Rasijskaja armija viadzie masiravany šturm Aŭdziejeŭki. Što tam adbyvajecca i čamu heta važna
Sproba rasijskich vojskaŭ prasunucca ŭ rajonie ŭkrainskaha horada Aŭdziejeŭka, jakuju ŭ rasijskich kalavajennych sacsietkach nazyvajuć šturmam, davoli łahičnaja z punktu hledžańnia ahulnaj situacyi na froncie, piša vajenny karespandent Bi-bi-si Pavieł Aksionaŭ.
Horad — centr vialikaha vystupu, jaki ŭdajecca ŭ rasijskuju abaronu, i zrezać jaho — vialikaja spakusa dla rasijskaha kamandavańnia. Heta dazvoliła b adsunuć liniju frontu ad Daniecka.
Ale jašče važniej dla rasijskich sił adciahnuć ukrainskich vajskoŭcaŭ ad inšych rajonaŭ — ad nastupu ŭ Zaparožskaj vobłaści i ŭ rajonie Bachmuta.
Samu Aŭdziejeŭku i jaje navakolle ŭkrainskija vojski ŭtrymlivajuć z 2014 hoda. Horad (dakładniej, toje, što ad jaho zastałosia) ciapier ujaŭlaje ź siabie davoli mocna ŭmacavany rajon.
Jon znachodzicca ŭsiaho za niekalki kiłamietraŭ ad Daniecka, i ŭziać hety pramysłovy pryharad prarasijskija farmavańni sprabavali nie raz. Adno z abvastreńniaŭ zdaryłasia ŭ 2017 hodzie.
Z pačatku poŭnamaštabnaha ŭvarvańnia horad staŭ miescam mocnych bajoŭ. Za hady bajavych dziejańniaŭ z artabstrełami i avijacyjnymi bambardziroŭkami Aŭdziejeŭka była vielmi mocna razburana, horad praktyčna lažyć u ruinach, što ŭskładniaje jaho šturm.
Jašče adzin faktar — najaŭnaść vialikaha zavoda, koksachimičnaha kambinata, jaki moža adnačasova słužyć i bazaj, i ŭmacavanym punktam, šturmavać jaki vielmi ciažka. Praŭda, rasijskija vojski da jaho nie prarvalisia, tak što pra heta havorka nie idzie.
Šturmavać u łob sam horad rasijskija vojski vidavočna i nie sprabujuć — miarkujučy pa miescach bajoŭ, jany chacieli b uziać jaho choć by ŭ apieratyŭnaje atačeńnie, heta značyć, trymać pad abstrełam linii zabieśpiačeńnia. Heta mocna ŭskładniła b abaronu.
Heta možna ličyć kłasičnaj taktykaj šturmu horada — jaho abaranazdolnaść zanadta mocna zaležyć ad zabieśpiačeńnia.
Adnak pakul, niahledziačy na paviedamleńni prarasijskich vajskovych błohieraŭ, prasoŭvańnie rasijskich vojskaŭ pad Aŭdziejeŭkaj bolš čym ścipłaje.
Heta ŭkładajecca ŭ ahulnuju kanvu rasijska-ŭkrainskaj vajny na hetym etapie. Jana kančatkova pierajšła ŭ pazicyjnuju, i nivodny z bakoŭ nie vałodaje nastolki značnaj pieravahaj u sile, kab ździejśnić praryŭ frontu z vychadam na apieratyŭny prastor.
Jak i na inšych kirunkach, dzie rasijskija vojski sprabujuć atakavać, rasijskaje vojska nie moža sabrać dosyć vialiki ŭdarny kułak, kab prabić ukrainskuju abaronu. Rasijskaj armii prosta nie chapaje na heta sił i srodkaŭ.
Mahčyma, heta ŭ chutkim časie pryviadzie da čarhovaha zamirańnia frontu — doŭha i pavolna šturmavać umacavany rajon možna, tolki kali jość vialiki zapas snaradaŭ dla artyleryi i dastatkovaja kolkaść harmat.
Adnak i hetaha, kali ŭziać pad uvahu paviedamleńni, u rasijskaha vojska na hetym učastku niama.
Łukašenka: Chto tam u Rasii viakaje na šmatviektarnaść Biełarusi i vyzvaleńnie palitviaźniaŭ?10
Kamientary