Prymać duš treba, siedziačy na ŭnitazie, a hiniekołah prapanuje ŭkałoć botaks. Biełarusku ździŭlaje žyćcio ŭ Paŭdniovaj Karei
«U škole mianie nazyvali tupoj, ale heta nie pieraškodziła mnie pastupić u najlepšuju karejskuju VNU. Mahčyma, maja historyja matyvuje kahości». Biełaruska Ksienija žyvie ŭ Paŭdniovaj Karei i raskazvaje cikavostki pra žyćcio na inšym kancy Ziamli ŭ svaim tyktoku.
Dziaŭčyna viadzie tyktok pad nikam se_na99 i voś čym tam dzielicca.
Matyvacyjaj dla Ksienii stała toje, što nastaŭnicy ŭ himnazii naśmichalisia ź jaje.
— Pamiataju, jak naša kłasnaja kiraŭnica sabrała ŭ kabiniecie dziaŭčynak i začyniła dźviery pierada mnoj. Ja zastałasia ŭ kalidory razam ź jašče adnym chłopčykam i čuła, što adbyvajecca ŭ kłasie. Nastaŭnica skazała, što tyja dziaŭčynki źjaŭlajucca nadziejaj našaj himnazii, u ich jość śvietłaja budučynia, a voś tyja dzieci na kalidory niby takoje słabaje źviano, jany ŭ žyćci stanuć dvornikami i prybiralščykami — ad ich bolš nichto ničoha nie čakaje,
— uspaminała jana ŭ sacsietkach.
Dziaŭčynie tady było vielmi kryŭdna heta čuć, i jana navat na niejki čas straciła matyvacyju vučycca. Ale potym źjaviłasia žadańnie dakazać usim, što jana moža dabicca šmat čaho.
Pakolki dakładnyja navuki davalisia Ksienii ciažka, jana vyrašyła zasiarodzicca na vyvučeńni moŭ. Spačatku była anhlijskaja — heta mova nie vielmi padabałasia, ale dziaŭčyna ŭsio ž vyjšła na ŭzrovień S1. A paźniej jana stała hladzieć karejskija doramy i vyrašyła, što ŭ budučyni choča vyvučyć karejskuju movu. Karejskaja kultura ŭ toj momant jašče nie była vielmi papularnaj u Minsku, tamu šmat chto nie razumieŭ vybar Ksienii. Ale baćki jaje padtrymali.
Paśla himnazii dziaŭčyna pastupiła na fakultet mižnarodnych adnosin u BDU. Užo ŭ pracesie vučoby jana atrymała dva hranty na navučańnie ŭ Karei. A paśla vypusku atrymała treci hrant — i adpraviłasia ŭ krainu svajoj mary vučycca ŭ Sieulskim nacyjanalnym univiersitecie, a taksama vykładać karejskuju movu.
Siarod rečaŭ, jakija šakavali dziaŭčynu ŭ Karei, pieršym punktam idzie nievykanańnie pravił darožnaha ruchu. Toje, što ty stupiŭ na piešachodny pierachod, jašče nie harantuje, što mašyny spynicca. Błohierka skardzicca, što adnojčy joj tak ledź nie najechali na nahu.
Taksama błohiercy padalisia dziŭnymi niekatoryja spałučeńni: naprykład, karejcy lubiać jeści syrnuju picu ź miodam abo sałatu z harodniny, jakaja zapraŭlena sałodkim džemam.
— Što mnie vielmi nie padabajecca ŭ karejskich kvaterach, dyk heta toje, što duš sumieščany z tualetam. Dla mianie da hetaha času dzika, što mycca treba, siedziačy na ŭnitazie. Heta supierniajomka,
— dzialiłasia jana z padpisčykami.
Ździviła biełarusku i toje, što ŭ Sieule, adnym z samych sučasnych haradoŭ u śviecie, da hetaha času zdajuć u arendu kvatery ŭ paŭpadvalnych pamiaškańniach — tam vielmi vysokaja vilhotnaść i šmat ćvili, a ŭletku ich časta zataplaje.
Ale bolš za ŭsio błohierku ŭrazili karejskija standarty pryhažości. Paśla pierajezdu dziaŭčyna pačała dumać, što ŭ jaje jość załysiny na hałavie, a ščykałatki zanadta šyrokija — choć da hetaha była całkam zadavolenaja svajoj źniešnaściu.
— Kali ja pryjšła ŭpieršyniu da karejskaha hiniekołaha i pahladzieła pieralik apieracyj na intymnym miescy, ja była prosta ŭ šoku. Akazvajecca, tudy možna stavić impłanty, adbielvać i kałoć boteks.
Razvažaje ŭ tyktoku Ksienija i pra stereatyp ab tym, što karejanak nazyvajuć mierkantylnymi. Jana zhodna z hetym śćviardžeńniem, ale ličyć, što takija pavodziny całkam abhruntavanyja — i na heta jość try pryčyny.
