U Polščy źbirajucca pastrožyć umovy vydačy karty palaka. Nadta šmat złoŭžyvańniaŭ
Polšča zrobić bolš strohimi ŭmovy vydačy karty palaka, piša vydańnie Rzeczpospolita. Asnoŭnaja ŭvaha budzie nadadziena tamu, kab karty palaka nie vydavalisia na asnovie padroblenych dakumientaŭ.
Z 2007 hoda, kali była ŭviedziena karta palaka, jaje atrymali bolš za 206 tysiač čałaviek. U asnoŭnym heta ludzi ź Biełarusi i Ukrainy.
U novaj mihracyjnaj kancepcyi Donalda Tuska, adnak, abvieščana pra źmieny, jakija pavinny być
«adkazam na paviedamleńni ab złoŭžyvańniach u pracesie repatryjacyi i vydačy kartaŭ palaka, u pryvatnaści, u vykarystańni zajaŭnikami padroblenych dakumientaŭ dla paćvierdžańnia polskaha pachodžańnia».
Polski zakon ab karcie palaka patrabuje, kab asoba, jakaja padaje zajaŭku na jaje, zaśviedčyła, što prynamsi adzin ź jaje baćkoŭ, dziadoŭ (babul) ci dvoje pradziedaŭ (prababul) byli polskaj nacyjanalnaści abo mieli polskaje hramadzianstva. Kartu taksama atrymlivali asoby, jakija nie mienš za try hady pracavali ŭ polskich arhanizacyjach.
Hety zapis z samaha pačatku vyklikaŭ sumnievy, bo asoby, jakija ŭ konsulstvie pradstaŭlali takuju daviedku, nie pavinny byli zaśviedčvać polskaje pachodžańnie.
Čaściej za ŭsio, jak vynikała sa spravazdačy, takija dakumienty vydavalisia Fiederacyjaj polskich arhanizacyj va Ukrainie (2,2 tysiačy), Sajuzam palakaŭ Ukrainy (1,1 tysiačy) i Sajuzam palakaŭ Biełarusi (912). I na hetaj hlebie ŭźnikali złoŭžyvańni, bo daviedki mahli vydavacca pa znajomstvie ci na niejkich inšych padstavach.
«Pra takija złoŭžyvańni kazali ŭžo šmat hadoŭ. Kali Polšča zapuściła prahramu karty palaka ŭ Biełarusi, vakoł jaje ŭźnik ceły biznes. Ščodra apłačanyja kampanii znachodzili dakumienty, damaŭlalisia pra sustrečy ŭ konsulstvie. Kolki było padrobak — nichto nie viedaje. Układ u pracu polskich arhanizacyj vyklikaŭ sumnievy i ŭ nas», — havoryć adzin z pradstaŭnikoŭ polskaj mienšaści ŭ Biełarusi.
Viadomyja taksama vypadki, kali karty palaka vydavalisia na padstavie padroblenych dakumientaŭ ab prynaležnaści da polskaj nacyi baćkoŭ, babul abo dziadulaŭ, prababul abo pradziedaŭ zajaŭnika.
Rzeczpospolita pryvodzić danyja Centra daśledavańniaŭ mihracyi za červień 2022 hoda. Zhodna ź imi, z 162 tysiač kartaŭ palaka (u spravazdačy pryviedzienyja dadzienyja siamihadovaj daŭniny) amal 7 tysiač, abo 4%, atrymali asoby, jakija padali nielehalnyja dakumienty ab polskim pachodžańni.
Pra heta paviedamlaŭ i namieśnik ministra zamiežnych spraŭ Polščy Uładzisłaŭ Teafił Bartašeŭski ŭ adkaz na zapyt adnaho z deputataŭ:
«Konsulskija i dypłamatyčnyja ŭstanovy atrymlivajuć, a ŭ niekatorych vypadkach sami vyjaŭlajuć parušeńni ŭ pracesie padačy zajavy na atrymańnie karty palaka».
Sprava tyčycca ŭ asnoŭnym roznych vidaŭ pasłuh, jakija achoplivajuć uvieś śpiektr elemientaŭ ad «padrychtoŭki da sumoŭja z konsułam» (havorka idzie ŭ pieršuju čarhu pra kamiercyjnyja kursy polskaj movy i navučańnie pierad sustrečaj) da «padrychtoŭki dakumientaŭ da zajavy».
Jak pryznaje namieśnik ministra, «viadomyja vypadki padazreńnia ŭ padrobkach, učynienych supracoŭnikami miascovych archivaŭ abo sudoŭ». Pakolki polskija konsuły nie mohuć rasśledavać hetyja spravy, to niama źviestak pra maštaby hetaj źjavy.
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy7
Kamientary