«Ja prosta ŭ ach*i». Pamiatajecie videa pra stan daroh u Homielskaj vobłaści? Prakuratura zaviała kryminałku na darožnikaŭ
Paśla skarhaŭ u internecie na jamy na trasie «miaža RF — Homiel — Kobryn» i bolš za 26 avaryj prakuratura ŭzbudziła kryminalnuju spravu.
Prakuratura Rečyckaha rajona pa vynikach pravierki, praviedzienaj dla ŭstanaŭleńnia pryčyny praciahłaha kapitalnaha ramontu ŭčastka aŭtamabilnaj darohi, uzbudziła kryminalnuju spravu ab złoŭžyvańni słužbovymi paŭnamoctvami pa č. 3 art. 424 Kryminalnaha kodeksa.
Padstavaj dla pravierki stali krytyčnyja vykazvańni hramadzian u internecie nakont šmatlikich jam na darožnym pałatnie i bolš jak 26 DTZ u suviazi z hetym.
Zhodna z materyjałami spravy namieśnik hienieralnaha dyrektara pa budaŭnictvie i načalnik słužby pa techničnym nahladzie za budaŭnictvam RUP «Homielaŭtadar», dyrektar filijała darožna-budaŭničaha ŭpraŭleńnia №17 AAT «Darožna-budaŭničy trest №2 h. Homiela» z karyślivaj i asabistaj zacikaŭlenaści arhanizavali składańnie zaviedama falšyvych aficyjnych dakumientaŭ. To-bok rabili ramont na papiery.
U pryvatnaści, pavodle śledstva, jany ŭnieśli ŭ ich niedakładnyja źviestki i zapisy ab vykanańni rabot pa kapitalnym ramoncie ŭčastka aŭtamabilnaj darohi M-10 «miaža Rasijskaj Fiederacyi (Sielišča) — Homiel — Kobryn». Zatym skłali i padpisali akty vykananych budaŭničych i inšych śpiecyjalnych mantažnych rabot za śniežań 2023 hoda, a taksama daviedki ab košcie hetych rabot.
Padazravanych vinavaciać, što jany niezakonna atrymali ź biudžetu bolš za 3 młn rubloŭ.
Jak piša prakuratura, kapitalny ramont abjekta «Aŭtamabilnaja daroha M-10 hranica Rasijskaj Fiederacyi (Sielišča) — Homiel — Kobryn» vykonvaŭsia ŭ ramkach realizacyi Dziaržaŭnaj prahramy «Darohi Biełarusi na 2021-2025 hady».
Trasa M-10 stała viadomaj u tyktoku paśla ŭražvalnaha videa, jakoje pahladzieli bolš za 800 tysiač razoŭ.
Hanna Kanapackaja patłumačyła, čamu nie vydalaje zdymki z BČB-simvolikaj z sacsietak. Vy budziecie śmiajacca4
Kamientary