Ideja na padarunak — padborka stylovych aksiesuaraŭ ź biełaruskim kałarytam
Mienavita aksiesuary ŭnosiać finalny štrych u vobraz. Sabrali dla vas padborku stylovych rečaŭ ź biełaruskim kałarytam — ad bižuterii da torbaŭ z šalikami, pra jakija ŭ vas abaviazkova spytajuć minaki: «a adkul heta?»
Brend Kanva, stvorany Nastaśsiaj Vasiučenka, z 2018 hoda prasoŭvaje svaju misiju — rabić biełaruskaje seksi. Vidavočna, u ich atrymlivajecca, bo ich aŭtarskija zavušnicy-pavuki ci karali z dadatkam sałomy sapraŭdy vyhladajuć pryvabna ŭ spałučeńni z sučasnymi łukami.
Niadaŭna ŭ brenda źjaviłasia navinka — pacierki z čornych piarlinak i smažanaj sałomy — idealny padarunak dziaŭčatam, jakija lubiać hranžavyja, krychu rok-n-rolnyja vobrazy.
A jak vam varyjacyja z kryžom?
Usie ŭpryhožvańni Maryi Maroz, natchnionyja biełaruskaj tradycyjnaj kulturaj. Najpierš viaskovaj — ź jaje piarestymi dyvankami. Kolery hetych aksiesuaraŭ adrazu padymajuć nastroj, i, što kruta, spałučajucca amal ź lubym adzieńniem.
Dla majstrychi @darka__vyrvi_voka, zdajecca, niama nivodnaj niemahčymaj zadačy ŭ pracy ź bisieram: jana moža spleści jak składanyja malunki arnamientaŭ, tak i lubych piersanažaŭ z pościłak i falkłoru: ad kocikaŭ da busłoŭ i kalarovych žabak. Dziakujučy jaje pracavitaści i misii «natchniać Biełaruśsiu» ŭ firmovych harlačkach jaje aŭtarstva chodziać modnicy pa ŭsim śviecie.
Adna z kałabaracyj Darki, darečy, była z brendam upryhožvańniaŭ Belaruski cry — razam jany stvaryli harlački z nadpisami «Cukar baby» i «Cukar daddy».
U samoha Belaruski cry raim źviarnuć uvahu nie tolki na viadomyja padvieski ŭ formie Biełarusi, ale i na piarścionki-pierakruty z arnamientami — vyhladaje vielmi vytančana i stylova. Z takim piarścionkam nie soramna i prapanovu ruki z sercam zrabić.
A zusim niadaŭna ŭ ich źjaviłasia niezvyčajnaja navinka: tonki piarścionak z vyšyŭkaj. Vyhladaje vielmi aryhinalna.
Vielmi kruta abyhrała kaladnuju tematyku majstrycha @k.ramka, što robić upryhožvańni z palimiernaj hliny. Ale ŭ jaje vy znojdziecie pryhažość i na roznuju inšuju tematyku.
Amataram hatyčnych vajbaŭ abaviazkova adhuknucca raśpisanyja ŭručnuju mastačkaj Ciemraj šaŭkovyja binty, jakija možna nasić jak šalik, stužku ŭ vałasach ci pojas.
Brend «Honar» najpierš viadomy svaimi kašulami i sukienkami. Ale ŭ ich jość i cikavy vybar zaplečnikaŭ. Kožny znojdzie niešta na svoj hust: z vyšytym sałamianym kaniom, vałoškami, paparać-kvietkaj ci Mindoŭham.
Brend taksama adšyvaje vialikija torby, ź jakimi zručna chadzić u trenažornuju zału, šabiety i šopiery. Siarod plusaŭ: usie madeli — uniseks, tak što mohuć padyści na padarunak jak dziaŭčatam, tak i chłopcam.
Badaj, adzin z samych vialikich vybaraŭ aksiesuaraŭ z rodnymi sercu miaścinami — u «Vokładak». Brend zapuściŭsia ŭ 2012 hodzie, a na starcie pačaŭ šyć mienavita vokładki, adsiul pajšła i nazva.
Ale siońnia tut možna zakupicca jak kašalkami, kaśmietyčkami, tak i zaplečnikami roznych madelaŭ i pamieraŭ. Budzie na ich drukavany minski krajavid, rynak «Pole cudaŭ» na Ždanach ci piejzažy Homiela — vyrašać vam.
Mastačka Alena Klimava z Harodni stvaraje nievierahodnaj pryhažości chustki, jakija adrazu vyłučajuć z natoŭpu. Jana raśpisvaje ich uručnuju, raźmiaščajučy na pałatno i hierojaŭ pałotnaŭ Aleny Kiš, i prosta lasnych žycharoŭ — zajcaŭ, vaŭkoŭ i, viadoma, hałubak, u honar jakich nazvany jaje brend — «Hałubka na višni».
