Pamiežnaja achova Polščy pryznała bolš pilny nadhlad padarožnikaŭ na miažy ź Biełaruśsiu i rastłumačyła heta «pahrozami nielehalnaj mihracyi», praź jakija słužboŭcaŭ z punktu ŭ Terespali pierakidvajuć na strymlivańnie mihrantaŭ u lasach. Pra heta viedamstva paviedamiła «Biełsatu».
«Biełsat» skiravaŭ zapyt u Pamiežnuju achovu Polščy 3 krasavika, kali ŭ Breście ŭtvaryłasia čarha z 370 lehkavikoŭ i 38 aŭtobusaŭ. U čatach, dzie padarožniki abmiarkoŭvajuć minańnie miažy, abražali polskich słužboŭcaŭ, narakajučy, što tyja marudna pracujuć i nie adkryvajuć usich kanałaŭ u terminale.
Tady taksama źjaviłasia nieaficyjnaja infarmacyja, što na polskim baku słužboŭcy nie śpiašajucca i zanadta pilna ŭsich i ŭsio praviarajuć, bo pamiežniki złavili mihranta, jaki trapiŭ na terytoryju susiedniaj krainy ź Biełarusi.
Śpikier Nadbužanskaha adździeła Pamiežnaj achovy Polščy, jaki kiruje punktam propusku ŭ Terespali, Darjuš Sienicki ŭ kamientary «Biełsatu» paćvierdziŭ, što mihracyjny kryzis, za jaki adkaznyja ŭłady Biełarusi, adbivajecca na chutkaści afarmleńnia padarožnikaŭ:
«Raptoŭnyja, niepradbačanyja padziei, što niasuć prykmiety niedatykalnaści dziaržaŭnaj miažy, jakija ŭźnikajuć u vyniku mihracyjnaha cisku na polska-biełaruskaj miažy, mohuć abumović nieabchodnaść pryniaćcia dynamičnych i rašučych zachadaŭ. Hetyja zachady praduhledžvajuć pierasoŭvańnie najaŭnych asabovych resursaŭ supracoŭnikaŭ ad pamiežnych praviarańniaŭ dla achovy dziaržaŭnaj miažy na miescach tak zvanaj zialonaj miažy».
Sienicki papraknuŭ biełaruskich kalehaŭ u «niedastatkovaj achovie dziaržaŭnaj miažy»:
«U źviazku ź niedastatkovaj achovaj dziaržaŭnaj miažy na biełaruskim baku my taksama abaviazanyja ładzić bolš detalovy kantrol asobaŭ, jakija ŭjazdžajuć u Polšču — až da času, pakul nie źniknie realnaja pahroza nielehalnaj mihracyi. Realizacyja hetych zachadaŭ u achovie dziaržaŭnaj miažy jość adkazam na časovyja pahrozy nielehalnaj mihracyi».
Adnačasova pradstaŭnik Nadbužanskaha adździeła Pamiežnaj achovy Polščy zapeŭniŭ, što ŭ terespalskim punkcie «adekvatna vykarystoŭvajuć najaŭnuju infrastrukturu», a ŭ pryjarytetnym paradku tam afarmlajucca mienavita aŭtobusy.
Pavodle Dziaržaŭnaha pamiežnaha kamiteta Biełarusi, na momant publikacyi ŭ čarzie na vyjezd u Polšču — 250 lehkavych aŭto i 35 aŭtobusaŭ. Z taho boku na zajezd u našuju krainu čerhaŭ niama.
Hajdukievič uziaŭ novy ŭzrovień chamstva — prapanavaŭ znajści žančyn, jakija aceniać, ci jaho člen byŭ na dykpiku11
Kamientary