Tusiŭ na viečarynkach, haniaŭ na aŭto, mieŭ mianušku «Pinhvin». Što viadoma pra budučaha karala Danii
Napiaredadni Novaha hoda karaleva Danii Marhrete II padniesła svaim paddanym siurpryz, abviaściŭšy, što zrakajecca tronu na karyść syna, prynca Frederyka.
Paśla śmierci brytanskaj karalevy Lizaviety II Marhrete zastavałasia adzinaj kiroŭnaj karalevaj u śviecie i zajmała tron daŭžej za ŭsich dziejnych manarchaŭ Jeŭropy. Jana vyrašyła zaviaršyć svajo vaładarańnie 14 studzienia, roŭna 52 hady praz paśla ŭzychodžańnia na tron.
Budučy karol prajšoŭ šlach ad typovaha tynejdžara, jaki buntavaŭ suprać aŭtarytetu baćkoŭ, da ŭzornaha siemjanina, baćki čatyroch dziaciej, haračaha abaroncy navakolnaha asiarodździa i zmahara sa źmianieńniem klimatu, piša Bi-bi-si.
«Kali pryjdzie moj čas, ja stanu la styrna našaha karabla, — skazaŭ jon u pramovie, pryśviečanaj załatomu jubileju vaładarańnia svajoj maci ŭ 2022 hodzie, — i budu prytrymlivacca taho ž kursu, jakim hety karabiel viali vy, pryniaŭšy styrno z ruk vašaha baćki, znachodziačysia na čale našaj 1000-hadovaj manarchii».
«Prync-tusoŭščyk»
Varta adznačyć, što heta strymanaje zapeŭnieńnie ŭpeŭnienaha ŭ sabie čałavieka mocna adroźnivajecca ad ładu maładoha Frederyka.
«Ščyra kažučy, u maładyja hady jon byŭ buntarom, jakomu było vielmi niaŭtulna ad pastajannaj uvahi ŚMI i ad uśviedamleńnia taho, što ŭ budučyni jon stanie karalom. Jon zdabyŭ upeŭnienaść u sabie tolki ŭ 20 hadoŭ», — skazała žurnalist Hite Redar, što sočyć za karaleŭskaj siamjoj Danii.
U dziacinstvie i junactvie Frederyk vielmi kryŭdavaŭ na svaich baćkoŭ, bo jany, zaniatyja vykanańniem aficyjnych abaviazkaŭ, nie bavili ź im stolki času, kolki jamu b chaciełasia.
Jon šukaŭ suciašeńnia ŭ chutkich aŭtamabilach i burnym śvieckim žyćci, zasłužyŭšy ŭ pačatku 1990-ch reputacyju «prynca-tusoŭščyka».
Adnak jon radykalna źmianiŭsia paśla pastupleńnia ŭ Orchuski ŭniviersitet, jaki ličycca adnoj z samych prestyžnych navučalnych ustanoŭ śvietu. U svoj čas u im ža vučyłasia i Marhrete II.
Naohuł spadkajemca dackaha tronu pavinien vyvučać u im palitałohiju ŭsiaho dva siemiestry, paśla čaho jaho adukacyja ličycca skončanaj. Frederyk, adnak, na hetym nie supakoiŭsia i z 1992 pa 1993 hod vučyŭsia ŭ Harvardskim univiersitecie ŭ Bostanie, dzie zasnavaŭ fond padtrymki studentaŭ z Danii.
U ZŠA budučy karol byŭ zaličany va ŭniviersitet pad psieŭdanimam Frederyk Chiendryksien. U 1995 hodzie jon zdaŭ ekzamien u Kapienhahienie, atrymaŭšy dypłom palitołaha.
Mnohija ličać, što jon pa-sapraŭdnamu ŭśviadomiŭ adkaznaść, jakuju nakładvaje rola budučaha manarcha, tolki padčas słužby ŭ troch vidach Uzbrojenych sił Danii.
U pryvatnaści, jon słužyŭ u korpusie vadałazaŭ vajenna-marskoha fłotu, jaki adroźnivajecca žorstkimi patrabavańniami adboru. Frederyk staŭ adnym z usiaho čatyroch navabrancaŭ, adabranych z 300 dobraachvotnikaŭ.
Tam jon atrymaŭ mianušku «Pinha», abo «pinhvin». Kažuć, što jon atrymaŭ jaje paśla taho, jak adnojčy padčas apuskańnia jaho hidrakaścium napoŭniŭsia vadoj, tak što chadzić narmalna jon nie moh i tolki niazhrabna pieravalvaŭsia, jak pinhvin.
U 2000 hodzie jon taksama vyvučyŭsia na vajskovaha piłota ŭ lotnaj škole VPS Danii ŭ Karupie.
U tym ža hodzie jon uziaŭ udzieł u čatyrochmiesiačnaj łyžnaj ekśpiedycyi praciahłaściu ŭ 3500 km pa Hrenłandyi.
