Hadzińniki Viktara Babaryki pradali z aŭkcyjonu z druhoj sproby
Aŭkcyjony pa prodažy dźviuch madelaŭ hadzińnikaŭ eks-pretendenta ŭ prezidenty i eks-bankira adbylisia 26 kastryčnika. Na kožny ź ich zarehistravalisia pa čatyry ŭdzielniki, piša «Lusterka».
Pradavali hadzińniki Vacheron Constantin i Patek Philippe, abiedźvie madeli minuły raz nie byli pradadzienyja.
Na pieršuju madel była pryznačanaja startavaja cana spačatku 39 400 rubloŭ, potym jaje źnizili da 31 520 rubloŭ. U vyniku łot pradali za 48 829 rubloŭ 60 kapiejek.
Madel Patek Philippe była samaj darahoj siarod pradavanych hadzińnikaŭ Babaryki. Pačatkovy košt byŭ 47 500 rubloŭ, paśla jaho źnizili da 38 000 rubloŭ, a na tarhach pradali za 52 560 rubloŭ.
Majomaść Viktara Babaryki pačali pradavać u 2021 hodzie. Z małatka pajšoŭ aryštavany aŭtamabil Ford Fiesta. Taksama vystaŭlali na tarhi aptyčny pryceł, jaki naležyć palityku, i doli ŭ statutnym kapitale troch kampanij — «Pryvatlizinh», «Pravavy dyjałoh» i «Sistemy apracoŭki infarmacyi». U hetym vieraśni pradali siem naručnych chranomietraŭ eks-bankira.
***
Eks-staršynia praŭleńnia Biełhazprambanka Viktar Babaryka 12 maja 2020 hoda zajaviŭ pra svaje prezidenckija ambicyi. Jon sabraŭ rekordnuju kolkaść podpisaŭ — 440 tysiač, adnak jon i jaho syn Eduard, jaki ŭznačaliŭ pieradvybarčy štab, byli zatrymanyja 18 červienia 2020 hoda, kali vieźli podpisy ŭ CVK. Zrazumieła, što da vybaraŭ Babaryku nie dapuścili.
6 lipienia 2021 hoda Viarchoŭny sud asudziŭ Viktara Babaryku na 14 hadoŭ kałonii ŭzmocnienaha režymu. Sud pryznaŭ jaho vinavatym u atrymańni chabaru ŭ asabliva bujnym pamiery arhanizavanaj hrupaj, a taksama ŭ ździajśnieńni finansavych apieracyj sa srodkami, atrymanymi zahadzia złačynnym šlacham (sprava Biełhazprambanka). Jon na sudzie viny nie pryznaŭ. Pakarańnie adbyvaje ŭ navapołackaj kałonii.
Užo roŭna paŭhoda, z 27 krasavika, pra Viktara Babaryku ničoha nie viadoma. Tady źjaviłasia infarmacyja pra toje, što jon u noč na 25 krasavika byŭ špitalizavany ŭ haradskuju balnicu Navapołacka nibyta sa śladami źbićcia i ź pnieŭmatoraksam. Ranicaj 27 krasavika blizkim palityka ŭdałosia paćvierdzić fakt jaho špitalizacyi ŭ chirurhičnaje adździaleńnie. Adnak bolš ničoha pra jaho nie viadoma.
Łukašenka: Bamžoŭ, darmajedaŭ u krainie nie budzie7
Kamientary