Pa-pieršaje, žyćcio ŭ Karei vielmi darahoje. Hladzicie sami: minimalnaja zarpłata ŭ miesiac składaje prykładna 2 tysiačy dalaraŭ, ale pry hetym pradukty charčavańnia, kamunalnyja pasłuhi i inšyja abaviazkovyja vydatki daražejšyja, čym u krainach SND u 2-3 razy. A kab nabyć trochpakajovuju kvateru ŭ Sieule, treba zapłacić prykładna miljon dalaraŭ. Tamu karejskija zarobki, choć i ŭražvajuć biełarusaŭ, u toj realnaści vyhladajuć nie vielmi kaśmičnymi.
— Viadoma, lubaja dziaŭčyna, jakaja dumaje pra surjoznyja adnosiny, choča mieć harantyju taho, što vy nie budziecie žyć u paŭpadvalnym pamiaškańni i jeści tolki ramen.
Pa-druhoje, błohierka adznačaje, što ŭ Karei davoli składana hadavać dziaciej (asabliva ŭ finansavym płanie). Jana kaža, što bačyła statystyku: u siarednim siamja da 18-hodździa dziciaci tracić prykładna 100 tysiač dalaraŭ tolki na na jaho dadatkovuju adukacyju (hurtki, siekcyi, repietytaraŭ i kursy).
Moža, mienavita tamu ciapier u Paŭdniovaj Karei mnohija vybirajuć zavodzić sabak, a nie naradžać dziaciej.
— Kali ja ŭpieršyniu pryjechała ŭ Kareju i ŭbačyła žančynu z vazočkam, to mimavoli sastupiła joj darohu. Kali ja paviarnuła hałavu, to ŭbačyła, što ŭ vazočku nie dzicia, a maleńki sabaka, zachutany ŭ pialonki. Ničoha nie maju suprać sabak — ja sama ich lublu i z samaha dziacinstva rasła z sabakam. Ale dla mianie niekatoryja rečy padajucca krychu dziŭnymi. U Karei luboŭ da chatnich hadavancaŭ dachodzić da taho, što ludzi pavodziać siabie z sabakam, jak z maleńkim dziciem. Naprykład, katajuć u vazočku, vodziać u śpiecyjalny sabačy dziciačy sadok. Jość navat restarany dla sabak — «amakasie», — dzie im hatujuć śpiecyjalnyja stravy.
Pa-treciaje, karejanki vychodziać zamuž va ŭzroście kala 30 hadoŭ. Da hetaha času jany atrymlivajuć adukacyju, budujuć karjeru.
— Łahična, što dziaŭčyna nie zachoča sustrakacca z chłopcam, jaki mienš staraŭsia i mienšaha dasiahnuŭ, čym jana sama.
Toje, jak moładź u Paŭdniovaj Karei buduje adnosiny, taksama cikavaja tema.
— U karejcaŭ jość admysłovy etap adnosin — ssom — takija niedaadnosiny. Heta ŭžo nie siabroŭstva, heta pieryjad, kali ludzi pavodziać siabie jak paračka, ale aficyjna jašče paračkaj nie źjaŭlajucca. I samaje cikavaje, što ličycca narmalnym uvieści taki som ź niekalkimi ludźmi adnačasova i vybirać sabie najlepšy varyjant.
Da seksu ŭ hetaj krainie staviacca našmat praściej, čym na postsavieckaj prastory. Tut heta jak zabaŭka, sposab pazbavicca ad stresu ci etap paznavańnia adno adnaho.
— Kali vy stanoviciesia aficyjnaj paračkaj, to zvyčajna heta nichto nie chavaje. Rychtujciesia, što vy budziecie śviatkavać kožnuju hadavinu (naprykład, 100 dzion adnosin), nasić parnyja rečy, vykładvać sumiesnyja fota i tehać adno adnaho ŭ sacyjalnych sietkach.
Taksama ŭ hetaj krainie nie pryniata znajomić z baćkami svajho partniora, kali vy nie razhladajecie jaho jak patencyjnaha muža ci žonku.
Błohierka była ździŭlena, što davoli typovaj u Karei źjaŭlajecca historyja, kali para rasstajecca praz 5-7 hadoŭ adnosin pa niedarečnych dla biełaruski pryčynach.
— Naprykład, moj znajomy rasstaŭsia ź dziaŭčynaj tamu, što jana atrymała stałuju pracu, a jon nie. Tamu jana hatova da šlubu, a jon nie. Niahledziačy na toje, što jany kachali adno adnaho, jany pryniali rašeńnie razyścisia.
Čytajcie taksama:
«Pakaštavaŭ biełaruski ramen — makarona ŭ mačy». Japoniec u Minsku viadzie dziŭny tyktok
Irłandziec teściruje biełaruskija stałoŭki. Voś jakoj ź ich prapanoŭvaje dać mišlenaŭskuju zorku
Kamientary