Śniežań i studzień, vierahodna, stanuć pieryjadam aktyvizacyi bajavych dziejańniaŭ na froncie ŭ rasijska-ŭkrainskaj vajnie, prahnazujuć vajskovyja analityki. Adnak isnujuć abstaviny, jakija mohuć prytarmazić abodva baki. I havorka idzie nie tolki pra zimovuju niepahadź, piša Ukrainskaja słužba Bi-bi-si.
Vosień 2024-ha hoda była ledź nie samaj składanaj u vajennym płanie dla Ukrainy. Rasijskaja armija zmahła naraścić tempy prasoŭvańnia, u pieršuju čarhu ŭ Danieckaj vobłaści, i zachapić takija harady, jak Vuhladar i Sialidava.
Bolš za toje, niepasrednaja pahroza straty da hetaha času navisaje nad Kurachavym, Vialikaj Navasiołkaj, Tareckam, Pakroŭskam i Časavym Jaram. Składanaja situacyja kala Kupianska i Baravoj na Charkaŭščynie, a taksama na zaniatych ukrainskimi siłami terytoryjach Kurščyny.
Vierahodna, zimoj abodva baki pasprabujuć zrabić «vyrašalny ryvok» u hetaj vajnie.
Jakoj budzie zima
Prasoŭvańniu rasijan vosieńniu spryjała, u pryvatnaści, nadvorje na poŭdni i ŭschodzie Ukrainy. Jano akazałasia adnosna ciopłym i suchim dla hetaha siezonu. Karotkačasovyja śniežnyja zaviei pačalisia tolki bližej da kanca listapada.
Sajty z prahnozami nadvorja śviedčać, što ŭ Danieckaj vobłaści i Zaparožžy pačatak zimy taksama budzie ciopłym i biez apadkaŭ. Naprykład, Sinoptik.ua adznačaje, što kala Kurachava, dzie ciapier praciahvajucca bai, tempieratura ŭ pačatku śniežnia budzie kala 0 hradusaŭ, vobłačna, ale biez apadkaŭ.
Namieśnica adździeła prykładnoj mietearałohii i klimatałohii Ukrainskaha hidramietearałahičnaha instytuta Viera Bałabuch raniej paviedamlała, što zima 2024/2025 moža być ciaplejšaj, čym zvyčajna, a siaredniaja za siezon tempieratura pavietra — na 1-2 hradusy vyšejšaj za normu.
Zvyčajna samy chałodny zimovy miesiac, studzień, taksama čakajecca, što ŭ 2025 hodzie budzie ciaplejšym za normu. Siaredniaja za miesiac tempieratura moža vahacca ad +1…-2 hradusaŭ na poŭdni da -3 i nižej u paŭnočnych, paŭnočna-ŭschodnich abłaściach.
Kolkaść apadkaŭ zimoj va Ukrainie čakajecca ŭ miežach normy. Adnak śpiecyjalistka nie vyklučaje raptoŭnych karotkačasovych pachaładańniaŭ zimoj na fonie anamalna vysokaj tempieratury pavietra.
Ličycca, što mienavita zimovy pieryjad samy składany dla vajennych apieracyj. Na ciažkija ŭmovy nadvorja nakładajucca bolš častyja chvaroby i paharšeńnie maralna-psichałahičnaha stanu vajskoŭcaŭ, prablemy z technikaj i zbrojaj, składanaści z pavietranaj raźviedkaj.
Praŭda, ličycca taksama, što histaryčna mienavita rasijskaja armija bolš padrychtavanaja da nastupalnych dziejańniaŭ u zimovych umovach. Navat chod padziej rasijska-ŭkrainskaj vajny častkova paćviardžaje heta.
Pačynajučy z poŭnamaštabnaha ŭvarvańnia ŭ kancy lutaha 2022 hoda, Rasija kožnuju zimu sprabavała pravodzić maštabnyja nastupalnyja apieracyi. Tak, u studzieni 2023 hoda rasijskija siły zachapili Saladar kala Bachmuta, u lutym 2024-ha — paśla praciahłych bajoŭ uziali Aŭdziejeŭku.
