Sud u Kałarada zabaraniŭ Trampu ŭdzielničać u prezidenckich vybarach
Što aznačaje heta i ci zmoža 45-y prezident ZŠA ŭdzielničać u budučych vybarach?
Viarchoŭny sud štata Kałarada pastanaviŭ vyklučyć byłoha prezidenta Donalda Trampa sa śpisu kandydataŭ na pasadu prezidenta ZŠA ŭ 2024 hodzie, spasłaŭšysia na artykuł Kanstytucyi ZŠA, jaki zabaraniaje słužbovym asobam, jakija ŭdzielničali ŭ «miaciažy abo paŭstańni», zajmać dziaržaŭnyja pasady, piša Bi-bi-si.
U asnovu sudovaha rašeńnia lehła mierkavanaja rola Donalda Trampa ŭ padziejach 6 studzienia 2021 hoda, kali natoŭp jaho prychilnikaŭ uvarvaŭsia ŭ budynak Kanhresa na Kapitalijskim uzhorku ŭ sprobie asprečyć vyniki prezidenckich vybaraŭ, zhodna ź jakimi pieramohu atrymaŭ jaho supiernik Džo Bajden.
Heta rašeńnie zrabiła Trampa pieršym pretendentam na pasadu prezidenta ŭ historyi ZŠA, kali pryznali, što jon nie maje prava zajmać Bieły dom u adpaviednaści ź vielmi redkaj 14-j papraŭkaj da Kanstytucyi. Niekalki papiarednich sprobaŭ vykraślić Trampa z vybarčaha biuletenia ŭ inšych štatach nie mieli pośpiechu.
Ustupleńnie rašeńnia ŭ siłu prypyniena da 4 studzienia 2024 hoda, kab dać mahčymaść Viarchoŭnamu sudu ZŠA razhledzieć apielacyju.
Pryniataja ŭ aŭtorak pastanova Viarchoŭnaha suda adnosicca tolki da respublikanskich prajmieryz u Kałarada, jakija projduć tam 5 sakavika, i nie raspaŭsiudžvajecca na štaty za jaho miežami. Adnak jana zdolna paŭpłyvać na status Trampa na ŭsieahulnych vybarach 5 listapada.
Pazapartyjnyja prahnozy na budučyja vybary razhladajuć Kałarada jak «biaśpiečny» demakratyčny štat, što aznačaje, što dziejny prezident Džo Bajden, chutčej za ŭsio, pieramoža ŭ štacie niezaležna ad losu Trampa.
Na minułych prezidenckich vybarach Donald Tramp istotna sastupiŭ u hetym štacie svajmu kankurentu. Ale kali sudy ŭ inšych štatach, dzie ŭzrovień supiernictva bolš vysoki, zrobiać tak, jak kałaradski, zajaŭka Trampa na pasadu kiraŭnika Biełaha doma moža sutyknucca z surjoznymi składanaściami.
Anałahičnyja pazovy, jakija raniej byli padadzienyja ŭ štatach Ńju-Hempšyr, Miniesota i Mičyhan, paciarpieli niaŭdaču.
Kampanija Trampa nazvała pastanovu suda całkam pamyłkovaj i niedemakratyčnaj, zajaviŭšy, što jana budzie abskardžanaja ŭ Viarchoŭnym sudzie ZŠA.
«Lidary Demakratyčnaj partyi znachodziacca ŭ stanie paranoi praz rost, daminujučyja pazicyi prezidenta Trampa ŭ apytańniach, — skazaŭ pradstaŭnik pieradvybarnaj kampanii Trampa Styvien Čunh. — Jany stracili vieru ŭ pravalnaje prezidenctva Bajdena i ciapier robiać usio mahčymaje, kab amierykanskija vybarščyki nie vykinuli ich z ofisa ŭ listapadzie nastupnaha hoda».
Čunh dadaŭ, što jurydyčnaja kamanda Donalda Trampa ŭ samyja karotkija terminy padaść apielacyju ŭ Viarchoŭny sud ZŠA.
Respublikanskija zakanadaŭcy taksama asudzili hetaje rašeńnie. U pryvatnaści, śpikier Pałaty pradstaŭnikoŭ Majk Džonsan nazvaŭ jaho słaba zavualavanaj atakaj u intaresach adnoj partyi.
Praciŭniki byłoha prezidenta ZŠA spadziajucca vykarystać hetuju spravu dla aktyvizacyi bolš šyrokich namahańniaŭ pa jaho dyskvalifikacyi i patencyjna pastavić hetaje pytańnie pierad Viarchoŭnym sudom ZŠA.
Pierśpiektyvy hetaha, adnak, nie vyhladajuć pryvabnymi, uličvajučy, što ŭ składzie suda ź dzieviaci členaŭ pierakanaŭčuju bolšaść (6:3) składajuć kansiervatary, uklučajučy troch sudździaŭ, pryznačanych Trampam.
14-ja papraŭka da Kanstytucyi była ratyfikavanaja paśla Hramadzianskaj vajny ŭ ZŠA. Raździeł 3 hetaj papraŭki byŭ vykarystany, kab nie dazvolić sieparatystam viarnucca na raniejšyja dziaržaŭnyja pasady paśla taho, jak paŭdniovyja štaty znoŭ uvojduć u skład Sajuza.
Jana ŭžyvałasia suprać prezidenta Kanfiederacyi Džefiersana Devisa i jaho vice-prezidenta Alaksandra Styviensa, jakija pracavali ŭ Kanhresie, ale z tych časoŭ na jaje spasyłalisia vielmi redka.
Suprać Trampa zaviedzienyja čatyry kryminalnyja spravy, u tym liku adna fiederalnaja i adna sprava ŭ štacie Džordžyja, źviazanyja ź jaho sprobami asprečyć vyniki minułych vybaraŭ.
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8181
Kamientary