U śviecie stała mienš ateistaŭ. Ale ŭ Jeŭropie relihija adstupaje
U 2020—2024 hadach adbyŭsia vyrazny spad kolkaści ateistaŭ i ahnostykaŭ — vynikaje z acenak sacyjołahaŭ.
Hałoŭny bienieficyjar novaha trendu — budyzm
Kolkaść niavierujučych imkliva idzie na spad — adznačaje redaktar Business Insider Polska Jacek Frončyk.
Tolki z 2020 pa 2024 hady hłabalnaja kolkaść ahnostykaŭ i ateistaŭ skaraciłasia na 166 miljonaŭ. Kali pahladzim na bolš šyroki časavy haryzont (2010—2024), hetaja ličba składzie amal 188 miljonaŭ.
Tut klučavuju rolu adyhraŭ Kitaj, dzie dziesiacihodździami na dziaržaŭnym uzroŭni prapahandavaŭsia ateizm, jak niekali ŭ Savieckim Sajuzie. Adnak apošnim časam u Padniabiesnaj nazirajecca adychod ad ateizmu.
Adychodziačy ad ateizmu, kitajcy najčaściej addavali pieravahu budyzmu.
Cikava, što padobnaja tendencyja nazirajecca i ŭ Japonii, dzie ateizm taksama sastupaje miesca budyzmu.
Jość taksama kitajcy, jakija, raźvitvajučysia z ateizmam, vybirajuć tradycyjnyja etničnyja relihii. Za čatyry hady kolkaść ich vyznaŭcaŭ pavialičyłasia prykładna na 5,8%.
Musulmanie, induisty, vyznaŭcy judaizmu — ich taksama bolej
Za apošnija čatyry hady kolkaść musulman (sunitaŭ i šyitaŭ) taksama vyrasła.
Najbolšaje pavieličeńnie absalutnych značeńniaŭ adznačajecca ŭ tradycyjna musulmanskich krainach, dzie nasielnictva chutka raście — u Indaniezii, Pakistanie i Banhładeš. Adnosnaje pavieličeńnie zafiksavanaje ŭ krainach, dzie musulmanie — nie karennaje nasielnictva: na Malcie, u Kanadzie i Niderłandach.
Induizm ciapier maje kala 1,1 miljarda prychilnikaŭ, i induistaŭ taksama za čatyry hady stała bolš. Najbujniejšym centram induizmu zastajecca Indyja, dzie kolkaść vyznaŭcaŭ pavialičyłasia na 34 miljony.
Paśladoŭniki judaizmu, jakich bolš za 16 miljonaŭ čałaviek, choć i źjaŭlajucca najmienšaj hrupaj siarod asnoŭnych relihijnych tradycyj, dynamična rastuć u takich krainach, jak ZŠA i Francyja.
Chryścijan stała mieniej, ale kataliki trymajucca
Chryścijan na śviecie kala 2,3 miljarda. Adnak z 2020 pa 2024 hod ich kolkaść źmienšyłasia na 28 miljonaŭ.
Tak, u Mieksicy da chryścijan siabie adnosiać na 10 miljonaŭ mienš ludziej, čym raniej, a ŭ ZŠA — na 8 miljonaŭ.
Siarod chryścijan adnosna lepš za ŭsich trymajucca kataliki. Jany adzinaja bujnaja chryścijanskaja denaminacyja, vyznaŭcy jakoj u suśvietnym maštabie nie tolki nie źmienšyli svajoj kolkaści, ale navat pakazali rost (na 14,3 miljona za čatyry hady).
Značny rost kolkaści katalikoŭ zafiksavany ŭ Brazilii, Demakratyčnaj Respublicy Konha (+6,3 miljona) i ZŠA (+4,5 miljona).
A voś u Polščy kolkaść katalikoŭ źmienšyłasia prykładna na 3,2 młn — kanstatuje Frončyk.
Biełarusy ŭ relihijnym płanie pamiarkoŭnyja
Zhodna z danymi WVS/EVS, biełaruskaja škała ahnastycyzm-relihijnaść (dzie 0 aznačaje poŭny ahnastycyzm, 1 — poŭnuju relihijnaść) składaje 0,42. Biełarusy krychu bolš schilajucca da nierelihijnaści, čym rasijanie (0,53). Siarod krain JEAES Biełaruś maje najnižejšy ŭzrovień relihijnaści.
Siarod krain Centralnaj i Uschodniaj Jeŭropy Biełaruś trymajecca niedzie pasiaredzinie: mienš ahnastyčnaja, čym Čechija (0,26) abo Estonija (0,28). Ale bolš ahnastyčnaja, čym, naprykład, Vienhryja (0,57) abo Litva (0,68).
U paraŭnańni ź niekatorymi zachodnimi krainami, Biełaruś znachodzicca amal na adnym uzroŭni z Hiermanijaj (0,41). Heta vyšej za pakazčyk Šviecyi (0,28), ale nižej za Aŭstryju (0,47) i ZŠA (0,53).
Takim čynam, miarkujučy pa danych WVS/EVS, biełaruskaja relihijnaja kultura zajmaje pramiežkavaje stanovišča pamiž tradycyjna siekularyzavanymi krainami i tymi, dzie relihija mocna ŭpłyvaje na hramadstva.
«Sprava nie ŭ palitycy». Stała viadoma, čamu zakryłasia katalickaja sieminaryja ŭ Pinsku
Mitrapalit Vienijamin nazvaŭ adnu ź pieršych spraŭ Hramadskaj rady pa maralnaści — admianili śpiektakl, jaki pakazvali 10 hadoŭ
«Uśmichnuŭsia i dobrazyčliva kiŭnuŭ». Mahiloŭski biskup raskazaŭ, pra što jon razmaŭlaŭ z Papam u Vatykanie
Što za studentka Uljana, ź jakoj na bali valsiravaŭ Łukašenka?9
Kamientary