Abmien pałonnymi ŭ farmacie «100 na 100» adbyŭsia 8 lutaha ŭ Sumskaj vobłaści Ukrainy na miažy z Rasijaj.
U miežach abmienu pałonnymi Ukraina pieradała Rasiei hramadzianina Biełarusi Maksima Ziaziulčyka, jaki vajavaŭ u padraździele «Vieterany» rasiejskaj pryvatnaj vajskovaj kampanii «Redut» i znachodziŭsia va ŭkrainskim pałonie z 19 vieraśnia 2022 hoda, piša Radyjo Svaboda.
«Maksim Ziaziulčyk zvyčajny vajskovy pałonny. Jon prajšoŭ pavodle pracedury: vajavaŭ za Rasieju i ŭ Rasieju viarnuŭsia», — paviedamili Svabodzie ŭ prajekcie «Chaču žyć», stvoranym va Ukrainie dla rasiejskich vajskoŭcaŭ.
U toj ža čas siarod pieradadzienych Rasijaj ukrainskich pałonnych biełaruskich dobraachvotnikaŭ niama.
31 studzienia Ukraina ŭ miežach abmienu vajskovymi pałonnymi pieradała Rasiei hramadzianina Biełarusi Maksima Zapieku.
Va Ukrainie ŭ pałonie zastajecca jašče adzin biełarus, jaki vajavaŭ na baku Rasiei — Andrej Hieryłovič. Jon vajavaŭ u składzie PVK «Vahnier» i byŭ asudžany va Ukrainie na 9 hadoŭ źniavoleńnia. Hieryłovič trapiŭ va ŭkrainski pałon 16 listapada 2022 hoda niepadalok ad pasiołka Kurdziumaŭka Bachmuckaha rajona Danieckaj vobłaści.
Chto taki Maksim Ziaziulčyk
Maksim Ziaziulčyk naradziŭsia ŭ Rudziensku Puchavickaha rajona Mienskaj vobłaści. Słužyŭ u padraździele «Vieterany» kulamiotčykam-retranślataram z 21 lipienia 2022 hodu. Da 25 žniŭnia jon znachodziŭsia na pazicyjach sił Rasiei ŭ akupavanym horadzie Iziumie Charkaŭskaj vobłaści.
Bataljon «Vieterany» — padraździeł pryvatnaj vajskovaj kampanii «Redut», jakaja spačatku nie ŭdzielničała ŭ bajavych dziejańniach, a vykonvała funkcyju achovy abjektaŭ.
Maksim Ziaziulčyk udzielničaŭ u bajach kala Krasnapolla ŭ Danieckaj vobłaści. U čas bajoŭ za pazicyi ŭ lesapałasie Duby 30 lipienia jon byŭ paranieny i da 25 žniŭnia lačyŭsia na bazie stałaj dysłakacyi «Reduta» ŭ Iziumie Charkaŭskaj vobłaści.
25 žniŭnia ŭ składzie bataljonu «Veterany» jaho pierakinuli na pazicyi kala Svatava ŭ Łuhanskaj vobłaści, dzie išli najbolš žorstkija bai. Paźniej rasiejcy pierakinuli hety padraździeł u Limanski rajon Danieckaj vobłaści.
Urešcie 19 vieraśnia 2022 hoda Maksim Ziaziulčyk trapiŭ u pałon da ŭkrainskich vajskoŭcaŭ. 18 studzienia 2023 hodu sud asudziŭ jaho na 10 hadoŭ pazbaŭleńnia voli — maksimalny termin, praduhledžany pavodle vystaŭlenych jamu abvinavačańniaŭ va ŭdziele ŭ jakaści najmita ŭ zbrojnym kanflikcie, vajennych abo hvałtoŭnych dziejańniach (č. 4 artykułu 447 Kryminalnaha kodeksa Ukrainy).
Paśla sudovaha vyraku SBU paviedamiła, što Maksim Ziaziulčyk byŭ ahientam KDB Biełarusi — nibyta ŭ śniežni 2020 hodu jon pastupiŭ na słužbu ŭ 2-hi antyterarystyčny adździeł KDB na pasadu «vyviednika».
Pavodle lehiendy, jon mieŭsia dziejničać pad vyhladam zamiežnaha najmita, kab sabrać infarmacyju pra ŭzory zamiežnaha ŭzbrajeńnia, jakija atrymlivajuć padraździeły Ŭzbrojenych sił Ukrainy ad zachodnich partnioraŭ, a taksama «vyviedać płany mahčymaha ŭdziełu rasiejskich pryvatnych kampanij u sprobach adchilić ad ułady Łukašenku». Sabranuju infarmacyju jon pavinien byŭ pieradavać u Minsk praz suviaznoha.
«Azaronak — jołupień». Hutarka z pałonnym biełarusam z PVK «Redut» zaciahvaje i pakidaje pytańni
Va Ukrainie asudzili biełarusa-vahnieraŭca. Jon pajšoŭ na pahadnieńnie ab pryznańni viny i paźbieh maksimalnaha terminu
Paźniak napisaŭ adkryty list Łukašenku i Zialenskamu. Prosić abmianiać vajennapałonnych biełarusaŭ na palitviaźniaŭ
Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu7
Kamientary