Nieviadomyja z pamyłkami ŭ litoŭskaj movie zaklikajuć viešać studentaŭ EHU, jakija žyvuć u Litvie

Jak paviedamiŭ LRT student Alaksiej (imia źmienienaje), 16 krasavika jon pačaŭ atrymlivać paviedamleńni z pahrozami ź nieviadomaha akaŭntu ŭ telehramie ad čałavieka, padpisanaha jak Vincas. Zatym jamu pačali pastupać zvanki ź nieviadomaha litoŭskaha numara, ale nichto ničoha nie havaryŭ — čuvać było tolki šum i hrukat.

Paźniej «Vincas» dasłaŭ biełarusu spasyłku na supołku Švarus Vilnius. Už rasę ir tautą! («Čystaja Vilnia. Za rasu i nacyju!»). Tam byli źmieščanyja fota, imia i adras studenta z zaklikami paviesić jaho za nibyta homasieksualnaść (sam jon heta admaŭlaje). Paśla hetaha pahrozy na adras Alaksieja pačali ŭzmacniacca.

Taksama «Vincas» trapiŭ va ŭnutrany čat studentaŭ EHU, dzie pačaŭ źmiaščać fotazdymki «trupaŭ, abharełych ciełaŭ, niejkich niezrazumiełych častak cieła». A ŭ supołcy Švarus Vilnius. Už rasę ir tautą! źjaviŭsia post pra jašče adnaho studenta EHU, ź jahonym fota, na jakim jon zahornuty ŭ viasiołkavy ściah. Jaho taksama prapanoŭvajecca paviesić abo «pieratvaryć jahonaje žyćcio ŭ piekła». Aproč taho, EHU niepasredna źviazvali z ŁHBT.

Teksty z pamyłkami ŭ litoŭskaj movie

Pieršy post u Švarus Vilnius. Už rasę ir tautą! źjaviŭsia 7 krasavika. U im havorycca, što metaj supołki jość «vyjaŭleńnie i adsočvańnie asobaŭ i arhanizacyj, jakija stvarajuć pahrozu našym pierakanańniam, ładu žyćcia i biaśpiecy litoŭskaha naroda». Za paru tydniaŭ isnavańnia ŭ supołcy zjaviłasia niekalki dziasiatkaŭ paviedamleńniaŭ nieanacysckaj skiravanaści, a taksama videa źbićcia ludziej.

Na apublikavanych videarolikach namalavany łahatyp ultrapravaj terarystyčnaj arhanizacyi, zasnavanaj nieanacysckaj mižnarodnaj hrupaj «Kroŭ i honar» (B&H). U Litvie čalcy hetaj hrupy zhurtavanyja ŭ telehramie vakoł supołki B&H Lietuva. Jak zajaŭlajuć litoŭskija žurnalisty, Švarus Vilnius. Už rasę ir tautą! prosta kapijuje publikacyi B&H Lietuva, a ŭ dadatak da hetaha robić pasty pra studentaŭ EHU z zaklikam paviesić ich. Hamafobny naratyŭ taksama adroźnivaje jaje ad B&H Lietuva.

Na dumku Alaksieja, kampanija zapałochvańnia — sprava biełaruskich śpiecsłužbaŭ, a jaje meta — dyskredytavać Litvu «ŭ vačach biełarusaŭ, vyklikać strach».

Jon nahadaŭ, što biełaruskija prapahandysty ŭžo pahražali pryznać EHU ekstremisckim farmavańniem. Sproby zapužvańnia biełarus źviazvaje z nabližeńniem ustupnaj kampanii i žadańniem nie dapuścić tudy pastupleńnia novych abituryjentaŭ.

Litoŭskija žurnalisty paćviardžajuć, što kali ŭ Švarus Vilnius. Už rasę ir tautą! źjaŭlajucca nie reposty z B&H Lietuva, tam šmat pamyłak i biazhłuździcy, tekst nibyta pisaŭsia praź pierakładčyk.

Adkaz na vykryćcio «Lićvinaŭ»

Alaksiej zhadvaje, što staŭ achviaraj pieraśledu paśla taho, jak u adnoj z zakrytych pierapisak EHU niechta sa studentaŭ padzialiŭsia fota ŭlotki, jakaja zjaviłasia va ŭniviersitecie. Na im byli adlustravanyja nacyjanalnyja simvały Biełarusi z QR-kodam, što vioŭ u padazronuju telehram-supołku pad nazvaj «Lićviny». U hrupie publikavalisia zajavy z patrabavańniem dałučeńnia Vilni da Biełarusi.

Alaksiej napisaŭ u hetaj supołcy kamientar, u jakim paviedamiŭ, što takija ŭlotki treba rvać, bo heta nahadvaje pracu biełaruskich śpiecsłužbaŭ. Praz dva dni ŭ Švarus Vilnius. Už rasę ir tautą! źjavilisia pahrozy na adras Alaksieja.

Zvaroty ŭ palicyju nie dapamahli

U adkaz na incydenty administracyja EHU paraiła studentam zachoŭvać ananimnaść u internecie i źviartacca ŭ palicyju, kali jany atrymlivajuć pahrozy. Niekalki studentaŭ tak i zrabili, ale z palicyi pryjšli adkazy, što «prykmietaŭ złačynnaj dziei, administratyŭnaha abo inšaha parušeńnia zakonu vyjaŭlena nie było».

Pradstaŭniki palicyi nie zachacieli kamientavać žurnalistam svaje rašeńni nie pačynać spravy.

Miž tym paśla publikacyi žurnalisckaha materyjału LRT pa-rasiejsku hrupa Švarus Vilnius. Už rasę ir tautą! źmianiła nazvu i vydaliła bolšaść svaich pastoŭ.

Raniej užo paviedamlałasia, što niekatoryja biełarusy, jakija pierajechali ŭ Vilniu paśla 2020 hoda, stali atrymlivać ananimnyja paviedamleńni z pahrozami zabojstvam. U častcy paviedamleńniaŭ ludziej zaklikajuć pakinuć Litvu. Teksty paviedamleńniaŭ pa-litoŭsku byli napisanyja z pamyłkami, tamu jość padazreńnie, što heta pravakacyja biełaruskich śpiecsłužbaŭ. Litoŭskaj palicyi pra hetyja vypadki viadoma.

• 6
• 0
• 8
• 2
• 2
• 11
• 21
• 0