Dyjetołahi rekamiendujuć, jakija pradukty treba jeści ŭ kožnaje dziesiacihodździe svajho žyćcia

Pra heta vydańniu Daily Mail raskazała dyjetołah Fiederyka Amaci.

Uzrost: da 12 hadoŭ. Vada i pašyreńnie charčovaha repiertuaru

U hetym uzroście nieabchodna zaachvočvać dziaciej jeści raznastajnuju ježu, bahatuju pažyŭnymi rečami. Heta dapamahaje roskvitu mikrabijoma, jaki pracuje nad stvareńniem mocnaj imunnaj sistemy.

Uviadzieńnie ŭ racyjon dziaciej z rańniaha ŭzrostu novych i raznastajnych celnych praduktaŭ dazvolić źnizić vypadki alerhii i palepšyć abaronu ad infiekcyj i chvarob na ŭsio žyćcio.

Dyjetołah rekamienduje źvieści da minimumu spažyvańnie napojaŭ z dadatkam cukru. Zamiest hetaha treba zaachvočvać dziaciej bolš pić vadu. Heta źnizić ryzyku atłuścieńnia, raźvićcia dyjabietu 2 typu i niekatorych vidaŭ raku ŭ budučym, a taksama zachavaje da staraści ŭłasnyja zuby.

Uzrost: 12-20 hadoŭ. Kalcyj, amieha-3 i žaleza dla dziaŭčatak

Na hety pieryjad prypadaje padletkavy ŭzrost z chutkim rostam arhanizmu. Tamu vielmi važna zabiaśpiečyć arhanizm kalcyjem dla farmiravańnia mocnych kaściej, što zakładzie dobruju asnovu dla abarony ad asteaparozu ŭ budučym.

Dziaŭčynkam, jakija hublajuć kroŭ padčas mienstruacyj, paźbiehnuć aniemii i paharšeńnia imunitetu, uzroŭniu enierhii i kahnityŭnych funkcyi dapamohuć pradukty, jakija bahatyja žalezam (jajki, łasoś, kuryca, babovyja).

Pavialičyć

U hety pieryjad važnyja strukturnyja źmieny adbyvajucca ŭ mozhu padletka. «Niejrapłastyčnaści» na hetym etapie raźvićcia, źnižeńniu ryzyki ŭźniknieńnia prablem ź psichičnym zdaroŭjem u dalejšym žyćci dapamohuć pradukty, bahatyja amieha-3 tłustymi kisłotami.

Uzrost: 20-30 hadoŭ. Raślinny białok

U hetym uzroście mohuć pačać raźvivacca niebiaśpiečnyja zapalenčyja pracesy, jakija supravadžajucca pavyšeńniem uzroŭniu chalesterynu i tryhlicerydaŭ (tłuščaŭ u kryvi).

Pavialičyć

Dyjetołah rekamienduje zamianić tłustaje pierapracavanaje miasa (burhiery, sasiski, viandlinu) raślinnymi krynicami białku, takimi, jak hrečka, sačavica, fasol, arechi i ziarniaty. Usie hetyja pradukty dapamahajuć prafiłaktycy sardečna-sasudzistych zachvorvańniaŭ.

Uzrost: 40-50 hadoŭ. Fiermientavanyja pradukty

U hetym uzroście adbyvajucca harmanalnyja źmieny jak u žančyn, tak i mužčyn, što moža asłabić imunnuju sistemu. U vyniku mohuć źjavicca novyja alerhii, bolš praciahłym stać pieryjad adnaŭleńnia paśla prastudy ci hrypu, a arhanizmu składaniej zmahacca z rakavymi kletkami.

Dyjetołah rekamienduje źjadać kožny dzień dźvie-try porcyi fiermientavanych praduktaŭ (kiefiru, johurtu, kvašanaj kapusty, syru čedar) i pić fiermientavany čaj.

Klatčatka i prabijotyki dapamahajuć padtrymlivać papulacyju karysnych bakteryj u kišečniku. U vyniku imunnaja sistema budzie bolš efiektyŭna pracavać, što pryviadzie da asłableńnia zapalenčaj reakcyi, jakaja źjaŭlajecca mocnym papiarednikam sardečnych zachvorvańniaŭ.

Uzrost: 60-70 hadoŭ. Białok i pažyŭnyja rečyvy

U hetym uzroście šancy na vyzdaraŭleńnie pačynajuć składvacca nie na našu karyść, bo dajuć ab sabie znać nastupstvy ładu žyćcia ŭ papiarednija dziesiacihodździ. U hety čas vialikaja ryzyka chvarob serca, dyjabietu 2 typu i insultaŭ.

Dyjetołah zaŭvažaje, što 80% takich vypadkaŭ možna było praduchilić šlacham źmieny racyjonu charčavańnia i ładu žyćcia.

Pavialičyć

U hety pieryjad arhanizmu patrebny białok (kala 1 hrama na kiłahram vahi), klatčatka (nie mienš za 30 hramaŭ u dzień) i poŭny nabor pažyŭnych rečyvaŭ. Na talercy pavinna być bolš harodniny, arechaŭ, ziarniat, tłustaj ryby, jajek i miasa dobraj jakaści. A voś ad tortaŭ, piačeńnia, krekieraŭ treba admovicca.

Uzrost: 80+. Bolš vady i klatčatki, uvaha na čarnaśliŭ

Jak adznačaje dyjetołah, u hetym uzroście ludzi, jak praviła, pjuć mała vady i ŭ vyniku atrymlivajuć abiazvodžvańnie. I hetaha moža być dastatkova dla taho, kab śviadomaść stała zbłytanaj i ŭzrasła ryzyka insultu.

Śpiecyjalist rekamienduje nie čakać adčuvańnia smahi, a rehularna pić vadu i čaj na praciahu dnia, jeści sadavinu i harodninu, jakaja nasyčaje arhanizm vadoju (pamidory, ahurki, hrušy, dyni).

Z uzrostam taksama zapavolvajecca praca stravavalnaj sistemy, što pavialičvaje ryzyku zaporaŭ, jakija nie tolki nie pryjemnyja, ale i mohuć pryvieści da surjoznych prablem z kišečnikam i navat da paharšeńnia psichiki.

Pavialičyć

Tamu dobraj zvyčkaj pavinna stać užyvańnie kožny dzień čarnaślivu. Jon nie tolki dapamahaje rehulavać pracu kišečnika, ale i bahaty polifienołami, jakija prynosiać dadatkovuju karyść zdaroŭju, a taksama kalcyjem dla zdaroŭja kaściej.

Dyjetołah upeŭniena, što niezaležna ad taho, kolki picy i burhieraŭ vy źjeli ŭ junactvie, pierachod na zdarovaje charčavańnie ŭ lubym uzroście moža prynieści karyść i być dastatkovym, kab vyvieści vas z hrupy ryzyki, radykalna źniziŭšy šancy zachvareć demiencyjaj u stałym uzroście.

• 11
• 0
• 2
• 2
• 0
• 0
• 0
• 0