«Heta ja źjaviŭsia ŭ centry Kijeva, a nie Pucin». Bajden padvioŭ mižnarodnyja vyniki svajho prezidenckaha terminu
Prezident ZŠA, jaki praz šeść dzion pakidaje svaju pasadu, zajaviŭ, što adnym z hałoŭnych źniešniepalityčnych dasiahnieńniaŭ jaho pracy ŭ Biełym domie stała paśpiachovaja padtrymka Ukrainy ŭ adbićci rasijskaj ahresii, piša Bi-bi-si.
«Kali Pucin pačaŭ uvarvańnie va Ukrainu, jon dumaŭ, što zachopić Kijeŭ za niekalki dzion. Ale nasamreč paśla pačatku vajny mienavita ja źjaviŭsia ŭ centry Kijeva, a nie jon. Pucin tak i nie zrabiŭ hetaha. Padumajcie pra heta!» — skazaŭ Bajden padčas vystupu ŭ Dziarždepartamiencie ZŠA.
«Ja staŭ adzinym viarchoŭnym hałoŭnakamandujučym, jaki naviedaŭ zonu vajennych dziejańniaŭ, jakaja nie znachodzicca pad kantrolem amierykanskich sił», — dadaŭ prezident.
«My dapamahli Ukrainie spynić Pucina. I ciapier, praz try hady, Pucin nie zmoh dasiahnuć nivodnaj sa svaich stratehičnych metaŭ. Jon pakul nie zmoh padparadkavać sabie Ukrainu, nie zmoh razburyć adzinstva NATO i nie atrymaŭ značnych terytaryjalnych zdabytkaŭ», — skazaŭ Bajden, padvodziačy vyniki hetaj pracy.
«Ale praca jašče nie zavieršana, my nie možam pakinuć jaje», — padkreśliŭ prezident.
Bajden naviedaŭ Kijeŭ u lutym 2023 hoda, praz hod paśla pačatku poŭnamaštabnaj vajny. 20 studzienia novym prezidentam ZŠA pavinien stać respublikaniec Donald Tramp, jaki vykazvaŭ inšyja pohlady na ŭrehulavańnie rasijska-ŭkrainskaj vajny ŭ paraŭnańni ź ciapierašniaj administracyjaj. U pryvatnaści, jon vystupaje za chutčejšaje ŭstalavańnie miru i hatovy vieści pieramovy z prezidentam Rasii Uładzimiram Pucinym.
Pavodle danych Kilskaha instytuta suśvietnaj ekanomiki, z pačatku poŭnamaštabnaha ŭvarvańnia da kanca kastryčnika 2024 hoda abjom dapamohi Kijevu z boku ZŠA skłaŭ bolš za 88 młrd dalaraŭ (ad Jeŭropy Ukraina atrymała abo pavinna atrymać amal 125 młrd jeŭra).
Mnohija respublikancy krytykujuć Bajdena za rašeńnie nakiravać Ukrainie vializnyja abjomy amierykanskaj dapamohi i abvinavačvajuć jaho ŭ biezadkaznym abvastreńni kanfliktu, što, na ich dumku, moža pryvieści da Treciaj suśvietnaj vajny.
Niekatoryja ŭkrainskija i zachodnija ekśpierty, naadvarot, ličać, što Bajden prajaŭlaŭ praźmiernuju aściarožnaść i z bojazi spravakavać pramy kanflikt z Rasijaj svoječasova nie adpraŭlaŭ Kijevu ŭsioj nieabchodnaj vajennaj dapamohi.
Sa słoŭ prychilnikaŭ takoha padychodu, kožnaje rašeńnie pra pieradaču Uzbrojenym siłam Ukrainy novych vidaŭ uzbrajeńniaŭ — reaktyŭnych sistem załpavaha ahniu HIMARS, tankaŭ ci źniščalnikaŭ F-16 — prymałasia Biełym domam na praciahu praciahłaha času.
Kitaj i Blizki Uschod. Što jašče skazaŭ Bajden pra svoj termin
Padvodziačy źniešniepalityčnyja vyniki svajoj pracy, Bajden zajaviŭ, što ciapier usie vorahi ZŠA stali słabiejšyja, čym da jaho kiravańnia. «My nie pačynali vojnaŭ, kab dasiahnuć hetych metaŭ», — adznačyŭ prezident ZŠA.
