Karpiankoŭ prakamientavaŭ infarmacyju pra kiepskija adnosiny z Kubrakovym i płany adździalicca ad MUS
Namieśnik ministra ŭnutranych spraŭ i kamandujučy ŭnutranymi vojskami Mikałaj Karpiankoŭ rašyŭ adreahavać na infarmacyju pra jaho ŭ internecie. Zamiest zvykłych abraz apanientaŭ jon niečakana staŭ apraŭdvacca i vychvalać svajho načalnika Kubrakova.
«Naša Niva» niadaŭna sa spasyłkaj na svaje krynicy pisała, što adnosiny pamiž ministram unutranych spraŭ Ivanam Kubrakovym i jahonym namieśnikam Karpiankovym stanoviacca kiepskimi, a Karpiankoŭ płanuje adździaleńnie ŭnutranych vojskaŭ ad MUS u asobnuju strukturu na manier Rashvardyi.
«Zastajecca tolki nieviadomym, ci ŭdasca Karpiankovu pierakanać Łukašenku, za jakim finalnaje rašeńnie», — vykazali mierkavańnie krynicy.
Raniej niekatoryja nazyvali Karpiankova novym Pryhožynym, bo toj stvaryŭ sietku śpiecpadraździaleńniaŭ i ŭziaŭ pad kryło častku vahnieraŭcaŭ u Biełarusi.
Karpiankoŭ u intervju Azaronku nazvaŭ infarmacyju, jakaja raspaŭsiudžvajecca pra jaho, ukidami.
«Surjoznyja ludzi, vysokija słužbovyja asoby, sa mnohimi hetymi momantami jany vielmi surjozna aznajomleny. Niedzie sprabujuć sutyknuć iłbami Ministerstva ŭnutranych spraŭ i ŭnutranyja vojski, niedzie skampramietvać adnosiny pamiž kamandujučym i ministram unutranych spraŭ», — raspłyvista staŭ apraŭdvacca Karpiankoŭ.
Pra ministra Ivana Kubrakova jon skazaŭ, što heta dla jaho «vielmi vialiki načalnik», jaki «mnohimi svaimi dziejańniami zabiaśpiečyŭ pieramohu ŭ 2020 hodzie na vulicach».
Vykazaŭsia Karpiankoŭ i nakont biełaruskaha anałaha Rashvardyi.
«Unutranyja vojski tolki ŭ sistemie orhanaŭ unutranych spraŭ. Nijakich razmoŭ pra Nacyjanalnuju hvardyju, Biełhvardyju nikoli nie viałosia. Tolki ŭ adzinstvie siła. I heta nie toj čas, kab abmiarkoŭvać niejkija reformy i pieraŭtvareńni», — zapeŭniŭ jon.
I jašče raz zrabiŭ revierans u bok Kubrakova, nazvaŭšy jaho «vielmi razumnym i dalnabačnym čałaviekam».
Mikałaj Karpiankoŭ dadaŭ, što ŭsie reformy i idei ŭ vojsku, rašeńnie žyllovych pytańniaŭ — zasłuha ministra. Toj, kaža Karpiankoŭ, pieražyvaje «jak sałdaciki charčujucca».
«Vielmi šmat što va ŭnutranych vojskach na dadzieny momant robicca i ŭ pierśpiektyŭnych płanach raźvićcia. Heta tolki dziakujučy takomu baćkoŭskamu staŭleńniu ministra ŭnutranych spraŭ da ŭnutranych vojskaŭ», — padkreśliŭ Karpiankoŭ.
I jašče raz zapeŭniŭ, što ŭ jaho z Kubrakovym vielmi dobryja adnosiny jak ŭ načalnika i padnačalenaha.
Čytajcie taksama:
«Kali jon stanie ministram, Kubrakoŭ padasca pacanionkam». Historyja žyćcia Mikałaja Karpiankova
Karpiankoŭ choča vyvieści ŭnutranyja vojski ŭ asobnuju strukturu na ŭzor Rashvardyi
Karpiankoŭ źjaviŭsia na vučeńniach z šaŭronam PVK «Vahnier»
Bajeviki «Vahniera» ŭvajšli ŭ skład śpiecnaza MUS Biełarusi? Prynamsi jość dźvie prykmiety
Minskamu biznesmienu Saŭryckamu i jahonaj siamji pahražaje pa 12 hadoŭ za «raspalvańnie varožaści»2
Kamientary