Mižnarodny Čyrvony Kryž adchryściŭsia ad pajezdak Šaŭcova na Danbas
Biełaruski Čyrvony Kryž niadaŭna trapiŭ u skandał paśla taho, jak jaho hienieralny sakratar Dźmitryj Šaŭcoŭ zaśviaciŭsia na Danbasie z Z-simvolikaj i paćvierdziŭ, što jany dapamahajuć vyvozić dziaciej z akupavanych terytoryj Ukrainy. Mižnarodny ofis Čyrvonaha Kryža adreahavaŭ na situacyju.
Mižnarodnaja fiederacyja tavarystvaŭ Čyrvonaha Kryža i Čyrvonaha Paŭmiesiaca (IFRC) piša, što daviedałasia sa ŚMI pra vizit hienieralnaha sakratara Biełaruskaha Čyrvonaha Kryža ŭ Łuhansk i Danieck.
«Nam nie paviedamili pra hety vizit, i my nie ŭdzielničali ni ŭ jakich mierapryjemstvach, uklučajučy vyvaz dziaciej.
IFRC nadzvyčaj surjozna stavicca da dziejańniaŭ luboha z našych nacyjanalnych tavarystvaŭ Čyrvonaha Kryža abo Čyrvonaha Paŭmiesiaca, jakija supiarečać našaj humanitarnaj misii, asnovatvornym pryncypam i palitycy.
Tamu IFRC pieradała hetuju spravu ŭ Kamitet pa vykanańni patrabavańniaŭ i pasiarednictvie, jaki, pavodle našaj Kanstytucyi, źjaŭlajecca niezaležnym orhanam, jaki rasśleduje i likviduje mierkavanyja parušeńni dobrasumlennaści.
Nadzvyčajnyja abstaviny hetaha vizitu, uklučajučy vykarystańnie simvała, jaki asacyjujecca z adnym z bakoŭ mižnarodnaha ŭzbrojenaha kanfliktu va Ukrainie, zakranajuć asnoŭnyja pryncypy mižnarodnaha ruchu Čyrvonaha Kryža i Čyrvonaha Paŭmiesiaca. Vizit i źviazanyja ź im mierapryjemstvy nie byli ŭzhodnienyja ź inšymi kampanientami ruchu, jak taho patrabujuć našy ŭnutranyja praviły i pradpisańni.
Hetyja dziejańni ryzykujuć padarvać davier da našaj pracy pa padtrymcy supolnaściaŭ, jakija majuć patrebu, kim by jany ni byli i pa jaki b bok frontu jany ni znachodzilisia. Vielmi važna, kab usie kampanienty mižnarodnaha ruchu Čyrvonaha Kryža i Čyrvonaha Paŭmiesiaca zachoŭvali svaju niezaležnaść ad uradaŭ i nośbitaŭ zbroi».
Mižnarodny ofis paviedamlaje, što źviazaŭsia ź biełaruskim Čyrvonym Kryžam, kab vykazać zakłapočanaść i spynić lubuju padobnuju dziejnaść u budučyni.
«Važna adznačyć, što Hienieralny sakratar Biełaruskaha Čyrvonaha Kryža nie vystupaje ad imia IFRC abo jakoha-niebudź inšaha kampanienta ruchu, i jaho zajavy nie adlustroŭvajuć našaha punktu hledžańnia.
Usie siabry Nacyjanalnaha hramadstva IFRC źviazany asnovatvornymi pryncypami ruchu, našymi ŭnutranymi praviłami i palitykaj, uklučajučy palityku IFRC u halinie abarony, hiendara i inkluziŭnaści, u jakoj jany abaviazvajucca zabiaśpiečvać abaronu dziaciej».
Nahadajem, pra sadziejničańnie Biełaruskaha Čyrvonaha Kryža vyvazu dziaciej zajaŭlaŭ sam Šaŭcoŭ na BT, a taksama deputatka Pałaty pradstaŭnikoŭ Ludmiła Makaryna-Kibak.
Biełaruskaja deputatka: Dziaciej z Ukrainy vyvoziać pry sadziejničańni AAN i Čyrvonaha Kryža
Uznačalvaŭ vybarčyja kamisii, choča lačyć hiejaŭ, ekśpiert pa ŭsich pytańniach. Chto taki Dźmitryj Šaŭcoŭ, jaki kiruje Biełaruskim Čyrvonym Kryžam
Kiraŭnik Biełaruskaha Čyrvonaha Kryža, jaki zaśviaciŭsia z Z-simvolikaj, raskazaŭ, što robić na Danbasie
NAU pieradało ŭ Haahu dokazy vajennych złačynstvaŭ Łukašenki i jahonych prychilnikaŭ
Hajdukievič uziaŭ novy ŭzrovień chamstva — prapanavaŭ znajści žančyn, jakija aceniać, ci jaho člen byŭ na dykpiku11
Kamientary