Vyjšaŭ novy tom miemuaraŭ Sarkazi, dzie jon apisvaje Mierkiel, Abamu i Pucina
Były prezident Francyi Nikala Sarkazi ŭ trecim tomie svaich uspaminaŭ nie chavaje svajho pierakanańnia, što los Ukrainy pavinna vyrašać Rasija.
U Francyi vyjšaŭ treci tom uspaminaŭ Nikala Sarkazi pad nazvaj «Čas bitvaŭ» (Le Temps des Combats), jaki achoplivaje pieryjad 2009-2011 hadoŭ — čas, jaki papiaredničaŭ «Arabskaj viaśnie» i na jaki prypała padrychtoŭka Rasii da anieksii Kryma. Ahlad knihi zrabiła francuzskaje vydańnie Le Monde.
Vydańnie adznačaje, što ŭspaminy amal piatnaccacihadovaj daŭniny prasiaknutyja rozdumami ab siońniašnim momancie i nahadvaje, što jašče da vydańnia knihi, 16 žniŭnia Sarkazi daŭ intervju Le Figaro, jakoje ŭžo vyklikała sprečki.
Sarkazi dystancujecca ad ciapierašniaha prezidenta Emanuela Makrona, jakoha jon padtrymaŭ u prezidenckich vybarach 2022 hoda, u niekalkich pytańniach. Pieršy — Ukraina. Były prezident krytykuje ciapierašniaha za «bieśpierapynnuju płyń zbroi adnamu z vajujučych bakoŭ» i asudžaje «vyhodnyja pazicyi» tych, chto zaklikaje padtrymlivać Ukrainu «da kanca».
Jon zadaje rytaryčnaje pytańnie: «Chiba razumna vieści vajnu, nie viedučy jaje, i ŭdzielničać u kanflikcie, nie turbujučy siabie ŭdakładnieńniem met i zadač, jakich my žadajem dasiahnuć?».
Sarkazi ličyć, što niemahčyma viarnuć raniejšyja miežy, nie važna, idzie razmova pra Krym ci Danbas. U abodvuch vypadkach jon prapanuje pravieści refierendumy pad nahladam mižnarodnaj supolnaści.
Nikala Sarkazi ličyć, što Ukraina, «most pamiž Jeŭropaj i Rasijaj», nie pavinna ŭstupać ni ŭ NATA, ni ŭ Jeŭrasajuz, a zastavacca «niejtralnaj». Jon zaklikaje adnavić dyjałoh z Uładzimiram Pucinym, jakoha jon zaŭsiody ŭsprymaŭ jak «racyjanalnaha» surazmoŭcu. «Abaviazak prezidenta Francyi — trymać adkrytym šlach dla dyjałohu z Rasijaj», — zajaŭlaje Sarkazi.
Druhoj krainaj, pa jakoj krytykuje Nikala Sarkazi pazicyju Makrona, źjaŭlajecca Ałžyr. Sarkazi nie vieryć u mahčymaść palapšeńnia adnosin z Ałžyram, da čaho Emanuel Makron imkniecca. Jon papiaredžvaje jaho, što nie varta šukać «štučnaha siabroŭstva» z ałžyrskimi lidarami, jakija pastajanna vykarystoŭvajuć Francyju «ŭ jakaści achviarnaha kazła, kab schavać svaje ŭłasnyja zahany i niedalehitymnaść».
Heta moža pryvieści da «straty ŭsiaho»: «My nie zavajujem davieru Ałžyra, a stracim davier Maroka», upeŭnieny były prezident, jaki taksama škaduje ab źnižeńni ŭpłyvu Francyi ŭ Afrycy.
Vydańnie adznačaje, što, škadujučy ab «uražańni biezdapamožnaści, jakoje stvarajecca dziejnym uradam», aŭtar nanosić niekalki ŭdaraŭ pa nibyta «novym śviecie», «padmanie, pastcy dla naiŭnych», śviecie, «jaki staŭ zanadta pradkazalnym i sumnym», dalokim ad palityki («prafiesii, jakaja nie ciarpić impravizacyi»), jakuju jon lubiŭ.
«Emanuel Makron dumaje, što jon moža kantralavać čas… Ja ž liču, što čas nie naležyć nam i što chutkaść vykanańnia źjaŭlajecca najlepšaj, kali nie adzinaj prastoraj dla manieŭru prezidenta Respubliki. U hetym ja adroźnivajusia ad ciapierašniaha prezidenta», — zajaŭlaje Sarkazi.
U svajoj knizie Nikala Sarkazi, siarod inšaha, raskazvaje pra svaje adnosiny z zamiežnymi lidarami. Jon apisvaje zabaŭnyja i niezvyčajnyja epizody. Naprykład, žudasny abied z premjer-ministram Turcyi Redžepam Taipam Erdahanam, ź jakim u jaho niama nivodnaha punkta sudakranańnia.
Abo jaho pastajannaje razdražnieńnie z nahody Anhieły Mierkiel, jakuju jon paprakaje ŭ «bajaźlivaści» i bojazi ryzykavać. «Jana pahadžałasia iści za mnoj, ale kolki enierhii i času stračana», uzdychaje Sarkazi, apisvajučy siabroŭstva i franka-hiermanskuju voś supracoŭnictva jak «kryžovy šlach, taki ž nieabchodny, jak i stamlajučy».
Sarkazi ŭzhadvaje, što admoviŭsia vypić z Anhiełaj Mierkiel u kułuarach samitu G8 u Davili (departamient Kalvados) u 2011 hodzie, dziela taho kab syści da svajoj žonki Karły Bruni, jakaja była ciažarnaja ich dačkoj Džulijaj, u ich numar u hateli Royal.
Nikala Sarkazi nie chavaje svajho rasčaravańnia źjaŭleńniem Baraka Abamy na mižnarodnaj arenie praz hod paśla svajho ŭstupleńnia na pasadu prezidenta Francyi.
Jon charaktaryzuje Abamu jak «chałodnaha, zamknionaha čałavieka, jaki prajaŭlaje davoli słabuju zacikaŭlenaść da navakolnych ludziej».
Čytajcie jašče:
Nikala Sarkazi nazvaŭ Krym «histaryčnaj rasijskaj terytoryjaj»
Eks-prezidenta Francyi Nikala Sarkazi asudzili na hod turmy
Eks-prezident Francyi Sarkazi zajaviŭ pra zaniapad Jeŭropy
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ6
Kamientary