭznačaliŭ Minski haradski vybarkam. Adnaznačna padtrymaŭ Łukašenku, nazvaŭšy 11 žniŭnia pratesty «pravakacyjaj» i zaklikaŭšy pratestoŭcaŭ spynicca. Za padtrymku Łukašenki i mierkavany ŭdzieł u falsifikacyi vynikaŭ vybaraŭ uniesieny ŭ sankcyjnyja śpisy ŭ Litvie, Łatvii i Estonii.

Ekśpiert pa ŭsich pytańniach

Uvohule, jon adzin z samych častych ekśpiertaŭ dla praŭładnych miedyja. Jany źviartajucca da jaho pa kamientary ledź nie štodnia (užo ŭ 2016-m jon byŭ adnym z rekardsmienaŭ dziaržaŭnych efiraŭ). Šaŭcoŭ vystupaje i jak doktar, i jak palitołah. Vykazvaŭsia jon i nakont Andreja Zielcera, jaki padčas abłavy ŭ svajoj kvatery zastreliŭ Dźmitryja Fiedasiuka z KDB. 

«Siońnia adbyłosia zabojstva terarystam aficera KDB. Praviarali kvatery pa spravie ab teraryźmie. U adnoj sapraŭdy taki i akazaŭsia. Ałharytm dalejšych dziejańniaŭ zrazumieły: terarystaŭ škadavać nie buduć, supraćstajańnie pierachodzić na bolš vysoki ŭzrovień žorstkaści», — kamientavaŭ Šaŭcoŭ.

Pavialičyć

A voś što jon kazaŭ pra nacyjanalny bieł-čyrvona-bieły ściah:

«Źviartajemsia da darosłaha kantynhientu našaj krainy i da piedahohaŭ. Ściah byŭ bieł-čyrvona-bieły pryznany aficyjna na karotki pramiežak času da taho, kali refierendum i narod skazaŭ: «Nie, prybirajem». Jon byŭ. I ŭ voś hety pramiežak času (z 1995 hoda pa siońnia, pa 2020 hod) my razarvali heta paniaćcie. My dazvalali chadzić niejkaj maleńkaj žmieńcy ludziej, jakija viečna nazyvali siabie BNF, jašče niejkim tam čynam. Tak. Dzieści tam pajšli, źnikli, potym praz hod znoŭ jany na Dzień Voli pračnulisia. My heta dazvalali, my nie tłumačyli ludziam, što heta za ściah.

Jaho na praciahu 100 hadoŭ kraina zrynała. U pačatku, u siaredzinie, u kancy stahodździa — pastajanna. Kolki možna vykidvać jaho ad nas? Kraina prosta vyryhała hety ściah ubok, a jon usio roŭna padymaŭsia».

Adkryta parušaje statut Čyrvonaha Kryža 

Adnojčy Šaŭcoŭ vykazaŭsia nakont temy ŁHBT. U efiry dziaržkanała jon nazvaŭ heta «vyčvarenstvami».

Pavialičyć

«Bo dzicia hladzić na siamju. Kali ŭ siamji narmalnyja čałaviečyja kaštoŭnaści, kali ŭ hramadstvie nieciarpimaść da padobnaha rodu vyčvareńniaŭ… Ja zaŭsiody kažu, što heta ŭsio ž taki psichičnaje adchileńnie i zachvorvańnie, tamu jaho treba lačyć… Nietradycyjnyja kaštoŭnaści prapahandujucca praz multfilmy i filmy dla padletkaŭ. Heta robicca dla źniščeńnia cełych cyvilizacyj, krain, hramadstvaŭ», — skazaŭ tady Šaŭcoŭ.

Jahonyja vykazvańni vyklikali reakcyju mižnarodnaj pravaabarončaj supolnaści. Tak, Jeŭrazijskaja kaalicyja zdaroŭja i pravoŭ, hiendarnaj i seksualnaj raznastajnaści nahadała, što Mižnarodny Čyrvony Kryž pastajanna padkreślivaje ŭraźlivaść ŁHBT-supolnaści, što takija vykazvańni supiarečać asnoŭnym pryncypam dziejnaści tavarystva, u jakich dekłarujecca pavaha da čałaviečaj hodnaści va ŭsich vypadkach. Pra reakcyju Mižnarodnaha Čyrvonaha Kryža na zajavy pravaabaroncaŭ nieviadoma.

Pavialičyć

Apošni raz Šaŭcoŭ adznačyŭsia dniami, kali pajechaŭ na akupavanyja terytoryi Ukrainy z humanitarnym hruzam. Pa lehiendzie rasijskich miedyja, jon «asabista pierakanaŭsia, što ŭsie dzieci z DNR viarnulisia dadomu».

Niuans u tym, što pierad kamierami jon byŭ z Z-simvolikaj, što taksama prama zabaraniaje status Čyrvonaha Kryža.

Nahadajem, Biełaruski Čyrvony Kryž — całkam praŭładnaja arhanizacyja. Jaje siabry časta ŭdzielničajuć u vybarčych kamisijach. Čyrvony Kryž nie naviedvaŭ palitviaźniaŭ u kałonijach, choć maje takuju mahčymaść: pradstaŭnica tavarystva Ina Lemiašeŭskaja ŭvachodzić u skład Respublikanskaj hramadskaj naziralnaj kamisii pry Ministerstvie justycyi.

• 2
• 0
• 1
• 8
• 3
• 4
• 44
• 0