Adnojčy Frederyk skazaŭ, što nie źbirajecca «zamykacca ŭ krepaści» i choča zastavacca «samim saboj». Pakul što ciažka skazać, nakolki jamu ŭdasca prytrymlivacca hetaha pryncypu i paśla ŭstupleńnia na pasad, ale da siońniašniaha dnia ŭ jaho heta niadrenna atrymlivałasia.
Nastolki niadrenna, što jon navat niekalki razoŭ traplaŭ u balnicu paśla niaŭdałych padzieńniaŭ z sanak i skutaraŭ.
Pryncesa z Aŭstralii
Prync Frederyk sustreŭ svaju budučuju žonku Mery Donaldsan na Alimpijskich hulniach 2000 hoda ŭ Sidnei. Skandynaŭskija karaleŭskija siemji pavodziać siabie nie tak čapurysta, jak brytanskija, tak što šluby sa «zvyčajnymi» hramadzianami vyklučeńniem nie źjaŭlajucca.
Adnak spačatku budučy karol vyrašyŭ zachoŭvać inkohnita i pradstaviŭsia budučaj žoncy jak «Fred z Danii». Jany paznajomilisia ŭ pierapoŭnienym pabie, jaki zvaŭsia Slip Inn.
Mery paniaćcia nie mieła, što simpatyčny turyst ź Jeŭropy, ź jakim jana prahavaryła niekalki hadzin, źjaŭlajecca dackim naślednym pryncam. Pierad tym jak raźvitacca, Frederyk paprasiŭ u jaje numar telefona.
Na praciahu hoda raman praciahvaŭsia na adlehłaści, choć čas ad času Frederyk tajemna pryjazdžaŭ u Aŭstraliju, kab sustrecca z budučaj žonkaj. U vyniku ŭ 2001 hodzie Mery pryjechała ŭ Daniju, kab vyvučać dackuju movu.
Mienš čym praz dva hady karaleva Marhrete aficyjna pryznała ich adnosiny, paśla čaho para abviaściła pra zaručyny ŭ zamku Amalijenborh 8 kastryčnika 2003 hoda.
Viasielle adbyłosia ŭ traŭni 2004 hoda. Novaśpiečanaja pryncesa viančałasia ŭ sukiency ad dackaha dyzajniera Ufiera Franka. Bukiet ža niaviesty simvalizavaŭ adnačasova i jaje rodnuju krainu (śniežny eŭkalipt), i krainu, u jakoj joj treba było stać karalevaj (kvietki z sadu karaleŭskaha pałaca).
Mery, jakaja vyrasła na vostravie Tasmanija, a da viasiella była pijar-menedžaram, vydatna spraviłasia sa svajoj novaj rolaj, zdoleŭšy pradstavić datčanam vobraz karaleŭskaj siamji, jakaja idzie ŭ nahu z časam.
Taksama jak i ciapierašni karol Brytanii Karł III, Prync Frederyk prymaje aktyŭny ŭdzieł u baraćbie sa źmienami klimatu.
Jaho rola stała asabliva prykmietnaja paśla praviadzieńnia ŭ Kapienhahienie klimatyčnaj kanfierencyi AAN u 2009 hodzie.
Jon usialak spryjaje tamu, kab Danija zajmała adno ź viadučych pałažeńniaŭ u śviecie ŭ halinie ŭkaranieńnia zialonych technałohij. Jon źjaŭlajecca zastupnikam dackaha dziaržaŭna-pryvatnaha partniorstva «Kraina zialonych».
U 2020 hodzie jon zasnavaŭ «premiju jaho Karaleŭskaj Vysokaści naślednaha prynca Frederyka ŭ halinie mižnarodnaha biźniesu», jakaja ŭručajecca mižnarodnym kampanijam, jakija prykłali asablivyja namahańni dla prasoŭvańnia dackich inavacyj pa ŭsim śviecie.
Akramia taho, budučy karol nadaje ŭvahu palapšeńniu stanovišča ludziej z abmiežavanymi mahčymaściami i spryjaje tamu, kab jak maha bolš datčan z usich słajoŭ hramadstva i lubych uzrostaŭ mieli dostup da navukovaj adukacyi.
U adroźnieńnie ad brytanskaj karaleŭskaj tradycyi, aficyjnaj cyrymonii karanacyi kron-prynca Frederyka nie budzie. Zamiest hetaha pra jaho ŭzychodžańnie na tron budzie abvieščana ŭ zamku Amalijenborh u Kapienhahienie 14 studzienia.
Danija — kanstytucyjnaja manarchija, tamu funkcyi karala simvaličnyja. Ale jon budzie kiraŭnikom dziaržavy nie tolki dla Danii, ale taksama dla Hrenłandyi i Farerskich vyspaŭ.
Chakieist Baskaŭ, vajenkam Kryvanosaŭ, miedyk Rumo. Łukašenka nazvaŭ svaich davieranych asobaŭ3
Kamientary