Razam z USU na terytoryju Rasii ŭvajšła amierykanskaja vajskovaja hrupa FOG. Što za jana?
Rasijski MZS vyklikaŭ časovaha pavieranaha ŭ spravach ZŠA z-za prysutnaści ŭ Kurskaj vobłaści «amierykanskaj PVK». I sapraŭdy, adna z amierykanskich vajskovych arhanizacyj vykłała foty svajho ŭdziełu va ŭkrainskaj apieracyi pad Kurskam, čym vyklikała masavuju isteryju rasijan. Raskazvajem, što viadoma pra hrupu FOG i nakolki jana mocnaja.
Amierykanskaja niedziaržaŭnaja vajskovaja arhanizacyja Forward Observations Group («Hrupa napadu i nazirańnia»/FOG), jakaja składajecca z byłych marpiechaŭ i śpiecnazaŭcaŭ ZŠA, pryznała svoj udzieł va ŭkrainskim nastupie pad Kurskam.
Heta vyklikała žorstkuju reakcyju rasijskaha MZS, jaki abvinavaciŭ ZŠA ŭ adkrytaj ahresii suprać Rasii i abviaściŭ «amierykanskich najmitaŭ» zakonnaj vajskovaj cellu, pieradaje ruskaja słužba Bi-bi-si.
Aburylisia navinoj i rasijskija Z-kanały, jakija paŭtarali ŭśled za MZS pahrozy ŭ bok amierykancaŭ. U Saviecie Fiederacyi Rasii, u svaju čarhu, paabiacali «amierykanskim najmitam» abo śmierć, abo pažyćciovaje źniavoleńnie za najomnictva ŭ vypadku ich trapleńnia ŭ pałon.
Razabralisia, adkul uvohule ŭzialisia va Ukrainie prafiesijnyja (choć i byłyja) amierykanskija vajskoŭcy, ci možna ich ličyć najmitami i jakimi mahčymaściami vałodaje hrupa FOG.
Što saboj ujaŭlaje FOG?
Niahledziačy na rasijskija abvinavačvańni ŭ najomnictvie amierykanskaja hrupa FOG, jakaja ŭvajšła pad Kursk, nie źjaŭlajecca pryvatnaj vajennaj kampanijaj. Aficyjna arhanizacyja nazyvaje siabie tolki «brendam vajskovaha ładu žyćcia», jaki abjadnoŭvaje vieteranaŭ bajavych dziejańniaŭ, jakija zvolnilisia z uzbrojenych sił ZŠA. Tyja, chto ŭvajšli ŭ skład arhanizacyi, ličacca «dobraachvotnikami».
Jak piša vydańnie Vice News, hrupa FOG była zasnavanaja byłym amierykanskim marpiecham Derekam Bejłsam, jaki słužyŭ u Afhanistanie ŭ składzie 173-j pavietrana-desantnaj bryhady ZŠA, i pieršapačatkova ŭjaŭlała saboj brend taktyčnaha vajskovaha načyńnia.
Adnak potym členy hrupy ŭ jakaści «reparcioraŭ» i «miedykaŭ» stali źjaŭlacca ŭ haračych punktach Blizkaha Uschodu, dzie zdymali kadry miascovych bojesutyknieńniaŭ i dapamahali paranienym žycharam i sałdatam miedykamientami. Toje ž samaje členy FOG rabili i va Ukrainie jašče da poŭnamaštabnaha rasijskaha ŭvarvańnia.
Pry hetym, jak adznačaje Vice News, niekatoryja členy FOG užo ŭ 2018-2021 hadach akazvali niepasrednuju vajskovuju dapamohu ŭkrainskaj armii ŭ vajnie z prarasijskimi sieparatystami na Danbasie.
Kiraŭnik FOG Derek Bejłs aficyjna abviarhaŭ udzieł svaich dobraachvotnikaŭ u bajach va Ukrainie, ale jahony pres-sakratar zajaviŭ, što pryjezd členaŭ FOG na Danbas uzhadniaŭsia sa Słužbaj biaśpieki Ukrainy i Ministerstvam abarony krainy.
U dadatak da hetaha sam Bejłs publikavaŭ videa na YouTube (ciapier vydalena), dzie jon razam z bajcami FOG udzielničaje ŭ bajach za aeraport Daniecka. Byli i sumiesnyja foty Bejłsa z členami ŭkrainskaha bataljona «Azoŭ», adznačaje Vice News.
Z taho momantu hrupa FOG stała mišeńniu rasijskaj prapahandy, jakaja tym samym chacieła dakazać «adkaznaść ZŠA za raźviazvańnie kanfliktu na Danbasie». U pryvatnaści, hrupa ŭ 2021 hodzie abvinavačvałasia Kramlom u sprobach zładzić pravakacyju z prymianieńniem chimičnaj zbroi, što admaŭlała jak sama hrupa, tak i ŭrady ZŠA i Ukrainy.
Kali praz hod Rasija ŭvarvałasia va Ukrainu, hrupa FOG adrazu pačała dziejničać na mnohich kirunkach frontu, u tym liku ŭ abaronie Kijeva i Bachmuta.
Bajcy FOG stali aktyŭna vykarystoŭvać simvał, na jakim rahaty škilet z aŭtamatam i kapjom pracinaje čyrvonuju litaru F, ź jakoj pačynajecca nazva hrupy.
Kolkaść bajcoŭ u składzie FOG dakładna nieviadomaja. Rasijskija Z-resursy śćviardžajuć, što va Ukrainie vajuje niekalki sotniaŭ byłych amierykanskich marpiechaŭ, adnak ułady Ukrainy i ZŠA hetuju infarmacyju nie paćviardžali.
Sama hrupa ŭ sacsietkach demanstruje, što vykarystoŭvaje ŭ svaich apieracyjach lohkuju braniatechniku, transpartnuju i bajavuju avijacyju (akramia źniščalnikaŭ) i marskija katary. Bajcy FOG nosiać standartnaje amierykanskaje ŭzbrajeńnie i braniu.
Akramia Ukrainy, hrupa FOG (miarkujučy pa jaje sacsietkach) adnačasova dziejničaje ŭ Siryi, Iraku, Jemienie i siektary Haza, dzie treniruje miascovyja siły biaśpieki, a taksama vajuje suprać isłamisckich terarystaŭ i prairanskich bajevikoŭ. Nakont mahčymych bojesutyknieńniaŭ u hetych krainach z rasijskimi vajskoŭcami ci najmitami «Vahniera» amierykanskaja hrupa ničoha nie paviedamlała.
Pry hetym u «Vahniera» jość zub na FOG, što, u pryvatnaści, vyražałasia ŭ prodažy rasijskimi najmitami mierču z vyjavami, dzie adzinoki vahnieraviec zanosić kuvałdu nad asnoŭnym simvałam FOG.
«Naša Niva» — bastyjon biełaruščyny
PADTRYMAĆMinčanka pakinuła stanoŭčy vodhuk na sumku — i raptam vykryła zdradu čužoha muža20
Kamientary