Ciapier na miažy padzieńnia znachodziacca dźvie važnyja ŭkrainskija «krepaści» na paŭdniovym Danbasie: Kurachava i Vialikaja Navasiołka. Abodva harady ŭžo šturmujuć i sprabujuć atačyć rasijskija vojski.
Jak vajavać zimoj
«Šmat što zaležyć ad taho, jakoj budzie hetaja zima. Asnoŭnyja teatry bajavych dziejańniaŭ — paŭdniovy Danbas i Zaparožža — vielmi zaležnyja ad stanu vajskovaj łahistyki i adpaviedna ad nadvorja», — tłumačyć Ukrainskaj słužbie Bi-bi-si vajskovy analityk Michaił Žyrochaŭ.
U hetym stepavym rehijonie, praciahvaje jon, amal usia vajskovaja łahistyka abapirajecca na palavyja darohi, pakolki navat da vajny tut było davoli mała asfaltavanych tras, a tyja, što zastalisia, ciapier u drennym stanie. Adpaviedna, kali zima budzie pieravažna ciopłaja, to palavyja darohi mohuć pieratvarycca ŭ hraź, što prymusić baki prypynić intensiŭnyja bajavyja dziejańni, u pieršuju čarhu nastupalnyja.
«Nastupać pry takich umovach u takim tempie, jak ciapier nastupajuć rasijanie, niemahčyma. Heta prapisnyja iściny», — upeŭnieny Žyrochaŭ.
Adnak kali budzie pachaładańnie, to nie varta vyklučać, što Rasija, naadvarot, pasprabuje skarystacca hetym faktaram. Heta značyć, pravieści nastupalnyja apieracyi tam, dzie zamierzłyja hruntavyja darohi dazvalajuć ruch bronietechniki.
Praŭda, kamandzir bataljona USU, jaki doŭhi čas vajuje na ŭschodzie, skazaŭ Bi-bi-si, što taktyka rasijskich šturmaŭ ciapier značna mienš zaležnaja ad stanu nadvorja.
Pavodle jaho słoŭ, rasijanie na bolšaści ŭčastkaŭ frontu nie vykarystoŭvajuć masiravana ciažkuju bronietechniku, jakaja hraźnie na biezdarožžy. Šturmy adbyvajucca na lohkabraniavanych mašynach, bahi i matacykłach. Akramia taho, praciŭnik taksama pieravažna dziejničaje piešymi hrupami, jakija možna vykarystoŭvać amal u luboje nadvorje.
«Kankretna ŭ razrezie hetaj zimy majo asabistaje subjektyŭnaje mierkavańnie — nam nie treba čakać pasłableńnia ŭdarna-šturmavych dziejańniaŭ praciŭnika na pole boju», — padkreślivaje aficer.
Bolš za toje, niespryjalnaje nadvorje moža bolš upłyvać na apieracyi ŭkrainskich sił abarony, čym rasijan. Havorka idzie pra niemahčymaść vykarystoŭvać bieśpiłotniki ŭ daždžy, śniehapady abo mocny tuman. A mienavita na drony — vyviedvalnyja i ŭdarnyja — u bolšaści svajoj ciapier abapirajecca ŭkrainskaja armija.
Adzinaje spadziavańnie — na toje, što takaja niepahadź hetaj zimoj nie budzie doŭžycca bolš za niekalki hadzin, kaža vajskoviec.
«Efiektyŭnaść bieśpiłotnych sistem z nadychodam niespryjalnych umoŭ nadvorja ŭ asieńnie-zimovy pieryjad źnižajecca, ale heta nie značyć, što vyklučajecca hetaja kampanienta», — adznačyŭ jon.
Zrešty, Rasija taksama budzie mieć značnyja prablemy. Tearetyčna jana moža na niekatory pieryjad uvohule stracić adzin sa svaich samych hroznych vidaŭ uzbrajeńnia — kiravanyja avijacyjnyja bomby (KAB). U zimovy pieryjad bolš składana vykarystoŭvać avijacyju, pakolki nialotnaje nadvorje byvaje čaściej, čym letam.
Adnak śniežnaje nadvorje ŭ niečym spraščaje pracu raźviedki. Adsutnaść «zialonki» nie dazvalaje prychavana kancentravać asabovy skład i techniku, a śniežnaje pokryva vydaje raźmiaščeńnie chovanak i pierasoŭvańnie praciŭnika.
