Błohierku ź dziciom nie puścili ŭ restaran «na minskich Patrykach». Čakajcie, dzie?
Maładaja tyktokierka raźmiaściła videa pra toje, jak u minskim restaranie joj z synam admovili ŭ absłuhoŭvańni. Karystalnikaŭ ździviła nazva vulicy, na jakoj usio adbyłosia.
Tyktokierka oh_valeriee1 apublikavała rolik pra sprobu naviedać restaran na minskaj vulicy Karła Marksa. Havorka išła pra Amo — novy restaran mižziemnamorskaj kuchni.
Pratestavać jaho, adnak, dziaŭčyna nie zdoleła, bo ź dziećmi da šaści hadoŭ uvachod u Amo zabaronieny. Tak što adznačyć jana zmahła tolki pryhožy interjer, terasu i niečakanuju dla jaje palityku restarana, pra jakuju prapanavała parazvažać u kamientarach.
Videa sabrała 135 tysiač prahladaŭ.
Karystalnikaŭ uraziła nie tolki sama situacyja, ale i toje, dzie ŭsio adbyłosia: pavodle aŭtarki videa, restaran adkryŭsia «na minskich Patrykach». U kamientarach jany pytalisia, dzie hetyja tajamničyja «minskija Patryki», prasili pakinuć minskim vulicam svaje ŭłasnyja nazvy i cikavilisia, čamu mienavita Patryki, a nie adrazu minskaja Nica ci Manaka.
Sama dziaŭčyna patłumačyła ŭ kamientarach, što, na jaje dumku, vulica Karła Marksa asacyjujecca z maskoŭskimi Patryjaršymi prudami «z-za vajbu». A ŭ inšym roliku adkazała chiejtaram — maŭlaŭ, «minskimi Patrykami» vulicu Karła Marksa ŭžo daŭno nazyvajuć «u vuzkich i nie vielmi kołach». Jašče adno tłumačeńnie ad aŭtarki — što heta ŭsio byŭ tolki sarkazm.
Što da historyi z palitykaj restarana, šmat chto z kamientataraŭ padtrymaŭ ideju zabaranić uvachod z maleńkimi dziećmi. Ludzi pisali, što sučasnyja baćki nie pryvučajuć dziaciej da spakojnych pavodzinaŭ i tamu małyja mohuć pieraškadžać inšym haściam, dyj baćkam časam treba adpačnuć ad dziaciej. Ale byli i tyja karystalniki, chto paličyŭ takuju palityku nieprymalnaj i vyrašyŭ tady ŭvohule nie naviedvać hety restaran.
«Naša Niva» — bastyjon biełaruščyny
PADTRYMAĆBondarava zachacieła dvuchmoŭja, jak u Finlandyi. My taksama za6
Kamientary