U Rasii znoŭ zahavaryli pra adzinuju valutu ź Biełaruśsiu. Jość imaviernaść, što piarojduć na jaje?
Ministr finansaŭ Rasii Anton Siłuanaŭ skazaŭ žurnalistam, što adzinaja valuta Biełarusi i Rasii prapisana jak meta, ale da jaje treba jašče dajści i, kali heta zdarycca, nieviadoma. Pierachod na adzinuju valutu jon nazvaŭ vyhadnym dla rasijskaj ekanomiki. «Naša Niva» spytała ŭ ekanamista, nakolki imavierny taki pierachod u pierśpiektyvie i jak heta mahło b paŭpłyvać na Biełaruś.
«Da hetaha jašče daloka»
Ekśpiert BEROC Anastasija Łuzhina adznačaje, što pierachod na adzinuju valutu — zaviaršalnaja prystupka ekanamičnaj intehracyi, kali ekanomiki krain stanoviacca padobnymi adna da druhoj. U našym vypadku hetaha nie nazirajecca.
«Niahledziačy na ŭsio bolšaje zbližeńnie, da hetaha jašče daloka», — adznačaje ekśpiert.
Valutnuju intehracyju aktyŭna abmiarkoŭvali jašče ŭ pačatku nulavych. Isnujuć roznyja formy, jak heta moža adbyvacca.
«Heta moža być stvareńnie adzinaj valuty, pierachod na valutu adnoj z krain abo žorstkaja pryviazka adnoj valuty da inšaj. Biełaruś, naprykład, užo prachodziła etap, kali naš rubiel byŭ žorstka pryviazany da rasijskaha».
Pry pierachodzie na adzinuju valutu spačatku prachodzić praciahły pramiežkavy etap, kali sprabujuć vykarystoŭvać žorstkuju pryviazku valuty albo ŭviadzieńnie ahulnaj raźlikovaj nadnacyjanalnaj adzinki, nie abaviazkova isnujučaj fizična.
«Tolki paśla testavańnia staviać pytańnie ab pierachodzie na ahulnuju adzinuju valutu. U dačynieńni da Biełarusi i RF u hetym płanie jość mnostva niuansaŭ. Pačynajučy z taho, što Rasija — vielmi vialikaja kraina, a Biełaruś u paraŭnańni ź joj — vielmi maleńkaja. Uźnikajuć pytańni, jak buduć prymacca rašeńni ŭ dačynieńni da manietarnaj palityki.
Kali pahladzieć na ciapierašniuju situacyju, to my bačym, nakolki adroźnivajecca manietarnaja palityka ŭ nas i ŭ RF. Kali ŭ Rasii jana davoli žorstkaja, to ŭ nas — nie. U vypadku, kali b u nas byŭ adziny emisijny centr, to pryniaćcie rašeńniaŭ na karyść ekanomiki Rasii mahło b niehatyŭna adbicca na ekanomicy Biełarusi», — adznačaje ekśpiert.
Łuzhina źviartaje ŭvahu, što ŭ takim vypadku važna, jak buduć prymacca rašeńni, ci buduć uličvacca hałasy Biełarusi. Kali ŭ Biełarusi budzie mienš paŭnamoctvaŭ u pryniaćci rašeńniaŭ, to heta značnaje skaračeńnie niezaležnaści Nacyjanalnaha banka i strata instrumientaŭ dla vyraŭnoŭvańnia ekanamičnaj situacyi.
«Akramia taho, pry pierachodzie na adzinuju valutu zakanamierna ŭźnikajuć pytańni ab zbližeńni pa inflacyi, intehracyi ŭ finansavym siektary. Tamu ja nie dumaju, što ŭ bližejšaj pierśpiektyvie varta surjozna pra heta zadumvacca», — ličyć ekśpiert.
«Mocnaj vyhady ni dla adnaho z bakoŭ niama»
«Nie dumaju, što biełaruskija ŭłady chočuć pajści na adzinuju valutu. Dla Biełarusi adzinaja valuta z centram pryniaćcia rašeńniaŭ u Rasii niavyhadnaja. Heta nie admianiaje, što ekanamičnaja intehracyja moža praciahvać ŭzmacniacca. Ale hetyja pracesy mohuć adbyvacca i biez poŭnaha abjadnańnia valutnych rynkaŭ i ŭviadzieńnia adzinaj valuty».
Łuzhina ličyć, što peŭnuju vyhadu ad hetaha mahła b atrymać RF. Adnak u takim vypadku jana atrymaje i dadatkovuju nahruzku.
«U cełym mienavita z punktu hledžańnia ekanomiki ŭźnikajuć pytańni: a ci treba heta i samoj Rasii? Akramia atrymańnia dadatkovych ryčahoŭ upłyvu abo spraščeńnia raźlikaŭ, RF daviadziecca jašče bolš dapamahać ekanomicy Biełarusi».
Mocnaj vyhady z ekanamičnaha punktu hledžańnia ni dla adnaho z bakoŭ niama, miarkuje ekśpiert, i čarhovaje vyniasieńnie hetaha pytańnia ŭ publičnuju prastoru chutčej za ŭsio zastaniecca čarhovaj razmovaj u styli «pahavaryli i zabylisia».
Pucina i Łukašenku z hetaj nahody padździeŭ navat letapisiec Pucina Andrej Kaleśnikaŭ.
«Za 25 hadoŭ jany mahli chacia b damovicca pra adzinuju valutu, pra jakuju pamnohu havorać ź pieršaha dnia. Nie mahli», — napisaŭ jon.
Ź inšaha boku, zajavy Pucina pra stvoranyja ŭmovy dla praviadzieńnia «adzinaj makraekanamičnaj i hrašova-kredytnaj palityki» mohuć mieć na ŭvazie zapusk u chutkim časie bolš ciesnaj intehracyi, jakaja nie zaŭsiody moža być abhruntavana vyklučna ekanamičnymi faktarami.
«Naša Niva» — bastyjon biełaruščyny
PADTRYMAĆ«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ8
Kamientary