Viadzieńnie bajavych dziejańniaŭ zimoj patrabuje ad sałdat śpiecyfičnych viedaŭ, umieńniaŭ i navykaŭ, a ad kamandavańnia — pradumanaj łahistyki i źmieny taktyki na poli boju.
Paśpieć da 20 studzienia
Praŭda, usie ekśpierty zhadžajucca z tym, što klučavyja vajennyja faktary budučaj zimy nie mietearałahičnyja, a palityčnyja.
20 studzienia 2025 hoda adbudziecca inaŭhuracyja novaha prezidenta ZŠA Donalda Trampa. Jość vysokaja vierahodnaść taho, što prykładna ŭ hety pieryjad jahonaja kamanda pačnie aktyŭna pracavać nad pieramovami. Nie vyklučana, što jany buduć uklučać «zamarozku» bajavych dziejańniaŭ pa linii frontu va Ukrainie.
«Tamu na bližejšy pieryjad da inaŭhuracyi Trampa abodva baki buduć sprabavać vycisnuć maksimum z mahčymaha», — kaža Ukrainskaj słužbie Bi-bi-si izrailski vajskovy ekśpiert David Hiendelman.
Važnym taksama źjaŭlajecca toje, ci pieradaść Ukrainie da hetaha času administracyja prezidenta Džo Bajdena pavialičanyja partyi ŭzbrajeńniaŭ i bojeprypasaŭ, hrošaj, novych vidaŭ zbroi i dazvołaŭ na jaje prymianieńnie.
Hiendelman ličyć, što ŭ hety pieryjad Rasija budzie imknucca jak maha bolš prasunucca na froncie, u pryvatnaści, zaviaršyć zachop Kurachava, atakavać na Uremiejeŭskim kirunku, adnavić cisk na Pakroŭsk, advajavać terytoryi ŭ Kurskaj vobłaści.
Na dumku ŭkrainskaha analityka Michaiła Žyrochava, vysokaja imaviernaść, što častkova svaich metaŭ rasijskaje vojska ŭsio ž dasiahnie. Havorka idzie pra adychod ukrainskich čaściej z samych ciažkich kirunkaŭ.
«Kurachava i Vialikaja Navasiołka, ja tak razumieju, heta ŭžo faktyčna stračanyja nasielenyja punkty. Trymacca jašče miesiac za ich nichto nie budzie», — ličyć jon.
Što budzie rabić Ukraina
Ukraina, sa svajho boku, budzie sprabavać utrymlivać linii abarony, u tym liku ŭ Kurskaj vobłaści, ale pavolna adstupać pad naciskam pieraŭzychodziačych sił praciŭnika, miarkuje David Hiendelman.
«USU pa-raniejšamu nie chapaje žyvoj siły na froncie, reziervy rychtujucca, a buduć jany vykarystanyja dla ŭzmacnieńnia abarony ci dla sprobaŭ nastupleńnia nakštałt Kurskaj apieracyi, heta my jašče ŭbačym».
Paralelna Ukraina ŭzmacniaje ŭdary zachodnimi dalnabojnymi srodkami pa terytoryi Rasii, što ŭsprymajecca Kramlom jak rezkaja eskałacyja, kaža jon.
«Zimovaha zacišša čakać nie davodzicca, da inaŭhuracyi Trampa treba padyści z maksimalna mahčymymi dasiahnieńniami», — kaža izrailski ekśpiert.
U svaju čarhu, Michaił Žyrochaŭ źviartaje ŭvahu, što tempy nastupleńnia rasijskaj armii vosieńniu pryviali da rekordnych strataŭ i «spaleńnia reziervaŭ» Kramla.
«Nakolki jość mahčymaści ŭ rasijan hetyja reziervy adnavić za karotki čas — heta pakul adkrytaje pytańnie. Toje spalvańnie reziervaŭ, jakoje my ciapier bačym, jano kałasalnaje», — kaža analityk.
Pa słovach krynicy Bi-bi-si va ŭkrainskim vajskovym kiraŭnictvie, ciapier kolkaść rasijskaj hrupoŭki na akupavanych terytoryjach składaje kala 574 tysiač čałaviek. Za košt hetaha na niekatorych adrezkach frontu praciŭniku atrymlivajecca stvaryć značnuju kolkasnuju pieravahu nad USU, jakija ciapier adčuvajuć prablemy ź ludźmi z-za źnižeńnia tempaŭ mabilizacyi.
