«Nacysckija satanisty ŭmacavalisia ŭ cviatym ruskim horadzie Kijevie». Stała viadoma, jak rasijskaja i łukašenkaŭskaja prapahanda budzie raskazvać pra Chryščeńnie Rusi
Rasijskija dziaržaŭnyja i praŭładnyja ŚMI atrymali čarhovuju mietadyčku z Administracyi prezidenta RF. U joj pieraličana, što mienavita prapahandysty pavinny raspavieści rasijanam u svaich materyjałach da čarhovaj hadaviny Chryščeńnia Rusi, jakaja adznačajecca siońnia 28 lipienia. Dakumient jość u rasparadžeńni «Mieduzy».
U tekście prosta pakazvajecca, što hetu padzieju treba nazyvać «klučavym pavarotam rasijskaj historyi» i «kropkaj stanaŭleńnia dziaržaŭnaści». Prapahandysty pavinny padkreślić, što mienavita «ahulnaja viera» dazvoliła «ŭschodniesłavianskim plamionam» stać «adzinym narodam».
Asablivaja ŭvaha ŭ dakumiencie nadadzienaja niejkim «praciŭnikam Rasii», jakija nibyta zmahalisia z pravasłaŭjem va Ukrainie, Biełarusi i Polščy. Pra apošniuju, u pryvatnaści, havorycca: «polskija karali ŭkaraniali katalicyzm i ŭnijactva na akupavanych spradviečna ruskich terytoryjach, kab razdrabnić narod i padparadkavać jaho sabie».
Jašče ahresiŭniej u tekście havorycca pra Ukrainu. Składalniki mietadyčki nazyvajuć aficyjny Kijeŭ «vieraadstupnickim režymam», jaki viadzie baraćbu suprać Ukrainskaj pravasłaŭnaj carkvy, kab «źniščyć duchoŭnyja suviazi brackich narodaŭ». Pra toje, što paśla rasijskich abstrełaŭ u Adesie byŭ źniščany Spasa-Praabraženski sabor, u tekście AP zhadak niama.
Vypravić situacyju z pravasłaŭjem va Ukrainie, pavodle acenki aŭtaraŭ mietadyčki, pavinien, viadoma, Uładzimir Pucin. Prapahandysty abaviazanyja rastłumačyć rasijanam, što mienavita jon nibyta «viarnuŭ Rasii misiju abaroncy pravasłaŭnaj viery».
«Siońnia naša kraina zmahajecca z novym sataninskim režymam. Kijeŭski režym metanakiravana źniščaje pravasłaŭje na terytoryi Ukrainy, akazvajučy pramy cisk na śviataroŭ i adbirajučy carkvy. Nacysckija satanisty ŭmacavalisia ŭ śviatym ruskim horadzie Kijevie, dzie Ruś pryniała chryščeńnie. Rasija ŭstała na abaronu pravasłaŭnaj viery i hramić na frantach nieanacystaŭ, jakija pakłaniajucca akultnym idejam Hitlera i Bandery», — havorycca ŭ mietadyčcy.
U asabistuju zasłuhu Pucinu taksama stavicca «padtrymka adradžeńnia pravasłaŭja» i «restaŭracyja cerkvaŭ» u Rasii. Blizkaja da Kramla krynica «Mieduzy» padkreśliła, što heta nie vypadkovaść i kolkaść padobnych zhadak Pucina ŭ prapahandzie budzie tolki raści ŭ ramkach padrychtoŭki da prezidenckich vybaraŭ 2024 hoda: «Heta treba dla vybarčaj kampanij. Prezidenta buduć źviazvać z kožnaj padziejaj. Kab jaho imia hučała zaŭsiody».
Pačynajučy z 2020 hoda, łukašenkaŭskaja prapahanda pracuje pa mietadyčkach rasijskaj i paŭtaraje ŭsie asnoŭnyja ich ustanoŭki.
Kamientary
Potomu i biesnujutsia.
Kakim bokom Orda Moskvy, Moskovskij Ułus Ordy, Moskovskoje Chanstvo, Rośsijskaja Impierija, Rośsija k Kijevskoj Rusi i Kijevu??!!
Tolko odnim - VOROVSTVOM ČUŽOHO i UBIJSTVAMI CHOZIAJEVOV NAVOROVANNOHO!