«Usio, možacie vinšavać»: śpiavačka i błohierka Lera Jaskievič vyjšła zamuž FOTA
Letaś Lera Jaskievič pachvaliłasia ŭ instahramie, što atrymała prapanovu ruki i serca. Siońnia ž jana raspaviała, što aficyjna stała žonkaj.
Abrańnikam dziaŭčyny staŭ IT-mieniedžar Pavieł Aŭdzievič, ź jakim jana ŭ adnosinach kala čatyroch hadoŭ. Žanich ź niaviestaj abrali vielmi niebanalnyja vobrazy dla svajho hałoŭnaha śviata. Miarkujučy pa fotazdymkach u sacyjalnych sietkach, heta było ŭtulnaje viasielle dla samych blizkich siabroŭ.
Nahadajem: Lera Jaskievič naradziłasia ŭ Bahušeŭsku, miastečku ŭ Sieńnienskim rajonie Viciebskaj vobłaści. U 2012 hodzie jana pačała vieści svoj kanał na YouTube, kudy vykładvała kaviery na samyja roznyja pieśni: ad vykananych Maksam Karžom i ŁSP da Taylor Swift i Radiohead. U niejki momant kolkaść prahladaŭ hetych rolikaŭ pieravaliła za sotniu tysiač.
Paśla škoły Lera pastupiła ŭ Biełaruski dziaržaŭny ŭniviersitet kultury i mastactva. U 2017 hodzie jana źjeździła na ŭkrainski Ch-Faktar, a z 2018 hoda pačała vypuskać aŭtarskija pieśni. U 2020 hodzie na «Pieśni hoda Biełarusi» Leru Jaskievič ź pieśniaj «Prabač. Byvaj» nazvali adkryćciom hodu. Voś što tady pisali pra jaje na sajcie ANT: «U zale šaptalisia: «Maładaja, talenavitaja, usio ŭ joj vydatna, hałoŭnaje, kab nie «zaźviaździłasia».
Ale ž praz palityčnuju pazicyju maładaja i talenavitaja artystka trapiła ŭ «čorny śpis». Užo niekalki hadoŭ Lera žyvie ŭ Varšavie. U emihracyi jana praciahvaje vieści błoh i radavać słuchačoŭ novymi pieśniami. Siarod trekaŭ dziaŭčyny jość i biełaruskamoŭnyja — «Kali rana ŭstanieš» i «Sustreniem zimu».
Lera Jaskievič maje 655 tysiač padpisčykaŭ u YouTube i 188 tysiač u instahramie.
Kamientary
Budziem užo vinšavać, kali pojduć pa ściežcy Mantusavaj!