U toj ža čas jašče ŭ lipieni hałoŭnakamandujučy Alaksandr Syrski kazaŭ pra płany Kramla davieści da kanca hoda kolkaść svajoj akupacyjnaj hrupoŭki va Ukrainie da 690 tysiač čałaviek. Vidavočna, hetyja namiery nie ŭdałosia realizavać.
Akramia taho, źviartaje ŭvahu analityk hrupy «Infarmacyjny supraciŭ» Kanstancin Mašaviec, sfarmavanyja sioleta stratehičnyja reziervy armii Rasii u bolšaści svajoj užo ŭviedzienyja ŭ boj, u pryvatnaści, na Kurachaŭskim i Kurskim kirunkach u składzie hrupovak vojskaŭ «Centr» i «Poŭnač».
Adpaviedna, u rasijskaha kiraŭnictva zastajecca tolki try varyjanty dziejańniaŭ na zimovuju vajennuju kampaniju, adznačaje śpiecyjalist.
Jano moža albo praciahnuć nastupalnyja apieracyi, ale tolki ŭ pałosach adkaznaści hrupovak «Centr» i «Poŭnač» abo, u vypadku pieranosu namahańniaŭ na inšyja apieracyjnyja kirunki, pravodzić stratehičnaje pierahrupavańnie siłaŭ na ŭsim teatry vajennych dziejańniaŭ. Treci varyjant — pravał rasijskaha nastupu i pierachod da abarony na bolšaści kirunkaŭ.
Adnak zastajecca adno adkrytaje pytańnie — a što z ukrainskimi reziervami?
U kancy listapada stała viadoma pra viartańnie z Francyi padrychtavanaj tam bryhady USU «Hanna Kijeŭskaja». Jašče niekalki bajazdolnych bryhad užo stvoranyja i padrychtavanyja va Ukrainie ŭ 2024 hodzie. Pakul što jany nie ŭviedzienyja na pole boju.
Zachodnija ŚMI ličać, što Ukraina moža pasprabavać pravieści kontrnastupleńnie śviežymi reziervami i z zachodniaj technikaj užo ŭ 2025 hodzie.
Pra nieabchodnaść kontrdziejańniaŭ zajaŭlaje taksama hałoŭnakamandujučy Alaksandr Syrski. Prynamsi, takija słovy hałoŭnakamandujučaha USU cytuje vajskoviec i błohier Kiryła Sazonaŭ, jaki byŭ na zakrytaj sustrečy ź im.
«Pazicyja Alaksandra Syrskaha: pavinny spynić praciŭnika. Ale pieramoha niemahčymaja, kali USU buduć pracavać tolki ŭ abaronie. Pavinny pierachoplivać inicyjatyvu i kontratakavać. Pavinny i budziem. Dzie i chto — ubačycie», — pieradaŭ jahonyja słovy Sazonaŭ.
Na dumku Michaiła Žyrochava, kali Hienštab i sapraŭdy płanuje kontrnastup, to realizavać jaho, chutčej za ŭsio, pasprabujuć znoŭ ža da 20 studzienia 2025 hoda.
Što praduhledžvaje mirny płan budučaha śpiecpradstaŭnika Trampa pa Ukrainie
Kiepski mir ci zaciažnaja vajna. Jak Ukraina rychtujecca da taho, što Tramp pasprabuje adrazu pasadzić jaje za stoł pieramovaŭ
Ci sapraŭdy «pasypaŭsia» ŭkrainski front na Danbasie?
«Miakka kažučy, nijakaj kapitulacyjaj nie pachnie». Z-vajenkar zaściaroh rasijan ad vajennaj ejfaryi
Eks-prezident Polščy: Zamarožany kanflikt budzie trahičnaj viestkaj dla Ukrainy
Padpisańnie miru z Ukrainaj «zaŭtra» padtrymali b 79% rasijan
Ukraincaŭ spytali: pieramovy z mahčymaj strataj terytoryj ci vajna da pieramohi? Vyniki śviežaha apytańnia
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść32
Kamientary