Kolki zachodnich hrošaj asvoiŭ baćka Natalli Piatkievič?

Biełaruskija čynoŭniki lubiać zaklajmić tych, chto atrymlivaje dapamohu ź Jeŭropy albo ZŠA. Adnak, vyjaviłasia, što tema hrantaŭ moža być blizkaj i siamji namieśnicy kiraŭnika administracyi Łukašenki Natalli Piatkievič.

Prapahandysckija materyjały pra toje, jak zachodnija hrošy razychodziacca pa kišeniach apazicyjnych partyj i niepadkantrolnaha dziaržavie hramadskaha siektara, rychtujucca ź miesiaca ŭ miesiac, vyklikajuć rezanans, zajzdraść, nianaviść, kryŭdu… Karaciej, kłubok supiarečlivych emocyjaŭ. Na dziŭnyja supadzieńni źviarnuła ŭvahu žurnalist Śviatłana Kalinkina.

— My navat nie ŭjaŭlajem stupieni naporu, ź jakoj dziaržaŭnyja dziejačy vybivajuć hetyja samyja zachodnija hranty, — piša jana ŭ svaim błohu. — Pamiatajecie, kolki razoŭ Natalla Piatkievič praryvałasia praź vizavuju błakadu ZŠA na trybunu AAN, kab raspavieści pra prablemy handlu ludźmi, vykazać zakłapočanaść uciskam pravoŭ žančyn u śviecie (ale nie ŭ Biełarusi, kaniečnie), vykazać svajo bačańnie prablem uciekačoŭ, mihracyi, pakryŭdžanych i abiazdolenych.

Kaniečnie, jana była pačutaja. Ale jość takaja asablivaść u hetych zachodnikaŭ,

što jany nie pracujuć tolki ź dziaržaŭnymi strukturami.

Pad prajekt im patrebny peŭny «aficyjna‑hramadski» puł. U AANaŭskija puły vielmi časta ŭvachodzić niejkaja arhanizacyja HA «Biełaruski ruch miedycynskich rabotnikaŭ».

Faktyčna hety niezaŭvažny dla šyrokaha voka ruch źjaŭlajecca hałoŭnym partnioram Upraŭleńnia viarchoŭnaha kamisara AAN pa spravach uciekačoŭ i kaardynataram pa supracoŭnictvie Kamisaryjata ź inšymi biełaruskimi hramadskimi arhanizacyjami. Pry arhanizacyi navat pracuje Słužba pa kansultacyi ŭciekačoŭ. Pry hetym płyni ŭciekačoŭ u Biełaruś niama.

Pa stanie na 1 śniežnia 2009 hodu ich było 817 čałaviek.
Pa stanie na 1 śniežnia 2008 hodu — 802 čałavieki.
Pa stanie na 1 śniežnia 2007 hodu — 800 čałaviek.
Pa stanie na 1 śniežnia 2006 hodu — 796 čałaviek.

To bok za čatyry hady nabraŭsia 21 čałaviek — u siarednim 5 čałaviek u hod. Pryčym ja vielmi padazraju, što heta prosta dzieci naradžajucca ŭ siemjach tych, chto daŭno zarehistravany ŭciekačami. Ale praca ž jakaja kipić! Heta vam nie 5‑10 tysiač dalaraŭ apazicyi. Miljonnyja hranty!

Naprykład, jość prajekt na 2 miljony dalaraŭ. Nazyvajecca prajekt «Umacavańnie nacyjanalnaj sistemy prytułku Respubliki Biełaruś». Raźličany na termin z 2007 pa 2010 hod. Hałoŭnaja arhanizacyja atrymańnia zamiežnych hrantaŭ — MUS Biełarusi. Ale dapamohu taksama atrymlivajuć pa śpisie:

Dziaržaŭny kamitet pamiežnych vojskaŭ
Viarchoŭny Sud
Prakuratura
Ministerstva justycyi
Ministerstva achovy zdaroŭja
Ministerstva kultury
Ministerstva infarmacyi
Ministerstva pracy i sacyjalnaj abarony
Abłasnyja vykanaŭčyja kamitety
Minski haradski sud
Sud Centralnaha rajona h. Minska
Vyšejšyja navučalnyja ŭstanovy Respubliki Biełaruś (Biełaruski dziaržaŭny univiersitet, Akademija MUS, Vajennaja akademija, Instytut nacyjanalnaj biaśpieki)
Biełaruskaje tavarystva Čyrvonaha Kryža (BTČK);
Biełaruski ruch miedycynskich rabotnikaŭ (BRMR);
Mižnarodnaje hramadskaje abjadnańnie pa navukova‑daśledčych i infarmacyjna‑adukacyjnych prahramach «Raźvićcio» (MHA «Raźvićcio»);
Mižnarodnaje hramadskaje abjadnańnie «Niezaležnaja sacyjalnaja dapamoha» (MHA «NSD»);
Centr tvorčaści dziaciej i moładzi «Eŭryka» Frunzienskaha rajona h. Minska (CTDziM «Eŭryka»).