Jon dadaŭ, što Amieryka pieramahaje ŭ kankurencyi pamiž asnoŭnymi hulcami na suśvietnaj arenie, jaje ekanomika zastaniecca samaj mahutnaj u śviecie, i Kitaju nie ŭdasca jaje abahnać.
«Vy ŭsie pamiatajecie, što ekśpierty ličyli — ci pradkazvali — što kitajskaja ekanomika niepaźbiežna pieraŭzydzie našu. Pavodle mnohich prahnozaŭ, heta pavinna było adbycca da 2030 hoda ci ŭ chutkim časie paśla hetaha», — skazaŭ Bajden.
«Ale my, tyja, chto byŭ u hetym pakoi, skazali «nie». My vyrašyli inviestavać u siabie, abaraniać našych rabočych i technałohii. Hetaha nie adbudziecca. Ciapier, pavodle apošnich prahnozaŭ pa biahučym kursie Kitaja, jany nikoli nas nie abhoniać. I kropka».
Bajden taksama zajaviŭ, što ZŠA dapamahli asłabić Iran i padtrymanyja hetaj krainaj hrupoŭki CHAMAS i «Chiezbała». Jon nahadaŭ i pra padzieńnie režymu Bašara Asada ŭ Siryi — jašče adnaho rehijanalnaha sajuźnika Tehierana.
«Pa ŭsich paramietrach pazicyi Irana ciapier najbolš słabyja za mnohija dziesiacihodździ, — skazaŭ Bajden. — Niama sumnieńniaŭ, što našy dziejańni adyhrali ŭ hetym značnuju rolu».
Prezident ZŠA vykazaŭ nadzieju na chutkaje zaklučeńnie ździełki pamiž uradam Izraila i palestynskaj hrupoŭkaj CHAMAS pra viartańnie izrailskich zakładnikaŭ i pieramirje ŭ siektary Haza.
«Pahadnieńnie pryviadzie da vyzvaleńnia zakładnikaŭ, spynieńnia bajavych dziejańniaŭ, harantyi biaśpieki Izraila i značnaha pavieličeńnia humanitarnaj dapamohi palestyncam, jakija pieražyli žudasnyja pakuty ŭ vyniku vajny, raźviazanaj CHAMAS», — zajaviŭ Bajden.
Aktyvisty, jakija zmahajucca za pravy paleścincaŭ, krytykujuć Bajdena za toje, što jon praciahvaŭ pastaŭlać Izrailu zbroju paśla napadu CHAMAS na izrailskuju terytoryju i pačatku vajny ŭ Hazie.
U vyniku ataki CHAMAS zahinuli 1200 izrailcian, bolšaść ź ich mirnyja žychary, bolš za 250 čałaviek byli ŭziatyja ŭ zakładniki. Padčas adkaznaj apieracyi Izraila ŭ Hazie, pavodle dadzienych palestynskich čynoŭnikaŭ, zahinuli bolš za 46 tys. čałaviek, značnaja častka siektara była źniščana, a bolšaść jaho žycharoŭ byli vymušanyja pakinuć svaje damy.
Pašpart Novaj Biełarusi pačnuć vydavać z 26 studzienia. Što viadoma i jak atrymać?102
Kamientary
Ciapier rasija jak nikoli słabaja. Armija praktyčna źniščanaja, nie navučanyja vajavać tysiačy mobikaŭ i zaduranych prapahandaj kantraktnikaŭ, nieabchodnaść źviartacca da karejaŭ pa dapamohu - kaža pra toje, što rasiju całkam mahčyma pieramahčy. Heta nie tolki vyzvalić sotni paniavolenych u impieryi narodaŭ, ale i dazvolić likvidavać samuju strašnuju niebiaśpieku na płaniecie.
i naibolšaja uhroza ischodit nie ot RF. Oni pośle 2*.*2.2*22 budut v zavisimosti ot Kitaja na diesiatiletija. Fantastičnyj Iłon Mask obieŝajet milliard robotov za diesiatiletije. Vot eto uhroza.