«Supierniki» — hareźlivy sieryjał pra seks, intryhi i brytanskija elity
Tydzień tamu ŭ Brytanii prezientavali sieryjał «Supierniki» (Rivals) — hrymučuju historyju pra arystakrataŭ i telebačańnie 1980-ch, prypraŭlenuju satyraj i ahromnistaj kolkaściu seksu. Raskazvajem pra hety prajekt, jaki ŭžo zajmieŭ vialiki pośpiech.
Heta Brytanija 1980-ch, vydumanaje hrafstva Ratšyr na paŭdniovym zachadzie Anhlii. Łord Toni Badynhiem raźvivaje niezaležny telekanał Corinium i pieravablivaje tudy irłandskaha teležurnalista Dekłana O'Chara. Toj zachras u VVS i farmalnych hutarkach ź miascovymi sielebryci, dzie kožnaje słova musić być vyvierana i niama ni šansu na žyvuju žurnalistyku.
O'Chara pierabirajecca ŭ Ratšyr, ale na novym miescy ŭsio składaniej, čym jon čakaŭ. Amierykanskaja pradziusarka Kemieran Kuk, jakuju taksama pieravabili ŭ Corinium, naviazvaje Dekłanu svajo bačańnie pracy, žonka nie radaja pierajezdu, i treba ž jašče pakłapacicca pra dźviuch dačok.
Tym časam narastaje supiernictva pamiž Badynhiemam i zamožnym parłamientaryjem Rupiertam Kempbiełam-Błekam. Hety były spartoviec vyłučajecca nie ambitnymi prajektami, jak Badynhiem, a chutčej ekscentryčnaściu i luboŭju da seksu — z hetaha, ułasna, i pačynajecca sieryjał. Rupiert adnačasova zavodzić raman z žurnalistkaj i z žonkaj člena parłamienta, a z apošniaj jašče i hulaje ŭ tenis — vielmi brytanskaja hulnia, kali nie ŭdakładniać, što hety tenis hoły.
Zdajecca, žychary Ratšyra ŭvohule vyrašajuć u spalniach nie mienš pytańniaŭ, čym u ofisach dy haścioŭniach.
Sieryjał źniali pa adnajmiennym ramanie-biestselery ad piśmieńnicy Džyli Kupier. Joj, byłoj žurnalistcy, daviałosia papracavać u bujnym brytanskim miedyja — kansiervatyŭnym vydańni The Mail on Sunday, tak što pad pieražyvańniami Dekłana, jakoha zavalili cenzuraj na VVS, lažyć realny dośvied i razumieńnie śfiery.
80-ja — čas jarkaj muzyki, ekstravahantnaj mody i viesiałości. Kniha Kupier — kancentrat usiaho hetaha, i stvaralniki sieryjała taksama dobra pieradali atmaśfieru toj epochi. «Supiernikaŭ» možna hladzieć usim, kamu ŭ žyćci nie chapaje koleru i pazityvu: spravu vypraviać nie tolki jarkaje adzieńnie i makijaž u styli 80-ch, ale i žyvyja farby anhlijskich piejzažaŭ, starych arystakratyčnych damoŭ i navat mašyn.
Kali stvaralniki sieryjała chacieli pryznacca ŭ lubovi da 80-ch, u ich heta dakładna atrymałasia.
Ale reč nie tolki ŭ vizuale. Adnu z hałoŭnych rolaŭ, ampłua Toni Badynhiema, addali šatłandcu Devidu Tenantu, viadomamu svaimi rolami ŭ telefilmach — da prykładu, vy mahli bačyć jaho ŭ ikaničnym sieryjale VVS «Doktar Chto». Kampaniju Tenantu, viadomamu taksama i pa pracy ŭ teatry, skłaŭ jašče adzin napaŭteatralny brytaniec Aleks Chaseł i rossyp inšych zorak brytanskaha telebačańnia.
Usie jany hrajuć nastolki zadziorysta, kab źbierahčy hullivuju atmaśfieru knihi Džyli Kupier i samich 80-ch. Atmaśfiera, adzieńnie, bujstva farbaŭ i harmonaŭ, siužet — vyhladaje, što akciory akunajucca va ŭsio heta ź vidavočnaj asałodaj.
U niečym heta «Brydžertany», tolki pra 80-ja. I niezdarma krytyki pryniali «Supiernikaŭ» hetak ža dobrazyčliva: na papularnym resursie IMDB u ich rejtynh 8 bałaŭ z 10.
Na inšaj suśvietna viadomaj placoŭcy, Rotten Tomatoes, rejtynh «Supiernikaŭ» pa recenzijach dasiahaje 92%. Vidać, nam niadoŭha čakać druhoha siezona — kali na dvary epocha niapeŭnaści, pryjemna chavacca ad jaje ŭ jarkim minułym.
«Naša Niva» — bastyjon biełaruščyny
PADTRYMAĆ«Skazaŭ: ja tut ničoha prasić nie budu». Žonka raskazała, jak Vieramiejčyka pryznali pahrozaj u Litvie5
Kamientary