Zahadkavaje zabojstva dvuch piensijanieraŭ u Bychavie: zabojcu znajšli tolki praz 8 hadoŭ
Spačatku padazravanym byŭ syn, jaki va ŭsim pryznaŭsia, ale sprava akazałasia bolš zabłytanaja.
U lipieni 2012 hoda ŭ vioscy Hadylova Bychaŭskaha rajona ŭ adnym z damoŭ adbyłosia žorstkaje zabojstva pary piensijanieraŭ. Kali pryjechali milicyjanty, to pabačyli takuju karcinu: u kalidory na padłozie lažaŭ trup hołaj pažyłoj žančyny, u pakoi na kanapie — jaje muž ź ciažkimi traŭmami (jon paźniej pamior u balnicy). Ich syn spaŭ i byŭ z pabitym tvaram i mocnym pachmiellem. Jon i staŭ padazravanym, raskazvaje historyju «SB».
Anatol Cybulski (toj samy syn) lubiŭ vypić. Časam skandaliŭ z maci i padymaŭ na jaje ruku.
Na dopycie paśla zatrymańnia mužčyna kazaŭ, što nibyta kali pračnuŭsia ranicaj i pabačyŭ baćkoŭ, to zrazumieŭ, što ŭčyniŭ.
Ale ŭspomnić, pry jakich abstavinach zdaryłasia zabojstva, jon nie zmoh. Nastojvaŭ, što padziei viečara ścierlisia z pamiaci. Na jaho adzieńni znajšli kroŭ baćkoŭ.
Jaho maci Nadzieja Cybulskaja atrymała nie mienš za 20 traŭmatyčnych udaraŭ. Ź imi paciarpiełaja mahła pražyć nie bolš za hadzinu — pierałom taza, rebraŭ, padjazyčnaj kostki, razryŭ vucha i inšaje… Baćku Adamu Cybulskamu napadnik złamaŭ skivicu, a ad udaraŭ u hałavu zdaryłasia krovaźlićcio ŭ mozh, što pryviało da mocnaha acioku i śmierci.
Ale vyniki ekśpiertyzy piarečyli tamu, pra što kazaŭ Cybulski-małodšy. Paboi syna nie byli padobnyja na ŭdary na ciele sastarełych baćkoŭ. Da taho ž nad zabitaj ździekavalisia ŭ vyčvarenskaj formie, a syn takoha ŭčynić nie moh.
Pramych dokazaŭ viny Anatola nie było, vymaloŭvałasia kudy bolš niestykovak. U domie chtości jašče byŭ, bo zastaŭsia śled ad bota i pamier nie supadaŭ z pamieram Cybulskaha. A paźniej akazałasia, što pakazańni syna — nie ŭspaminy, a dadumvańnie.
Anatola pratrymali pad vartaj 6 miesiacaŭ i adpuścili.
Vinavataha znajšli tolki praz 8 hadoŭ.
U viečar zabojstva Anatol vypivaŭ u kampanii ź miascovym pastuchom, 18-hadovym Uładzimiram Nikiejenkam. Paśla jaho sychodu źnikła butelka śpirtnoha. Kali Anatol viarnuŭsia da kampanii, zaviazałasia bojka, pastuch źbiŭ mužčynu. Paśla kanfliktu jany razyšlisia. Pastuch pajšoŭ da siabroŭ (heta paćvierdziła jaho dziaŭčyna). Pa spravie jon prachodziŭ śviedkam.
U 2020-m u milicyju pazvaniła žančyna i raskazała, što muž sprabavaŭ jaje zadušyć. Im byŭ toj samy pastuch Nikiejenka (tolki ŭ 2020-m jon užo staŭ ślesaram).
Jaho žonka raskazała, što ŭ toj viečar 2012 hoda Uładzimir patelefanavaŭ i pryznaŭsia, što zabiŭ dvaich ludziej. Ale jana, maŭlaŭ, nie pavieryła: paličyła, što jon mocna pjany i tak žartuje. Bližej da nočy chłopiec pryjšoŭ da doma, dzie znachodzilisia jaho znajomyja i dziaŭčyna. Ledź stajaŭ na nahach.
«U vyniku ja pajšła spać ź im u łaźniu. Ja ŭžo zasnuła, ale pračnułasia ad taho, što mianie niechta dušyć rukoj za šyju. Heta byŭ Vałodzia. Ja spytała jaho: «Ty što, chvory? Što ty robiš?» U adkaz na heta jon staŭ bić mianie pa tvary dałoniami, a kali ja pasprabavała vyskačyć z łaźni, Vałodzia staŭ pierad dźviaryma i skazaŭ, što ja nikudy nie vyjdu. Ja źmiryłasia, znoŭ lahła spać. Jon ža niejak sam supakoiŭsia i loh», — raskazała śledčym žančyna.
Na ranicu Nikiejenka paprasiŭ jaje skazać, što byŭ uvieś viečar ź joj.
Padčas adnaho sa źbićcia mužčyna pahražaŭ žoncy, što zabje jaje i ničoha jamu nie budzie, sprava stanie «visiakom», jak i z Cybulskimi.
Nikiejenku zatrymali. Śled ad bota akazaŭsia jahonym. Na dopycie mužčyna ŭsio raskazaŭ, jak było. Sud daŭ jamu pažyćciovaje pazbaŭleńnie voli.
Hanna Kanapackaja patłumačyła, čamu nie vydalaje zdymki z BČB-simvolikaj z sacsietak. Vy budziecie śmiajacca4
Kamientary