Biełarusy napisali 40 tysiač danosaŭ? Nie, heta niepraŭdzivaje śćvierdžańnie
«Kibierpartyzany» apublikavali bazu z 40 tysiač zvarotaŭ, dasłanych na sajt KDB za apošniaje dziesiacihodździe. Imidž KDB taki, što na pobytavym uzroŭni badaj luby zvarot u śpiecsłužbu ŭsprymajecca jak danos. A ličba 40 tysiač uražvaje i vyklikaje asacyjacyi z 1937 hodam.
Ale što nasamreč ujaŭlaje ź siabie «baza danosaŭ»? Davajcie raźbiracca.
Absalutnuju bolšaść listoŭ adpravili spamiery
Pry adpraŭleńni zvarota ŭ KDB treba ŭkazvać svoj mejł i, pažadana, kantaktnyja źviestki (ale niekatoryja ŭpisvali «ananim»).
Dyk voś, piać samych aktyŭnych mejłaŭ zhienieravali 20 tysiač zvarotaŭ! Niejki Ivan Rabcaŭ sa Škłoŭskaha rajona adpraviŭ 9728 listoŭ, amal usie z adnolkavym źmiestam «Prašu vas infarmavać Alaksandra Ryhoraviča Łukašenku». Vital Daciuk ź Lvova dasłaŭ 5957 zvarotaŭ z kanśpirałahičnymi teoryjami zmovy.
Psichična chvoryja
Tysiačy listoŭ pryjšli ad ludziej ź vidavočnymi prablemami ź psichikaj. «Maršały KDB SSSR», jakija štomiesiac patrabujuć vypłacić im $10 miljonaŭ, i padobnyja piersanažy. Ludzi, jakija dzielacca tym, što Pucin pryznačyŭ ich svaimi pierajemnikami.
U zakonie ab zvarotach hramadzian byli ščyliny, kab z farmalnych pryčyn ničoha nie adkazvać na takija paviedamleńni. Najchutčej, supracoŭniki KDB tak i rabili.
Pošuk represavanych
Tysiačy zvarotaŭ pryśviečanyja pošukam infarmacyi pra svajakoŭ, represavanych u 1930-yja. Ludzi jak ź Biełarusi, tak i z susiednich krain prosiać dasłać im infarmacyju. Nieviadoma, ci KDB adkazvaje na takija prośby.
Stukačy z Rasii
Sotni (kali nie tysiačy) danosaŭ napisanyja rasijanami. Jość i rasijanie, jakija pierajechali ŭ Biełaruś i stała žyvuć tut (ci chacia b časam pryjazdžajuć u našu krainu), ale pieradusim heta aktyŭnaść stukačoŭ z roznych rehijonaŭ Rasii.
«Źviarnicie ŭvahu na hetaha subjekta. Ukrainiec, pražyvaje ŭ Minsku. Banderaviec», — piša stukač sa Smalenska. «Sutyknuŭsia ŭ internecie z ****. Ideołah, ahitatar, mahčyma, naležyć da sijanisckaha tavarystva», — adpraŭlaje list stukač z Rastova. I takija ž danosy adusiul — Ciumienskaja vobłaść, Śviardłoŭskaja vobłaść, Varoniež…
Pošuk pracy
Takich paviedamleńniaŭ nie nadta šmat, ale jość i jany. «Ja student, padkažycie, jak uładkavacca da vas na pracu».
Zvaroty ad siemjaŭ palitviaźniaŭ
Ludzi pisali, kab vyśvietlić los svajakoŭ, jakija raptoŭna źnikli. Ci prasili viarnuć im kanfiskavanuju techniku.
Danosy ad biełarusaŭ
Kankretnuju ličbu realnych danosaŭ ad biełarusaŭ nazvać ciažka, treba ručny padlik. Najchutčej, ich kolkaść nie pieravyšaje 1000-2000 zvarotaŭ.
U hetuju ličbu ŭvachodziać siamiejnyja razborki, vyśviatleńnie adnosinaŭ z susiedziami i pracadaŭcami. I naturalna, niepasrednyja zakliki da palityčnych represij.
Časam dla padmacavańnia svajoj arhumientacyi navat u pobytavych situacyjach pryvodziać palityčnyja arhumienty. Asabliva šmat ich stała paśla 2020 hoda.
«Naša Niva» — bastyjon biełaruščyny
PADTRYMAĆ«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary