Jak transhiendar abvaliŭ prodažy samaha papularnaha amierykanskaha piva
Piva Bud Light było samym papularnym u ZŠA, pakul kampanija nie dasłała piersanalizavanaj blašanki transhiendaru-influenseru. Dalej zdaryłasia historyja, jakaja ŭvojdzie ŭ padručniki biznesu.
Jak piša The Wall Street Journal, ŭ ZŠA ŭžo bolš za hod padajuć prodažy piva Bud Light, jakoje da hetaha ŭpeŭniena zajmała pieršaje miesca. Jaho vytvorca — najbujniejšy pivavar u śviecie Anheuser-Busch. U pryvatnaści kampanii naležać takija suśvietnyja brendy, jak Budweiser, Stella Artois i Beck's.
Pavučalnaja historyja pačałasia ŭ 2023 hodzie, kali vice-prezident brendu Bud Light pa markietynhu Alisa Hajnieršajd (Alissa Heinerscheid), zakłapočanaja tendencyjaj źnižeńnia prodažaŭ, raspracavała rekłamnuju stratehiju, jakaja była nakiravana na pryciahnieńnie bolš šyrokaha koła spažyŭcoŭ, u tym liku žančyn i moładzi.
Adnoj z asobaŭ, jakuju dałučyli da rekłamy, stała Dyłan Małviejni (Dylan Mulvaney) — 27-hadovaja transhiendarnaja žančyna, jakaja nabyła viadomaść dziakujučy svaim rolikam u TikTok, u jakich pačynajučy z 2022 hoda raskazvała pra praces hiendarnaha pierachodu.
Da pačatku 2023 hoda Małviejni mieła bolš za 10 miljonaŭ padpisčykaŭ u tyktoku. A jaje pieśnia Days of Girlhood stała chitom.
Varta adznačyć, što da hetaha Bud Light dziesiacihodździami spansaravaŭ hrupy pa abaronie pravoŭ ŁHBT i prajdy.
U sakaviku 2023 hoda brend adpraviŭ Małviejni ŭ padarunak piersanalizavanuju blašanku Bud Light ź jaje fotazdymkam. Nahodaj stała hadavina hiendarnaha pierachodu. 1 krasavika Małviejni zapościła ŭ svaim instahramie videa ŭ jakim nazvała blašanku «mahčyma, najlepšym padarunkam na śviecie».
Ale zdaryłasia niečakanaje. Videa vyklikała niehatyŭnuju reakcyju ŭ kansiervatyŭnych kołach. Treba zaŭvažyć, što Bud Light pili pieravažna ŭ vioskach i kansiervatyŭna nastrojenych štatach ZŠA. A pjuć jaho pieravažna mužčyny.
Droŭ u połymia padkinuŭ papularny kantry-muzykant Kid Rok, jaki ŭ svaim Instagram apublikavaŭ videa, na jakim pakazaŭ, jak ź pistaleta-kulamiota MP5 rasstrelvaje skryni z Bud Light. Za miesiac post sabraŭ bolš za 11 miljonaŭ prahladaŭ. Videa faktyčna zapuściła chvalu bajkotu.
Prodažy Bud Light adrazu pačali padać i padali bolš za miesiac. Bajkot nanios škodu i inšym hatunkam piva Anheuser-Busch, uklučajučy Budweiser, Michelob Ultra i Busch Light.
Praź miesiac paśla rekłamy praz trashiendara prodažy Bud Light upali na 11—26%, 13 červienia 2023 hoda The Wall Street Journal paviedamiła, što Bud Light straciŭ tytuł lidaru prodažaŭ piva ŭ ZŠA. U toj ža čas u cełym prodažy Anheuser-Busch źnizilisia prykładna na 1%.
U lipieni vyniki apytańnia pakazali, što papularnaść Bud Light siarod amierykanskich piŭnych brendaŭ apuściłasia na 14-ju pazicyju. U tym ža miesiacy kampanija zvolniła sotni supracoŭnikaŭ svaich ofisaŭ prodažaŭ u ZŠA.
Za druhi kvartał 2023 hoda ahulny prybytak kampanii ŭpaŭ na 10% u paraŭnańni z anałahičnym pieryjadam 2022 hoda. Apieracyjny prybytak amierykanskaha padraździaleńnia ŭpaŭ amal na 30%.
U kancy lutaha hetaha hoda CNN Business paviedamiła, što straty Anheuser-Busch u vyniku bajkotu mohuć skłaści da 1,4 miljarda dołaraŭ. Hienieralny dyrektar Mišel Dukierys (Michel Doukeris) viasnoj 2024 hoda zajaviŭ, što kampanija straciła ad 5% da 7,5% płoščaŭ na palicach kram.
Bolš čym praz hod paśla niaŭdałaj rekłamy zorka Bud Light praciahvaje padać. Jak pakazvajuć apošnija danyja ab prodažach, były favaryt apuściŭsia ŭ ZŠA na treciaje miesca paśla Modelo Especial i Michelob Ultra.
«Biespardonna hruzić siabie i inšych»: były pamočnik Łukašenki Ihar Bryło biare na siabie vinu ŭ pramysłovych abjomach2
Kamientary