Ilnianyja harsety ad «Łokan kokan» — heta i pra žanockaść, i pra toj samy jarki akcent u harderobie, jaki adrazu robić uvieś vobraz zapaminalnym. Harsety šyjucca ŭ lubym pamiery i kolery, i šnuravańnie daje mahčymaść nasić ich jak bolš svabodna, tak i zaciahnuta, padkreślivajučy taliju.
Kali chočacca jašče pajhracca ź vierchniaj častkaj vobrazaŭ i dadać razynačku, apranuŭšy zvyčajnuju futbołku, možna źviarnuć uvahu na taki aksiesuar, jak maniški. Brend Tsuda ekałahična adšyvaje ich ź vintažnych firanak. Kožnaja ź ich — adzinaja ŭ svaim ekzemplary, tamu možna być upeŭnienym u tym, što vy nikoli nie sustreniecie na vulicy modnika ci modnicu ŭ takim samym spałučeńni.
Raim taksama pryhladziecca da panamak Tsuda — jany adšyvajuć ich jak u letnim varyjancie, tak i ŭ zimovym, bolš ciopłym i z vuškami.
Amatary brošak i natchnialnych nadpisaŭ abaviazkova znojduć niešta svajo ŭ Kaciaryny Cichamiravaj. Taksama jana stvaraje cacki na jalinku i zavušnicy.
Perets Sews — heta brend, jaki abjadnoŭvaje sučasny styl i biełaruskija tradycyi praz ručnuju vyšyŭku. Asabliva raim źviarnuć uvahu na halštuki i miatliki — adrazu plus 100 da aryhinalnaści ŭ lubym aficyjna-dziełavym łuku.
Dla tych, chto tak i nie paśpieŭ uciaplicca napiaredadni chaładoŭ, buduć darečy rukavicy ad Volhi Sciezka.
Jašče adzin niezamienny aksiesuar u chałodny siezon — ciopłyja šaliki. U LSTR Adziennie, naprykład, jość vielmi cikavy varyjant u kolerach vahona minskaha mietro.
Dapoŭnić vobraz možna ich firmovymi škarpetkami, i ŭsio — vy niepaŭtornyja!
Amataram vyšyŭki pryjducca daspadoby pałanciny ad Cheloveki clothes. Tut vam i piersanažy karcin Aleny Kiš, i hili, i kvietkavyja matyvy.
Bioevgenika — heta sapraŭdnyja biełaruskija kvietki, pieratvoranyja va ŭpryhožvańni. U asartymiencie — i piarścionki, i padvieski, i zavušnicy, i branzalety.
Našy babuli časta chadzili z košykami ŭ kramy, u carkvu na Vialikdzień, na rynak. Viedali, tak by mović, tołk, bo heta vielmi jomisty aksiesuar. A ciapier jašče i modny. Sapraŭdnyja fešynisty spałučajuć ich i z kaktejlnymi sukienkami, i sa spartyŭnymi kaściumami.
Vialiki vybar chendmejd-košykaŭ roznych koleraŭ jość u brenda If you know baskets. Sami jany kažuć, što na stvareńnie takoha aksiesuara ich natchniła ikona stylu Džejn Birkien, jakaja časta nasiła košyki zamiest zvykłych sumak.
Kali ž chočacca padtrymać tvorčaść ludziej u stałym uzroście — košyki vypuskaje brend pad amal adnajmiennaj nazvaj «Koš». U ich asartymiencie — aksiesuary, splecienyja rukami babuli-biełarusački.
Niekatorych majstrych forma košykaŭ asobna natchniła na stvareńnie aksiesuaraŭ. Pahladzicie, jak cikava jany hladziacca ŭ duecie z pacierkami na švedry ŭ vykanańni dyzajnierki Tani Tur.
Brend adzieńnia MUA viadomy svaimi stylovymi, elehantnymi rečami dla žančyn ź luboj fihuraj. Dla tych, chto nosić pamiery plus-sajz, u ich jość asobnaja liniejka pad nazvaj Normal. Vosieńniu jany vypuścili atmaśfiernuju kalekcyju pad nazvaj «Babuliny kazki», u jakoj šmat nastalhii i traplańnia ŭ samyja ciopłyja pačućci. Adzin z aksiesuaraŭ adtul dahetul jość u prodažy — čachoł dla navušnikaŭ «Babulin kvadrat», jaki adnačasova moža vykonvać funkcyju niezvyčajnaj padvieski.
Chalezin: Nieŭźlin finansuje Chartyju'97 jašče z prezidenckich vybaraŭ 2010 hoda30
Kamientary