Hrošy daje AAN i Jeŭrapiejskaja kamisija. Hrošy nie małyja. Zadačy ŭ prajekcie prapisanyja salidnyja, naprykład: pošuk dla ŭciekačoŭ doŭhaterminovych rašeńniaŭ (dapamoha ŭ intehracyi, repatryjacyi, pierasialeńni ŭ trecija krainy); akazańnie pravavoj i sacyjalnaj dapamohi asobam, što šukajuć prytułku i ŭciekačam. Voś na 23 čałavieki pracujuć, vydatkoŭvajučy miljony čužych dalaraŭ, biełaruskija čynoŭniki.

Padrabiaznaści pahladzicie na aficyjnym sajcie ŭradu. Pryčym źviarnicie ŭvahu, što na prafiesijnuju padrychtoŭku ŭciekačoŭ na bazie našych siarednich i vyšejšych navučalnych ustanovaŭ srodkaŭ praduhledžana ŭ 10 raz mieniej, čym na akazańnie im pravavoj dapamohi.

Praviadzieńnie stažyrovak, treninhaŭ, aznajamlalnych pajezdak biełaruskich śpiecyjalistaŭ patrabuje hrošaj amal u 6 razoŭ bolej, čym navučańnie ŭciekačoŭ ruskaj movie.

Albo jašče adzin prajekt. U Minsku adbyłosia padpisańnie dakumientaŭ pa realizacyi prajektu JEZ‑UVKU AAN «Pavyšeńnie efiektyŭnaści padziełu i pracy ź mihracyjnymi płyniami na Dziaržaŭnaj miažy i ŭnutry Respubliki Biełaruś — faza II». Hety prajekt realizujecca Dziaržaŭnym pamiežnym kamitetam i Ministerstvam unutranych spraŭ Respubliki Biełaruś pry ŭdziele HA «Biełaruski ruch miedycynskich rabotnikaŭ» i MHA «Raźvićcio» (heta pravapierajemnik Centra pa vyvučeńni AAN), a taksama Biełaruskaje tavarystva Čyrvonaha Kryža. Donarami prajekta, biudžet katoraha składaje 888 tys. jeŭra, vystupajuć Jeŭrapiejskaja Kamisija, Upraŭleńnie viarchoŭnaha kamisara AAN pa spravach uciekačoŭ i Mižnarodnaja arhanizacyja pa mihracyi.

Kiraŭnik hetaha samaha ŭsiudyisnaha HA «Biełaruski ruch miedycynskich rabotnikaŭ», prablemy jakoha zamiežnikaŭ chvalujuć značna bolej, čym prablemy ŭłasna biełarusaŭ, — viadomy ŭ Minsku lekar‑stamatołah Uładzimir Akimavič Kraŭčanka.

Pa «dziŭnym» supadzieńni jon ža —

tata hałoŭnaha ideałahičnaha baraćbita z «hrantasmokami» Natalli Uładzimiraŭny Piatkievič.

Elektronny daviednik biełaruskich NGO da hetaha času vydaje, što arhanizacyja zarehistravana pa adrasie h.Minsk, vuł. Prytyckaha, 46. I ŭsio pa tym ža «dziŭnym» źbiehu abstavin dakładna taki samy adras u stamatałahičnaj palikliniki №7, jakoj kiruje Uładzimir Kraŭčanka.

«Tak stałasia, što litaralna ŭ susiednim domie ad palikliniki ŭ mianie ŭžo hadoŭ dziesiać žyvie lepšy siabar. Na pytańnie, ci bačyŭ jon kali‑niebudź tut natoŭpy ŭciekačoŭ, jon vielmi ździviŭsia: «Ty što, z duba lasnułasia?..» Moža, arhanizacyju «pierasialili», a moža 5 uciekačoŭ z «štohadovaj prybyli» prosta zhubilisia ŭ natoŭpie — nie viedaju», — ździŭlajecca Śviatłana Kalinkina.

Darečy, aproč uciekačoŭ TAA Uładzimira Kraŭčanki taksama zajmajecca pytańniami ŭsynaŭleńnia biełaruskich dziaciej‑sirotaŭ. A heta, jak viadoma, naahuł vielmi prybytkovy biźnies. Praŭda, časta — na miažy zakonu.

Kaniečnie, brać hrošy na dobryja mety — ničoha kiepskaha ŭ hetym niama, ale čamuści ŭ Biełarusi adnym možna, a inšyja za heta pryraŭnivajucca da vorahaŭ narodu.

• 0
• 0
• 0
• 0
• 0
• 0