Karpy, amury, taŭstałobiki, ščupaki, akuni i płotki zahinuli ŭ voziery pamiž vioskami Viažuć i Turec-Bajary Maładziečanskaha rajona. Stanam na ranicu sierady z voziera dastali 2 tony 640 kiłahramaŭ ryby. Ale dastavać z vady jaje praciahvajuć dahetul.
Namieśnik načalnika Maładziečanskaj mižrajonnaj inśpiekcyi achovy žyviolnaha i raślinnaha śvietu Siarhiej Jazubiec paviedamiŭ Kraj.by, što pra zdareńnie stała viadoma ŭviečary ŭ subotu, 29 lipienia. Vadajom, u jakim adbyŭsia masavy mor ryby, — voziera, arandavanaje fiermierskaj haspadarkaj «La piasku».
— Nakolki mnie viadoma, u subotu ŭviečary sabrali 1 tonu 300 kiłahramaŭ miortvaj ryby. Traplalisia taŭstałobiki vahoj pa 6-7 kiłahramaŭ. Pa adnoj ź viersij, pryčynaj mora moh stać źliŭ u vadajom niejkaha rečyva, jakoje spravakavała rezkaje padzieńnie kancentracyi kisłarodu ŭ vadzie, — skazaŭ Siarhiej Jazubiec.
Administratar fiermierskaj haspadarki Viktar Hančarenka raskazaŭ nastupnaje:
«My try hady arandujem hetaje voziera, razvodzim tut rybu i arhanizujem płatnuju rybałku. Miascovyja žychary kažuć, što voziera naohuł było miortvym, pakul naša haspadarka nie ŭziała jaho ŭ arendu. Navat kali ryba tut zavodziłasia, jana tut ža hinuła. U nas hetyja try hady ryba razmnažałasia. Tolki ŭ krasaviku vada ŭ voziery pamutnieła, ale my vyklikali ekołahaŭ, i paśla ich umiašańnia ŭsio znoŭ stała narmalna. I raptam uviečary 29 lipienia miortvuju rybu stała prybivać da bieraha. Zahinuŭšy, jana apuskałasia na dno, tam padhnivała i potym uspłyvała na pavierchniu vady. My źbirali jaje, kab nie śmiardzieła. Zahinuli karp, amur, taŭstałobik, ščupak, akuń i płotka. Kala 22:00 my vyklikali milicyju.
Na miesca zdareńnia pryjazdžali supracoŭniki inśpiekcyi pryrodnych resursaŭ i achovy navakolnaha asiarodździa, jakija ŭziali zahinułuju rybu na ekśpiertyzu. Ułasnuju pravierku pravodzić Śledčy kamitet.
Pa viersii Viktara Hančarenki, da ekałahičnaha kałapsu moža być datyčny Malinoŭščynski śpirtaharełačny zavod «Akvadziŭ», jaki nibyta moh skinuć u vadu škodnyja adkidy svajoj vytvorčaści, i jany pa kanałach patrapili ŭ voziera, spravakavaŭšy mor ryby.
«Akvadziŭ» kateharyčna admaŭlaje svajo dačynieńnie da incydentu
Pradstaŭnik zavoda 1 žniŭnia vykazaŭ pazicyju pradpryjemstva:
— Skažycie, a što, Śledčy kamitet užo pryjšoŭ da niejkich vysnoŭ, jakija dazvalajuć abvinavacić naš zavod u tym, što zahinuła ryba? Barda (śvietła-karyčnievaja vadkaść, adchody vytvorčaści pry atrymańni etyłavaha śpirtu) sama pa sabie nie moža pryvieści da takich nastupstvaŭ. Usie abvinavačvańni ŭ naš adras nie abhruntavanyja. Naš zavod nie maje da hetaha nijakaha dačynieńnia. Chaj raźbirajucca ekołahi i pravaachoŭnyja orhany. Kali na padstavie ich zaklučeńniaŭ nam buduć pryznačanyja niejkija štrafy, to my hatovyja ich vypłacić, ale nijakaj škody nie budziem kampiensavać na padstavie hałasłoŭnych abvinavačvańniaŭ.
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič10
Kamientary